තැලසීමියා රෝගයට තිත තැබීමේ අරමුණෙන් පාසල් දරුවන් අතර සිටින තැලසීමියා රෝගයට ගොදුරු වූ දරුවන් සොයා ගැනීමේ ජාතික වැඩසටහන මේ මස 08 වැනිදා මහනුවර දිස්ත්‍රික්කයෙන් ආරම්භ කිරීමට රජය තීරණය කරයි.
වාර්ෂිකව අලුතින් තැලසීමියා රෝගීන් 100 ක් මෙරටින් සොයා ගන්නා බවත් තැලසීමියා වාහකයන් දෙදෙනකු විවාහ වීමෙන් ඉපදෙන දරුවන් ද එම රෝගයට ගොදුරු වීමේ අවදානමක් පවතින බවත් මහනුවර ශික්ෂණ රෝහලේ තැලසීමියා ඒකකයේ ප්‍රධානී ළමා රෝග විශේෂඥ වෛද්‍ය මහින්ද අරඹේපොළ මහතා පවසයි.
මෙරට ජනගහනයෙන් සියදෙනකුගෙන් හතර දෙනකු තැලසීමියා රෝගයට ගොදුරු වී ඇති බව සමීක්ෂණ වාර්තාවලින් අනාවරණය වී ඇති බවත් එක් රෝගියකු වෙනුවෙන් රජය රුපියල් මිලියන 10 ක මුදලක් වැය කරන බවත් ඒ මහතා පැවැසුවේය.
ලෝක තැලසීමියා දිනය මේ මස 08 වැනිදාට යෙදී ඇත. ඒ නිමිත්තෙන් සෞඛ්‍ය ප්‍රවර්ධන කාර්යාංශයේ පැවැති මාධ්‍ය හමුවට සහභාගි වෙමින් ඒ මහතා මේ බව ඊයේ (04) ප්‍රකාශ කළේය.
වර්තමානය වන විට තැලසීමියා රෝගීන් 2000 කට පමණ ප්‍රතිකාර කරන්නේ යැයි ද, තැලසීමියාවෙන් තොර ශ්‍රී ලංකාවක් බිහි කිරීම සඳහා ජනතාව දැනුවත් කිරීමේ වැඩසටහන් රැසක් ආරම්භ කර ඇත්තේ යැයි ද හෙතෙම පැවැසීය.
රුධිරයේ රතු රුධිරාණුවල හීමොග්ලොබින් නිපද වීමේ ඌනතාවක් හේතුවෙන් තැලසීමියා රෝගය හට ගන්නා බවත් තැලසීමියා රෝගය පවතින දෙදෙනකු විවාහ වීම වැළැක්වීමෙන් මේ රෝගයට ගොදුරු වන දරුවන්ගේ සංඛ්‍යාව අවම කර ගත හැකි බවත් ඒ මහතා ප්‍රකාශ කළේය.
මේ රෝගයට ගොදුරු වූ පුද්ගලයකු මුළු ජීවිත කාලයම රෝගයත් සමඟ ගත කළ යුතු බවත් අධික සුදුමැලි බව, අක්මාව සහ ප්ලීහාවේ ඉදිමීම රෝගයේ ප්‍රධාන ලක්ෂණ වන අතර දරුවකු ඉපදී පළමු මාස හතරත් අටත් තුළ මේ ලක්ෂණ පෙන්නුම් කරන බවත් ඒ මහතා කීය.
තැලසීමියා රෝගයට ගොදුරු වූවන් සඳහා මසකට වරක් ජීවිත කාලය පුරාවටම පිටතින් රුධිරය ලබාදීම සිදු කළ යුතු බවත් රුධිරය ලබාදීම නිසා ශරීරයේ යකඩ එකතු වීම ඇතුළුව මෙම රෝගයේ සංකූලතා හේතුවෙන් මෙවැනි දරුවන් රැකබලා ගැනීමේදි ආර්ථික, සමාජයීය සහ මානසික ගැටලු රැසකට මුහුණ දීමට මවුපියන්ට සිදු වන බවත් ඔහු පැවැසීය.
0 Comments