රුසියාවේ හිටපු ශ්‍රී ලංකා තානාපති උදයංග වීරතුංග මහතා මෙරටට ගෙන්වා ගැනීම සඳහා අමාත්‍යංශ තුනක් එක්ව කටයුතු කරමින් සිටියි.
විදේශ කටයුතු, අධිකරණ සහ නීතිය හා සාමය යන අමාත්‍යංශ එක්ව මේ වන විට උදයංග වීරතුංග මහතා ගෙන්වා ගැනීම සඳහා අදාළ නීතිමය කටයුතු සිදු කරන අතර, මේ වන විට කණ්ඩායම් දෙකක් ඩුබායි බලා පිටත්ව ගොස් තිබේ.
මේ කණ්ඩායම් දෙකේ නියෝජිතයන් එරට අදාළ බලධාරීන් සමඟ රාජ්‍ය තන්ත්‍රික මට්ටමින් සාකච්ඡා පවත්වා උදයංග වීරතුංග මහතා මෙරටට ගෙන්වා ගැනීමට අවශ්‍ය නීතිමය කටයුතු සම්පාදනය කෙරෙන බව වාර්තා වේ.
මිග් යානා ගනු-දෙනුවේ සිදු වී ඇතැයි කියන වංචාවන් සම්බන්ධයෙන් සැකකරුවකු වන උදයංග වීරතුංග මහතා එහි පරීක්ෂණ කටයුතු ආරම්භ වීමත් සමඟ අතුරුදන් විය. ඔහු අත්අඩංගුවට ගැනීම සඳහා ජාත්‍යන්තර වරෙන්තු නිකුත් කෙරුණු අතර, ඒ අනුව පසුගිය දා ඩුබායි ගුවන්තොටු පොළෙන් අමෙරිකාව බලා යාමට පැමිණි අවස්ථාවේදී උදයංග වීරතුංග මහතා අත්අඩංගුවට ගැනිණි. ඔහු අත්අඩංගුවට ගෙන අප රටට භාර දීම සඳහා ගිවිසුමකට එලැඹ ඇත්තේ රුසියාව සමඟ පමණක් බැවින් ඩුබායිහි දී අත්අඩංගුවට ගැනීම නිසා අප රටට ගෙන්වා ගැනීමට අවශ්‍ය නීතිමය කටයුතු කිරීමට සිදුව තිබේ.
0 Comments