විජයානි එදිරිසිංහ
පදනම් රහිත චෝදනා එල්ල වන සෑම අවස්ථාවකම අපේ රණවිරුවන් වෙනුවෙන් පෙනී සිටින බව බ්‍රිගේඩියර් ප්‍රියංක ප්‍රනාන්දු රණවිරුවා හා සම්බන්ධ සිද්ධියේ දී කොටි ඩයස් පෝරාවටත් ජාත්‍යන්තරයටත් ජනාධිපති මෛත්‍රීපාල සිරිසේන මහතා ඔප්පු කළ බව ආරක්ෂක රාජ්‍ය ඇමැති රුවන් විජේවර්ධන මහතා පවසයි.
පසු ගිය රජය කාලයේ දී එම පිරිස් නිරතුරුවම කියා සිටියේ අපේ රණවිරුවන් ජාත්‍යන්තර බලවේගවලින් බේරා ගැනීමට නම් ඔවුන් බලයට පත්කළ යුතු බවයි. එපමණක් නොවේ ජාත්‍යන්තර අධිකරණ හමුවේ අපේ රණවිරුවන්ට දඬුවම් නියම කිරීමටත් ඔවුන් අධිකරණ හමුවට පැමිණවීමට සූදානමින් සිටින බවටත් විවිධ කතා කියැවුණා. එහෙත් අපේ රජය බලයට පැමිණ එම සියලු චෝදනාවලින් රණවිරුවන් බේරාගත්තා.
මෙ සිද්ධියේ ද දෙමළ ඩයස් පෝරාව උත්සාහ කළේ අපේ නිදහස් දිනයේ දී අපේ රටට එරෙහිව උද්ඝෝෂණය කිරීමත් ඒ සම්බන්ධව කරුණු කීමට ඉදිරිපත් වූ බ්‍රිගේඩියර් ප්‍රියංක ප්‍රනාන්දු රණවිරුවාගේ තරුපටි ගලවා එම තනතුරුවලින් ඉවත් කිරීමටත්ය. එහෙත් අපේ සේනාධිනායකයා වන ජානාධිපති මෛත්‍රීපාල සිරිසේන මහතා ප්‍රියංක රණවිරුවා වෙනුවෙන් ඉදිරිපත්වී කිසිවකුටත් ඔහුගේ සේවාවට, තනතුරුවලට හෝ වෙනත් කිසිදු ආකාරයේ සිද්ධියකින් පීඩනයට පත්වීමට ඉඩ නොතබා ඔහු ආරක්ෂා කළා. ඉන් ගම්‍ය වෙන්නේ අපේ රණවිරුවන්ට කිසිවකුටත් අත තැබීමට ඉඩ නොතබා ජනාධිපතිවරයා විසින් ඔවුන් ඉදිරියටත් රැක ගන්නා බවයි. බ්‍රිගේඩියර් ප්‍රියංක රණවිරුවා කටයුතු කළ ආකාරය මමද අගය කරනවා. අපේ සිංහ කොඩියට එරෙහිව කටයුතු කළ දෙමළ ඩයස් පෝරාවට ඔහු විසින් ලබා දුන් පිළිතුර අප අගය කරනවා. දෙමළ ඩයස්පෝරාව කියන්නේ කිසිදු දෙමළ වැසියකුට සේවයක් නොකර කොටි ත්‍රස්තවාදය වෙනුවෙන් පෙනී සිට එම සංවිධානවල මුදල් හා වෙනත් වරප්‍රසාදවලින් ජීවත්වන ඔවුන්ගේ දරුවන්ට ජාත්‍යන්තර සැප ලබා දෙන කණ්ඩායමක් පමණයි.
ඔවුන් දෙමළ ජනතාව වෙනුවෙන් කළ කිසිම දෙයක් නැහැ. ඒ බව මේ රටේ මෙන්ම ජාත්‍යන්තරවල සිටින දෙමළ ජනතාවද මේ වන විට තේරුම් ගෙන සිටින බව ද ඇමැති රුවන් විජේවර්ධන මහතා කියා සිටියේය.
0 Comments