ගංගාරාමාධිපති ගල්බොඩ ඥාණිස්සර මහ නාහිමියන්ගේ උපදේශකත්වයෙන් අග්‍රාමාත්‍ය රනිල් වික්‍රමසිංහ මහතා විසින් බුද්ධරශ්මි ජාතික වෙසක් මංගල්‍ය ඊයේ (29) පස්වරුවේ විවෘත කරනු ලැබීය.
කොළඹ ගංගාරාම විහාරස්ථානයේ සිට දර්ශණිය පෙරහරකින් මහා සංඝරත්නය පෙරටුකර ගනිමින් ගංගාරාම විහාරස්ථානයේ සිමා මාලකය වෙත පැමිණි අගමැතිවරයා ඇතුළු පිරිස පළමුව බුදුන්ට මල් පහන් පුදා පංචශීලය සමාදන් වීමෙන් අනතුරුව බුද්ධරශ්මි වෙසක් කලාපය විවෘත කරණු ලැබීය. ඉන් අනතුරුව සිමා මාලකයේ සිට දර්ශණීය මල්වෙඩි සංදර්නයක්ද බේරේ වැවේ නාවික යාත්‍රාවල සිටිමින් නාවික හමුදාව ඉදිරිපත් කළ වෙසක් බැති ගී සංදර්ශනයද අගමැතිවරයා විසින් නරඹන ලදී. ගංගාරාම විහාරස්ථානය සහ අරලිගහ මන්දිරය එක්ව සංවිධානය කරණු ලබන බුද්ධරශ්මි වෙසක් කලාපය ලබන මැයි 02 දින දක්වා පැවැත්වේ. කොළඹ හුණුපිටිය ගංගාරාමය සහ අරලියගහ මන්දිරය ආශ්‍රිත පැවැත්වෙන මේ වෙසක් කලාපයේ සර්වඥ ධාතු ප්‍රදර්ශනය, වෙසක් තොරන්, පහන් කූඩු, දන්සල්, වෙසක් බැති ගී, බෞද්ධ ඉතිහාසය විදහා දැක්වෙන ජායාරූප,ආදිය ජනතාවට දැකබලා ගත හැක.
කොළඹ ගංගාරාම විහාරාධිපති ගලබොඩ ඥාණීස්සර මහ නාහිමි-
ගිය අවුරුද්දේ ඉන්දියාවේ අග්‍රාමාත්‍යතුමා බුද්ධරශ්මි වෙසක් වැඩසටහන විවෘත කළා. අපේ ජනතාව විවිධ ස්ථානවල ඉතා හොඳින් හැසිරෙන්න ඕනේ. රටේ නායකයන්ගේ සිට සෑම දෙනා තුළම තැන්පත් කම සංවරකම විනය අප රැක ගත යුතුයි. විනයක් නැතිව කරන වැඩසටහන් තේරුමක් නැහැ. මෙවැනි වැඩසටහන් නිසා අපට සතුට, ප්‍රීතිය ඇති වෙනවා.
අතීතයේ දී ආර්.ප්‍රේමදාස අග්‍රාමාත්‍යතුමා දවසක් මට මතක් කළා කොළඹ නගරයේ එකම පෙරහරක්වත් නැති බව. එතුමාගේ ආරාධනයෙන් 1979දී එක දිනෙක පෙරහරක් ආරම්භ වුණා. එදා ධාරානිපාත වැසි තිබුණාට අවශ්‍ය වේලාවට නතර වුණා. එම වැස්ස නිසා පෙරහර දෙකක් කළා. ඉන් පසුව ත්‍රස්තවාදය මත මේ රටේ බොහෝ පෙරහර ක්‍රියා විරහිත වුණා. නමුත් අප නවම් පෙරහර පවත්වාගෙන ගියා. එදා මහ බැංකුවට ත්‍රස්තවාදීන් පහර දුන්නා. අප ඒ අවස්ථවේ පෙරහර සඳහා ලැබුණු ආධාර විපතට පත්වූවන්ට පරිත්‍යාග කරන්න තීරණය කළා.
