අනුරාධපුර මධ්‍යම විශේෂ
එප්පාවල නල්ලමුදාවේ පිහිටි විහාරස්ථානයක වැඩවසන හිමිනමකට එරෙහිව විරෝධතාවයේ නිතරවූ කාන්තාවන් පිරිසක් විසුරුවා හැරීමට යාමේදී කාන්තාවකට අමානුෂික අයුරින් පහරදුන් එප්පාවල මූලස්ථාන පොලීසියේ අපරාධ විමර්ෂණ අංශයේ වැඩ බලන ස්ථානාධිපතිවරයාගේ සේවය වහාම අත්හිටුවීමට උතුරුමැද පළාත භාර ජ්‍යෙෂ්ඨ නියෝජ්‍ය පොලිස්පති රංජිත් අබේසිරිගුණවර්ධන මහතා නියෝග කර තිබේ.
වහාම ක්‍රියාත්මක වන පරිදි ඊයේ (30) දිනයේ සිට උප පොලිස් පරික්ෂකවරයාගේ සේවය අත්හිටුවීමට තීරණය කළ බවත් එම සිද්ධිය සම්බන්ධයෙන් පරීක්ෂණ පවත්වීමට කැබිතිගොල්ලෑව සහකාර පොලිස් අධිකාරී සේනක ජයසිංහ මහතා පත්කර තිබෙන බව අනුරාධපුර කොට්ඨාශභාර පොලිස් අධිකාරීවරයා සඳහන් කළේය.
මෙලෙස වැඩ තහනමට ලක්ව ඇත්තේ එප්පාවල පොලීසියේ අපරාධ විමර්ශන අංශයේ ස්ථානාධිපති ලෙස කටයුතු කළ පොලිස් පරීක්ෂක අබේවර්ධන මහතාගේය. අදාළ සිද්ධිය සම්බන්ධයෙන් අනුරාධපුර කොට්ඨාස භාර පොලිස් අධිකාරී තිළිණ ප්‍රියංකර හේවාපතිරණ මහතාගේ උපදෙස් මත කැබිතිගොල්ලෑව සහකාර පොලිස් අධිකාරී සේනක ජයසිංහ මහතා විසින් සිදු කළ පරීක්ෂණයකින් අනතුරුව සිද්ධියට සම්බන්ධ පොලිස් පරීක්ෂකවරයාගේ වැඩ තහනමට ලක් කර ඇත.
තවද විරෝධතාවය මැඩ පැවැත්වීම සඳහා අදාළ ස්ථානය වෙත වාර්තා කර සිටි අනෙක් සියලු පොලිස් නිලධාරීන් සම්බන්ධයෙන්ද පරීක්ෂණ සිදුකර ඔවුන් වරදක් සිදුකර ඇත්නම් විනයානූකූල පියවර ගන්නා ලෙස පූජිත් ජයසුන්දර මහතා උතුරු මැද පළාත භාර ජ්‍යෙෂ්ඨ නියෝජ්‍යය පොලිස්පතිවරයාට නියෝග කර තිබේ.
එප්පාවල නල්ලමුදාව ශ්‍රී ශෛලබිම්බාරාම රාජ මහා විහාරස්ථානයේ විහාරාධිපතීත්තවය සම්බන්ධයෙන් ඇතිවූ ගැටලුවක් මුල් කර ගනිමින් ගම්වාසී කාන්තාවන් පිරිසක් පසුගිය (28) වනදා පස්වරුවේ විරෝධය පළකිරීමත් සමගින් ඇතිවූ උණුසුම්කාරී තත්වය පාලනය කිරීමට එප්පාවල පොලිසියේ නිලධාරීන් මැදිහත්වී තිබුණි. එහිදී කාන්තාවන් හා පොලිස් නිලධාරීන් අතර උණුසුම්කාරී තත්වයක් ඇතිවූ අතර පොලිස් නිලධාරින් පිරිසක් පොලු රැගෙන ඇවිත් කාන්තාවන්ට පරුෂ වචනයෙන් බැණ වැදී පහරදුන් අයුරු මාධ්‍ය මගින් ප්‍රචාරය වීමත් සමගින් පොලිස් නිලධාරීන්ට එරෙහිව පරීක්ෂණ ආරම්භ විය.
අදාළ සිද්ධියේදී විරෝධතාවයේ නිරත වූ කාන්තාවන් තිදෙනෙකු හා පිරිමි පුද්ගලයකු පොලිස් අත්අඩංගුවට ගත් අතර, අත්අඩංගුවට ගත් පුද්ගලයන් සිව්දෙනා අයුතු ජන රාශියක නිරතවීම හා පොලිස් නිලධාරින්ගේ රාජකාරීයට බාධා කිරීමේ චෝදනා යටතේ ඊයේ (29) පස්වරුවේ තඹුත්තේගම මහේස්ත්‍රාත් රමිලා නදීශානී මහත්මිය හමුවට ඉදිරිපත් කළ අතර එහිදී එක් සැකකරුවකුට රුපියල් ලක්ෂය බැගින් වූ ශරීර ඇප මත සැකකරුවන් සිවු දෙනා මුදා හැරීමට නියෝගකර තිබුණාය.
ඇප ලබා ගැනීමෙන් අනතුරුව තුවාල ලැබූ කාන්තාවන් දෙදෙනකු විරෝධතාවය අතරතුරදී පොලිස් නිලධාරීන්ගේ පහර කෑමට ලක්වීම නිසා ශරීරයේ තැලීම් පවතින බව පවසමින් අනුරාධපුර ශික්ෂණ රෝහලට ඇතුළත්වූ අතර කාන්තාවන් දෙදෙනා අනුරාධපුර ශික්ෂණ රෝහලේ මහාචාර්ය ඒකකයේ 67 වාට්ටුවේ නේවාසිකව ප්‍රතිකාර ලබයි. ඒ අතර වැඩ තහනමට ලක්වූ පොලිස් නිලධාරියාගේ පහර කෑමට ලක්වූ කාන්තාවක අනුරාධපුර රෝහලේ නේවාසිකව ප්‍රතිකාර ලබයි.
කැබිතිගොල්ලෑව සහකාර පොලිස් අධිකාරී සේනක ජයසිංහ මහතා විසින් අනුරාධපුර ශික්ෂණ රෝහලේ ප්‍රතිකාර ලබන කාන්තාවන් දෙදෙනාගෙන් ප්‍රකාශ සටහන් කර ගෙන ඇති අතර, ගම්වාසීන්ගෙන් හා විහාරස්ථානයේ නායක ස්වාමීන් වහන්සේගෙන් හා තාවකාලිකව විහාරස්ථානයේ වැඩවාසය කළ ස්වාමීන් වහන්සේගෙන්ද ප්‍රකාශ සටහන් කර ගැනීමට නියමිත බව සහකාර පොලිස් අධිකාරීවරයා පැවසීය.
0 Comments