ගාල්ලේ මහින්දය දකුණු පළාතේ ඇති ප්‍රධාන පෙළේ බෞද්ධ පාසලකි. මහින්දේ නම් හරි අපූරු ඉස්කෝලයකි. එහි ඉගෙනුම ලැබූ ආදි ශිෂ්‍යයන් මෙන්ම දැනට ඉගෙනුම ලබන ශිෂ්‍යයන් මහින්දය ගැන කියන්නේ එසේය. එම පාසලේ ආදි ශිෂ්‍යයකු වන ප්‍රවීණ මාධ්‍යවේදි සුන්දර නිහතමානි ද මැල් මහතා ‘මහින්දේ තමයි ඉස්කොලේ’ යනුවෙන් කෘතිය ලියන්නට ඇත්තේද එ් නිසා වන්නට ඇත.
මහින්දයෙන් බිහි වූ උගත්තු, උසස් වෘත්තිකයෝ, කලාකරුවෝ බොහෝය. එමෙන්ම මහින්දයෙන් රට වෙනුවෙන් යුද බිමට ගිය විරුවෝද, රට වෙනුවෙන් දිවි පිදු විරුවෝද බොහෝ වෙති. යුද්ධය දරුණුවටම තිබූ යුගයේ ජීවිතයේ තරුණ විය යුදබිමට කැප කළ විරුවන් තිදෙනෙකු වෙනුවෙන් උපහාර පිදිමේ උත්සවයක් පසුගියදා එම විද්‍යාලයේදි පැවැත්විණි. එය අභිමානවත් මොහොතකි.
එකම පාසලකින් එකම කාලීසිමාවක් තුළදී මේජර් ජනරාල්වරුන් තිදෙනෙකු හා රියාද් අද්මිරාල්වරයකු බිහිවීම ඉතා කලාතුරකින් සිදුවන්නකි.
අපේ රටේ පාසල් ඉතිහාසයේ පාසලකින් මෙවැන්නක් වාර්තා වන තෙවැන්න මෙය බව පැවැසේ. මෙහි විශේෂය නම් රණවිරුවන් සිවු දෙනා එකි පාසලේ ඉගෙනුම ලැබු සමකාලීනයන් වීමය.
මෙරට ආරක්ෂක සේවාවේ එකම කාලසිමාවක් තුළ ජ්‍යෙෂ්ඨයන් බවට පත්වු මිහිඳු පුතුන් සිවු දෙනා වන්නේ මේජර් ජනරාල් මහින්ද මුදලිගේ, මේජ්ර් ජනරාල් ගාමිණි විද්‍යානන්ද, මේජර් ජනරාල් ශාන්ත කුමාර් තිරුනාවුකරුසු, හා රියර් අද්මිරාල් ආනන්ද ගුරුගේ යන මහත්වරුය. මොවුන් මහින්දයේ කීර්තිමත් ආදිසිසුහුය. මේජර් ජනරාල් මහින්ද මුදලිගේ හා මේජර් ජනරාල් ගාමිණි විද්‍යානන්ද එකම කාලයකදි ශ්‍රි ලංකා යුද හමුදාවට එක් වූහ. මේජර් ජනරාල් ගාමිණි විද්‍යානන්ද හා රියර් අද්මිරාල් ආනන්ද ගුරුගේ මහින්දයේ එකම පන්තියේ ඉගෙනුම ලැබු මිතුරෝ දෙදෙනෙකි. මේ දෙදෙනා මහින්දයේ දෙවැනි වසරේ සිට පාසලෙන් ඉවත්ව යන තෙක්ම එකම පන්තියේ අකුරු කළහ. සමිපතම මිතුරන් වන මේ දෙදෙනාම දහය ශ්‍රේණියේ දි ජිව විද්‍යා අංශයෙන් උසස් පෙළ සඳහා පෙනී සිටියහ.
පාසල් වියේ දී මේජර් ජනරාල් මහින්ද මුදලිගේ මහින්දයේ සිසුන් අතර එක් රැයකින් ජනප්‍රියත්වයට පත්වු මිහිඳු තරුවකි. ඒ මහින්ද පුරාණ නාට්‍යයේ ඕල්ෙකාට්තුමාගේ චරිතයට පණපොවමිනි. එමෙන්ම මේජර් ජනරාල් ශාන්ත කුමාර් තිරුනාවුකරුසු එදා මෙකි නාට්‍යයේ රගපෑවේ පාසලේ පළමු විදුහල්පතිවරයා වු බොල්ෂ් ඩැනිගේ චරිතයට පණ පොවමිනි. එදා මේ කොලු ගැටවු දෙදෙනා මහින්දයේ ඕල්ෙකාට් ශාලා වේදිකාව දෙවනත් කරලූයේ සිය සහෝදර සිසුන් ගුරුවරුන් මවුපියන් අමන්දානයට පත් කරමිනි.
මහින්දයෙන් රටට දායද කළ මේ රණවිරුවන් සිවුදෙනාගෙන් එක් රණවිරුවකු දෙමළ ජාතිකයකු හා හින්දු භක්තිකයකු විමද විශේෂත්වයකි. ඒ මේජර් ජනරාල් ශාන්ත කුමාර් තිරුනාවුකරුසුය.
