වැලිගම සමූහ ටී.කේ.මහින්ද
මිරිස්ස සංචාරක ව්‍යාපාරයේ ගැටළු හදුනාගෙන ඒවාට විසදුම් ලබා දීමේ වැඩ පිළිවලක් ක්‍රියාවට නැංවීමට පියවර ගැනේ.
දැනටමත් සංචාරක කේෂත්‍රයේ ගැටළු 58 ක් හදුනාගෙන ඇති අතර දක්ෂිණ සංවර්ධන අධීකාරිය, සංචාරක මණ්ඩලය, පළාත් පාලන ආයතන ඇතුළු රජයේ ආයතන රැසක හා සංචාරක හෝටල් හිමියන්ගේ සහභාගිත්වයෙන් සංචාරක කාර්මාන්තයේ ගැටළු සාකච්ඡා කිරීමේ වැඩ සටහන් කිහිපයක දී මෙම ගැටළු හඳුනාගෙන ඇති බව ව්‍යාපෘති කළමනාකරණ ,තරුණ කටයුතු හා දක්ෂිණ සංවර්ධන අමාත්‍ය සාගල රත්නායක මහතා පැවසීය.
මිරිස්ස සංචාරක කාර්මාන්තය ප්‍රවර්ධන කිරීම සඳහා පසුගිය 26 වැනි දින පැවති ප්‍රගති සමාලෝචන රැස්වීමකට සහභාගිවෙමින් තවදුරටත් අදහස් දැක්වූ අමාත්‍යවරයා මෙසේද අදහස් දැක්වීය.පුහුණු ශ්‍රමිකයන් නොමැතීවීමල සංචාරක ව්‍යාපාරයේ ප්‍රධාන ගැටළුවක් බවට පත්ව ඇත.
එම කේෂත්‍රයට යොමුවන තරුණ,තරුණියන්ට වෘත්තීය පුහුණුවක් ලබා දීමට දිවයිනේ ආයතන පහක් ආරම්භ කෙරේ.ඉන් එක් ආයතනයක් දකුණු පළාත කේන්ද්‍ර කර ගනිමින් දික්වැල්ල ප්‍රදේශයේ ස්ථාපනය කෙරේ. නවීන හා තාක්ෂණික පුහුණුවක් මින් ලබා දෙන අතර ජාතික තරුණ සේවා සභාව,ජාතික ආධුනිකත්ව හා කාර්මික පුහුණු අධිකාරියේ මෙහෙයවීම තුළ පුහුණු වැඩ සටහන් ක්‍රියාත්මක කෙරේ.
එම පාඨමාලා උපාධි මට්ටම සමානව ක්‍රියාත්මක කිරීමටත්, මෙම ආයතන දිවයිනේ පිළිගත් හෝටල් පාසලක් බවට පත්කිරීමට අපේක්ෂා කෙරේ. මිරිස්ස සංචාරක කලාපය තුළ මේ වන විටත් අක්‍රීයව පවතින විදුලි පහන් යථා තත්ත්වයට පත්කිරීමට පළාත් සභාව හා නගර සභාව මගින් වැඩ පිළිවලක් සකස් කර ඇති බවත්, එහිදී විදුලි බල්බ අවශ්‍ය ස්ථානවල පමණක් සවිකිරීම වැදගත් වන බැවින් ඒ පිළිබඳ අවධානය යොමු කිරීමේ වැදගත්කම ද අමාත්‍යවරයා විසින් මෙහිදී පෙන්වා දුන්නේය.
සංචාරක කලාපයේ මාර්ගීවල සංචාරකයන් ගැවසෙන බැවින් වේග සීමාවන් දැක්වෙන පුවරු සවිකිරීමටද මාර්ගී සංවර්ධන අධිකාරිය වෙත පවරා තිබේ. සංචාරක හෝටල් හිමියන් පෙන්වා දී ඇති තවත් ගැටළුවක් වන්නේ මිරිස්ස ප්‍රදේශයේ බොහෝ සංචාරක හෝටල් බලපත්‍ර නොමැතිව බියර් අලවි කිරීමයි.
මෙයට විකල්පයක් ලෙස මාස තුනක තාවකාලික බලපත්‍ර නිකුත් කිරීම කෙරෙහි මෙහිදී අවධානය යොමුවී ඇත. විවිධ ක්‍රියාකාරකම් තුළ මිරිස්ස සංචාරක ව්‍යාපාරය දියුණුවී තිබේ. එම ක්‍රියාකාරකම් ආරක්ෂා කළ යුතුයි. නමුත් අනෙකුත් සංචාරකයන්ට බාධාවක් නොවන ලෙස එය ක්‍රියාත්මක කළ යුතුයි. නීති රාමුවක් අවශ්‍යවේ. මුල් අවධියේදී සමුපුර්ණයෙන්ම නීතිය දෙස අවධානය යොමු කර නැත.
අපට අවශ්‍ය වන්නේ මිරිස්ස සංචාරක ව්‍යාපාරය අඛන්ඩව දියුණු කිරීමට පියවර ගැනීමයි. සංචාරක ආයතන ලියාපදිංචි නොකිරීමෙන් ඔවුන් ගැටළු ගණනාවකට මුහුණ දෙනු ලබයි. සංචාරක ආයතන ලියාපදිංචි කිරීමේ ජංගම සේවාවක් පැවැත්වීමට සැලසුම් කර ඇති බව ද අමාත්‍යවරයා පැවසීය.
විවිධ හේතුන් නිසා ඇතැම් රටවල කිසියම් කාලසීමාවකට සංචාරක කාලසීමාව සීමා කෙරේ.මිරිස්ස සංචාරක කලාපය තුළ පාරිසරික ගැටළු විශාල ලෙස බලපෑමක් නැති බැවින් මාස 12 ක සංචාරක කලාපයක් බවට පත්කිරීමේ හැකියාව පවතී.මෙම ප්‍රශ්න සාකච්ඡා කර විසදුම් සොයා ගනු ලැබුවහොත් මිරිස්ස සංචාරක ව්‍යාපාරයට ඉදිරි ගමනක් තිබෙන බව ද සාගල රත්නායක අමාත්‍යවරයා පෙන්වා දුන්නේය.
සංචාරක පොලිසියක් මිරිස්ස ප්‍රදේශයේ ස්ථාපනය කිරීමට අවශ්‍ය භුමි ප්‍රදේශය හදුනාගෙන ඇති අතර අනුමැතිය ලැබුණු පසුව එය කඩිනමින් ඉදිකිරීමේ කටයුතු ආරම්භ කිරීමට සැලසුම් කර ඇති බව මාතර කොට්ඨාස භාර පොලිස් අධිකාරී ජී.එච් මාරපන මහතා පැවසීය.
අනවසර ඉදිකිරීම් කිරීමේදී පළාත් පාලන ආයතන සමග සාකච්ඡා කර පියවර ගත යුතු බව මෙහිදී අදහස් දැක්වූ වැලිගම ප්‍රදේශීය සභාවේ සභාපති පුෂ්පකුමාර බැට්ටගේ මහතා පැවසීය.වැලිගම ප්‍රාදේශීය ලේකම් සුමිත් ශාන්ත,වැලිගම නගරාධිපති රෙහාන් ජයවික්‍රම,මහත්වරුන් හා සංචාරක හෝටල් හිමියන් රැසක්ද මෙම කේෂත්‍රයේ ගැටළු පිළිබඳ මෙහිදී අදහස් දැක්වූහ.
ඡායාරූපය - වැලිගම සමූහ
0 Comments