අප සෑම විටම සිතිය යුත්තේ සියලු සංස්කෘතීන් හා භාෂාවේ ගැබ්ව ඇති එකමුතුකම, සහෝදරත්වය හා සුහදත්වය වර්ධනය කිරීම බව උතුරු පළාත් ආණ්ඩුකාරවර ආචාර්ය සුරේන් රාඝවන් මහතා පැවසී ය.
ඒ මහතා මේ බව පැවසුවේ මුලතිව් ප්‍රදේශයේ මල්ලාවි, යෝගින්බිගෙයි, යෝගපුරම් කෝවිලේ පැවැති උත්සවයකට පසුගිය දා (18) සහභාගී වෙමිනි. එම අවස්ථාව සඳහා ප්‍රදේශයේ ජනතාව සහ රාජ්‍ය නිලධාරීන්ගේ පැමිණීම පිළිබඳව තමන්ගේ සතුටද ආණ්ඩුකාරවරයා විසින් එහිදී පුද කළේය.
ඉන් පසුව වන්නි ප්‍රදේශයේ ජනතාව විශ්වාස කරන වන්නි දෙවියන් පිළිබඳව සකස් කළ වාර්තාමය වැඩසටහනක් ද ආණ්ඩුකාරතුමන්හට පිළිගන්වූ අතර ප්‍රදේශයේ ජනතාව සහ ආගමික නායකයන් එතුමන්ව ඉතා ඉහළ පිළිගැනීමකට ලක් කරනු ලැබීය.
එහිදී වැඩිදුරටත් අදහස් දැක්වූ සුරේන් රාඝවන් මහතා කියා සිටියේ අප සියලු දෙනා අදිටන් කර ගත යුත්තේ බිඳුනු සිත්, රිදුනු සිත් නැතිව එක්සිත්ව සෑම දෙනාම එක මවකගේ දරුවන් මෙන් ශ්‍රී ලංකා මාතෘ භූමිය තුල ජීවත් විය යුතු බවත් අපි සියලු දෙනාම එකතු වී එක් ගමනක්, එක් අරමුණක් කරා යා යුතු බවත් ය. ඒ උදාර ගමන යෑමට අප එක් විය යුතු බව ඒ මහතා කීය.
භාෂාව හා සංස්කෘතිය වෙනස් වූවත් සියලු සංස්කෘතීන් හා භාෂාව තුල ගැබ්ව ඇති එකමුතුකම, සහෝදරත්වය හා සුහදත්වය වර්ධනය කිරීමට අප සෑම විටම සිතිය යුතු බවත්මේ සියලු දේ තේරුම් ගෙන අපි සියලු දෙනාම සහෝදරත්වයෙන් එකතුවී කටයුතු කල යුතු බවත් පැවසූ ආණ්ඩුකාරවරයා තමා වටා සිටින බාල, මහළු, වැඩිහිටි සියලු දෙනාටද මේ පිළිබඳව වටහා දී එක මඟක ගමන් කිරීමට අදිටන් කරගත යුතු බවත් කීවේය.
එම අවස්ථාව සඳහා ආණ්ඩුකාරවර ලේකම් එල්.ඉලංගෝවන් , ආණ්ඩුකාරවර පෞද්ගලික ලේකම් නීතිඥ කැලුම් හේවගේ , උතුරු පළාත් අධ්‍යාපන ලේකම් එස්. සත්‍යසීලන් , පාර්ලිමේන්තු මන්ත්‍රිනී ශාන්තිනී කන්දරාජා යන මහත්ම මහත්මීන් ඇතුළු රාජ්‍ය නිලධාරීන් සහ ප්‍රදේශයේ විශාල ජනතාවක් ද සහභාගී වී සිටියහ.
චන්දිමා කරුණාරත්න
0 Comments