මේජර් ජනරාල් මහින්ද මුදලිගේෙ, මේජ්ර් ජනරාල් ගාමිණි විද්‍යානන්ද, රියර් අද්මිරාල් ආනන්ද ගුරුගේ එදා එකම කාලවකවානුවක දී මහින්දයේ ශිෂ්‍ය භට ඒකකය නියෝජනය කළහ. එදා මේජර් ජනරාල් මහින්ද මුදලිගේ විරුවාගේ සාජන්වරයා වුයේ අද මහින්ද මුදලිගේ සමඟ මේජර් ජනරාල් ධුරයට පත්ව සිටින ගාමිණි විද්‍යානන්දය. අනෙක් සාජන්වරයා වුයේ නාවික හමුදාවේ වත්මන් රියර් අද්මිරාල් වන ආනන්ද ගුරුගේය. එදා ශිෂ්‍ය භට බළකායේ සාජන් මේජර්වරයා වුයේ පසුගියදා එම විරුවන් වෙනුවෙන් උපහාර උත්සවය සංවිධානය කිරීමට මුල් වු මහින්ද සමාජයේ සභාපතිවරයා වන ඩී එම් තිවකුමාර් මහතාය.
මහින්දයෙන් වර්ණලාභය ලැබු මේ රණවිරුවෝ පාසලට ගෞරවයක් කීර්තියක් ලබාදුන්හ. පාසලට කීර්තියක් අත් කරදුන් මේ රණවිරුවන් සිවු දෙනා වෙනුවෙන් උපහාර උත්සවයක් සංවිධානය කළ යුතු බවට යෝජනාව ඉදිරිපත් කළේ මහින්ද සමාජයේ සභාපතිවරයා වන ඩි. එම්. තිවකුමාර් මහතාය. විදුහල්පති ගාමිණි ජයවර්ධනයන් ඒ සඳහා සිය කැමැත්ත ලබාදුන්නේ දෙවරක් නොසිතාය.
උත්සවයේ දී එම විරුවන් පාසල් ජීවිතයේදී ලැබූ අතීත රසවත් අත්දැකිම් සිහිපත් ආඩම්බරයෙනි.
“මා මහින්දය ගැන ආඩම්බර වෙනවා. දැනුම සිරිත් විරිත් චාරිත්‍ර හැම දෙයක්ම ලබාගත්තේ මහින්දයෙන්. මා බෞද්ධයෙක් නෙවෙයි. නමුත් මහින්දය මාව බෞද්ධයෙක් කළා. මා පාසලේදී බුද්ධාගම හොඳින් ඉගෙන ගත්තා. අපට පාසලේදි බුද්ධාගම ඉගැන්වු ස්වාමින් වහන්සේගේ හොදම ගෝලයා වුණේ මම. ආධුනික කැඩෙට් නිලධාරියකු ලෙස ආරක්ෂක විද්‍යාපිඨයට ඇතුළත් වු අවස්ථාවේ ජ්‍යෙෂ්ඨ සිසුන් ඇවිත් ‘උඹේ නම මොකක්ද‘ කියලා ඇසුවා. මා නම කියන වාරයක් ගානේ ඒ අය හිනාවෙනවා. මට අපහාසයට තමයි හිනා වුණේ. පෝය දිනය දා මේ ආයතනයේ බෝධි පුජාවක් කළා .මට හිනාවු ජ්‍යෙෂ්ඨයා මාගේ ආසන්නයේ හිටියේ. මා ශබ්දයෙන් ඉතා නිවරදිව ගාථා කිවා. නමුත් මා අසල සිටි ජ්‍යෙෂ්ඨයා පටලා පටලා තමයි ගාථා කීවේ. පස්සේ මේ අය මට විහිළු කළා සිවුරු ඇරලා ආපු අයෙක් කියා. මහින්දයෙන් මට නොලැබුණු දෙයක් නැහැ” මේජර් ජනරාල් තිරුනාවුකරුසු කිවේය.
“පාසල් කාලය හරිම සුන්දරයි. පාසලේ මලල ක්‍රිඩාවල දී මෙන්ම අනෙකුත් බාහිර ක්‍රියාකාරකම්වල දී අපි එකට වැඩ කළා. මාත් රියර් අද්මිරාල් ආනන්ද ගුරුගේත් දෙවැනි පන්තියේ ඉඳලා පාසලින් ඉවත්ව යන තෙක්ම එකම පන්තියේ අකුරු කළා. මට පොඩි කාලයේ ඉඳලා හමුදාවට එක් වීමට ආශාවක් තිබුණා. ඒ වෙනුවෙන් මා සිහින මැව්වා. මහින්දය නිසා තමයි අපට අද මේ තත්වයට එන්නට පුළුවන් වුණේ.මහින්දයට මාව ඇතුළත් කළ මවුපියන්ට මා සදා ණය ගැතියි”.
මේජර් ජනරාල් ගාමිණි විද්‍යානන්ද, අතීත සුන්දර මතකයන් සිහිපත් කරමින් කිවේය.
