ශ්‍රී ලංකා ක්‍රිකට් කණ්ඩායම වසර 6කට පසුව ඔස්ට්‍රේලියාවේ ටෙස්ට් තරග සංචාරයක නිරතවීමට නියමිතය. ලබන ජනවාරි මාසයේදී ඇරැඹෙන මේ ටෙස්ට් තරගමාලාවේ බ්‍රිස්බේන් නුවර පළමු ටෙස්ට් තරගය පැවැත්වෙන්නේ දිවා රාත්‍රී තරගයක් ලෙසිිනි. එය ඔස්ට්‍රේලියාවේදී ශ්‍රී ලංකා පිල ක්‍රීඩා කරන පළමු දිවා රාත්‍රී ටෙස්ට් තරගය ලෙස වාර්තාපොතට එක්වෙයි.
ලබන වසරේ ජනවාරි මස 24 සිට 28 දක්වා බ්‍රිස්බේන් නුවර ගැබා ක්‍රිකට් ක්‍රීඩාංගණයේදී පළමු ටෙස්ට් තරගය පැවැත්වෙන අතර දෙවැනි ටෙස්ට් තරගය පෙබරවාරි මස 1 සිට 5 දක්වා කැන්බරා නුවරදී පැවැත්වෙයි.
පසුගිය වසරේ සැප්තැම්බර් මාසයේදී එක්සත් අරාබි එමීර් රාජ්‍යයේ ඩුබායි නුවරදී පාකිස්තාන පිල සමග පළමු වරට දිවා රාත්‍රී ටෙස්ට් තරගයකට ක්‍රීඩා කළ ශ්‍රී ලංකා පිල මේ වසරේ ජූනි මාසයේ බටහිර ඉන්දීය කොදෙව් දූපත් සංචාරයේදී සිය දෙවැනි දිවා රාත්‍රී ටෙස්ට් තරගයට සහභාගි වෙයි. බ්‍රිස්බේන් නුවර පැවැත්වීමට නියමිත ටෙස්ට් තරගය ශ්‍රී ලංකා පිල ක්‍රීඩා කරන තුන්වැනි දිවා රාත්‍රී ටෙස්ට් තරගය ලෙස වාර්තාපොතට එක්වනු ඇත.
ඔස්ට්‍රේලියා ක්‍රිකට් ආයතනය ඊයේ නිකුත් කළ ඔවුන්ගේ වසර 2018-2019 ගිම්හාන සෘතුවේ තරග කාලසටහනට අනුව ශ්‍රී ලංකා පිලට ජනවාරි මාසයේදී දිවා රාත්‍රී ටෙස්ට් තරගයකට ක්‍රීඩා කිරීම නිවේදනය කෙරිණි. ඉන්දීය පිල ටෙස්ට් තරග 4කින් සමන්විත තරගමාලාවකට සහ එක්දින තරගාවලියකට සහභාගී විමට ලබන නොවැම්බර් මාසයේදී ඔස්ට්‍රේලියාවේ සංචාරයක නිරත වෙයි.
ඇඩිලේඩ්, පර්ත්, මෙල්බර්න් සහ සිඩ්නි නගරවලදී ඔස්ට්‍රේලියාව සහ ඉන්දියාව අතර ටෙස්ට් තරග පැවැත්වීමට නියමිත අතර ඇඩිලේඩ් නුවර පැවැත්වෙන දෙපිල අතර පළමු ටෙස්ට් තරගය දිවා රාත්‍රී තරගයක් ලෙස පැවැත්වීමට ඔස්ට්‍රේලියා ක්‍රිකට් ආයතනය සැලසුම් කර තිබිණි. එහෙත් එම ටෙස්ට් තරගමාලාවේදී දිවා රාත්‍රී තරගයකට එක්වීම ඉන්දියාව මෙතෙක් තහවුරු කර නොමැත.
ඊට පෙර දකුණු අප්‍රිකානු පිලේ ඔස්ට්‍රේලියා සංචාරයේදී ද දිවා රාත්‍රී ටෙස්ට් තරගයක් නොමැති අතර බ්‍රිස්බේන් නුවර කිසිදු තරගයක් සූදානම් කර නොමැත. මෙවර ඔස්ට්‍රේලියා ක්‍රිකට් තරගවාරයේදී බ්‍රිස්බේන් නුවර පැවැත්වීමට නියමිතව ඇත්තේ නොවැම්බර් 21දා ඉන්දියාව සහ ඔස්ට්‍රේලියාව අතර පළමු විස්සයි20 තරගය පමණි. ඒ අනුව ශ්‍රී ලංකා පිල සමග බ්‍රිස්බේන් නුවර පැවැත්වීමට නියමිත දිවා රාත්‍රී ටෙස්ට් තරගය වැඩි අවධානයක් දිනාගනු ඇත.
අවසන් වරට 2012 වසර අගභාගයේදී ඔස්ට්‍රේලියාවේ සංචාරය කළ මහේල ජයවර්ධනගේ නායකත්වයෙන් යුතු ශ්‍රී ලංකා පිල තරග 3-0කින් පරාජය කිරීමට මයිකල් ක්ලාක්ගේ නායකත්වයෙන් යුතු ඔස්ට්‍රේලියානු පිල සමත්විය.
0 Comments