වනගත ලෙනක සිරවූ පාපන්දු කණ්ඩායම

තායිලන්තයේ වනගත ලෙනක අතුරුදන් වූ පාපන්දු කණ්ඩායමක සාමාජිකයන් සහ ඔවුන්ගේ පුහුණුකරු සොයා තවදුරටත් සෝදිසි මෙහෙයුම් ක්‍රියාත්මක කර තිබේ.

වර්ෂාවත් සමඟ පවතින ගංවතුර තත්ත්වය ඉහළ යාමෙන් සෝදිසි මෙහෙයුම් සඳහා බලපෑම් එල්ල වීම සෝදිසි මෙහෙයුම් සඳහා බාධාවක් වී තිබෙන බව වාර්තා වෙයි.

උතුරුදිග තායිලන්තයේ චියංරායි ප්‍රදේශයේ වනගත ලෙනක දී පසුගිය 24 දා අතුරුදන් වූ යොවුන් පාපන්දු කණ්ඩායමක සාමාජිකයන් 12 දෙනා සහ ඔවුන්ගේ පුහුණුකරු සෙවීමේ මෙහෙයුම්වලට වර්ෂාව සහිත අයහපත් කාලගුණයෙන් දැඩි ලෙස බලපෑම් එල්ල වී තිබේ.

ඒ හේතුවෙන් සෝදිසි මෙහෙයුම් තවත් කඩිනම් කර ඇති අතර සෝදිසි මෙහෙයුම් සඳහා මේ වනවිට චීන කණ්ඩායම් දෙකකගේ ද සහාය ලබාගෙන ඇති බව විදෙස් වාර්තා සඳහන් කරයි.

මේ අතර අමෙරිකාව බ්‍රිතාන්‍යය ලාඕසය මියන්මාරය ඇතුළු රටවල් කිහිපයකම ගලවා ගැනීමේ කණ්ඩායම් සහ විශේෂඥයින්ගේ සහාය ඇතිව අඛණ්ඩව මුදාගැනීමේ මෙහෙයුම් ක්‍රියාත්මක වන අතර පාපන්දු කණ්ඩායමේ සාමාජිකයින් අතුරුදන් වී මේ වනවිට සතියක කාලයක් ගතව ඇති නමුත් කිසිඳු හෝඩුවාවක් නොලැබීම හේතුවෙන් ඔවුන් ජීවත්ව සිටින බවට තබාගෙන ඇති බලාපොරොත්තු දිනෙන් දිනම කඩ වෙමින් පවතියි.

කෙසේ වෙතත් ඔවුන්ගේ පවුල්වල සමාජිකයින් තවමත් ලෙනෙහි පිවිසුම අබියස රැඳී සිටින්නේ ඔවුන් පිළිබඳව කිසියම් හෝ සුභවාදී පුවතක් බලාපොරොත්තුවෙන් බව වාර්තා වෙයි. මේ අතර මෙහෙයුම් සඳහා තායිලන්ත රජය විසින් හමුදා සොල්දාදුවන් 10,000කට අධික පිරිසක් යොදවා තිබේ.