මේජ්ර් ජෙනරාල් ගාමිණි විද්‍යානන්ද කොටි ත්‍රස්තවාදින්ට එරෙහිව සටන් කළ විරුවෙකි. ඔහු රණකාමි, උත්තමසේවා යන පදක්කම්වලින් ලක්මාතාව සැරසු අතිදක්ෂ රණවිරුවෙකි.
මේජර් ජනරාල් මහින්ද මුදලිගේ එක්සත් ජාතීන්ගේ සංවිධානයේ සාම සාධක හමුදාවට ද සිය දායකත්වය ලබා දීමට කටයුතු කළේය. පාකිස්තානයේ ඉස්ලාමාබාද්හි ජාතික ආරක්ෂක විද්‍යාලයේ උපාධිධාරියෙකි. 23 වැන පාබළ සේනංකයේ සේනාධිපති වශයෙන් කටයුතු කළ මේ රණවිරුවා 24 වැනි සේනාංකයේ සේනාධිපතිවරයා ලෙස කටයුතු කරයි.
“මා මහින්දයට ආවේ කළුතර ඉඳලා උදේ 4.00ට නැඟිටලා තමයි පාසල් ආවේ. උදෑසන 6.30 වන විට පාසලට ආවා. පාසලේ බාහිර වැඩ කළා. ඒ විතරක් නෙවෙයි ඉගෙනීමත් හරියට කළා. එදා අපිත් සමඟ ශ්‍රි ලංකා යුද හමුදාවට 60 දෙනෙකුගේ කණ්ඩායමක් එක් වුණා. නමුත් අද ජිවත් වෙලා ඉන්නේ 12 දෙනයි. අපි මැරිලා ඉපදුණු මිනිස්සු. අපට ජිවත් වෙන්න වාසනාව තිබුණා. යුද සමයේ දී මුලතිව්වලදි අපි ගොඩක් අසරණ වෙලා හිටියේ. අපේ විශාල පිරිසකට තුවාල වෙලා අපේ මොරාල් එක වැටිලා තිබුණේ. මුහුදෙන් තමයි ආවේ. එදා මගේ පන්ති සගයා වු රියර් අද්මිරාල් ආනන්ද ගුරුගේ එක පාරට ජේට් එකකින් මතුවුණා. ‘මහින්ද බය වෙන්න එපා උඹලා ඔක්කොම අරන් යනවා‘ කියලා කිවා. අතීත සිද්ධි සිහිපත් කරමින් මේජර් ජනරාල් මහින්ද මුදලිගේ කිවේය.
රියර් අද්මිරාල් ආනන්ද ගුරුගේ මහින්දයෙන් බිහිවු රණවිරුවෙකි. හේ පාසල් කාලයේ දි මහින්ද ශිෂ්‍ය භට බළකාය හා බාලදක්ෂ සමුහය නියෝජනය කළේය. කනිෂ්ඨ හා ජ්‍යෙෂ්ඨ ශිෂ්‍ය නායකවරයකු ලෙසද කටයුතු කළේය. ශාන්ත ජොන් ගිලන්රථ සේවාවේ ක්‍රියාකාරිකයකු වු ආනන්ද ගුරුගේ නාවික හමුදාවට එක් වී රියර් අද්මිරාල් තනතුර දක්වා ජ්‍යෙෂ්ඨත්වයට පත් වීමට හැකි විය. මේ රණවිරුවා ශ්‍රිමත් ජොන් කොතලාවල පිඨයේ උපාධිධාරයෙකි. බංගලිදේශයේ ඩකා විශ්වවිද්‍යාලයෙන් විද්‍යාපති උපාධිය ද ලබාගත්තේය.
“මගේ පියා එවකට ගාල්ල කච්චේරියේ ප්‍රධාන ලිපිකරු .මට මල්ලිලා දෙන්නෙක් හිටියා. ඒ කාලේ අපේ තාත්තාට බැංකු ගිණුම් ණයපත් තිබුණේ නැහැ. තාත්තාගේ මාසික වැටුප අම්මා නිසි අයුරින් කළමනාකරණය කළා. ඇත්තටම කළමනාකරණය ඉගෙන ගත්තේ නි‍ෙවසින් සමාජයට අවශ්‍ය මඟපෙන්විම ලැබුණේ පාසලින්. පාසලින් තමයි ජිවිතයට යමක් එකතු කළේ.
පාසලේ අපේ සමකාලීනයන් අතරේ සහෝදර බැඳීමක් තියෙනවා. පාසල් කාලය තමයි හොඳම කාලය. අපි හතර දෙනාට මහා පොදු සාධකයක් තිබුණා. අප ආ ගමන් මඟ දුෂ්කරයි. ඒ වගේම සුන්දරයි. අද අපි රට වෙනුවෙන් පාසල වෙනුවෙන් යමක් කළා කියන හැඟීම අපට තියෙනවා.” රියර් අද්මිරාල් ආනන්ද ගුරුගේ මහතා පැවැසුවේය.
ලලිත් චාමින්ද
from silumina sithmalyaya
0 Comments