තරුණ කටයුතු ඇමැති ලෙසද එදා රනිල් වික්‍රමසිංහ මහතා එතුමාගේ කාර්ය භාරයක් ලෙස නවම් පෙරහර පැවැත්වීමට සහයෝගය ලබා දුන්නා. සිරගෙදර සිටින සිරකරුවන් සහ විවිද පුද්ගලයන් මෙහි අපේ පෙරහරේ කොඩි සේසත් ගෙනයාමට සහභාගි වූණා. ආනන්ද, නාදලන්ද, රාජකීය විද්‍යාලවල දරුවන්ද පෙරහරේ කොඩි සේසත් රැගෙන ගියා. මේක විප්ලවයක්. පසුව ත්‍රස්තවාදී ප්‍රශ්න නිසා දෙමාපියො දරුවො එව්වේ නැහැ. නමුත් නවම් පෙරහර අවුරුදු තිස් නවයක් පැවැත්වූවා. ඒ නිසා නවම් මාවත පෙරහර මාවත ඇතිවුණා. ප්‍රදේශය අලංකාර වුණා. අද කොළඹ නගරයේ ඉතාම දර්ශණීය භූමි භාගයක් ලෙස මේ බේරේ වැව ප්‍රදේශය අලංකාර වී තිබෙනවා. පෙර පැවැතියේ බේරේ වැව අශ්‍රිතව පැවැතියේ බොහොම පිරිහිච්ච පරිසරයක්.
බෞද්ධ සම්මේලනය මුල් වෙලා බෞද්ධාලෝක මාවතේ වෙසක් සැරසිලි ආරම්භ කළා. කොළඹ නගර සභාව, ලේක්හවුස් ආයතනය, වරාය සහ විවිද ආයතන වෙසක් දිනට වෙසක් සැරසිලි කරනවා. ඒ පිළිබඳව අප ආඩම්බර විය යුතුයි. ටයර් ගෙවෙනවා වගේම හුලං බහිනවා වගේම බොහෝ දේවල් වෙනස් වෙමින් යනවා. එවන් අවස්ථාවක එදා සිටි ජනාධිපතිවරයකු වූ මහින්ද රාජපක්ෂ මහතා මට මතක් කළා වෙසක් එකට මේ පැත්ත අන්දකාරයි, කොළඹ නගරයේ තිබූ වෙසක් කලාප පිරිහිලා තිබෙනවා.අරලියගහ මන්දිරය මුල්කරගෙන මේ පැත්තෙ යමක් කළ යුතු බව කීවා. මම ඒ කාර්ය භාරය අපේ අස්සජි හාමුදුරුවන්ට පැවරුවා. උන්වහන්සේ සහ අනෙකුත් හාමුදුරුවරුන් රාජ්‍ය තන්ත්‍රයේ සහ දායක දායිකවන්ගේ සහයෝගය ඇතිව මේ සත්කාරය ආරම්භ කර පවත්වාගෙන ගියා. වත්මන් රජය පැමිණි පසුද බුද්ධරශ්මි වැඩසටහන ක්‍රියාත්මක වනවා.
මෙවැනි කටයුතු කරන විට මුලින් ඉදිරිපත් වු මිනිස්සු කලක් යන විට නැතිව යනවා. අග්‍රාමාත්‍යතුමනි, නවම් පෙරහරනම් අප කෙසේ හෝ කරගෙන යනවා. නමුත් අප කනගාටුවෙනවා සමහර රාජ්‍ය ආයතන මේ කටයුත්තේ රැස්විම්වලට පැමිණියේ නැහැ. ඒ වගේම මෙයට සහයෝගය දැක්වූ අන්දම පිළිබඳව අප කනගාටු වෙනවා. නමුත් ගංගාරාමයේ දායකයො ශක්තිමත්. ඔවුන් කෙසේ හෝ මෙවැනි උත්සව සිදුකරනවා. දයා ගමගේ ඇමැතිතුමා අපට සහයෝගය ලබා දෙනවා. ඒ නිසා වෙසක් කලාපය කරගැනීමට හැකිවී තිබෙනවා.
පසුගිය කාලයේ හිටපු ජනාධිපතිවරයාගේ නියෝගය අනුව රජයේ ආයතන මෙවැනි උත්සව සඳහා අපට සහයෝගය ලබා දුන්නා. වත්මන් රජයේ ජනාධිපතිතුමාගේ අගමැතිතුමාගේ උපදෙස් අනුව අද කටයුතු කරනවා. හැබැයි සමහර රාජ්‍ය ආයතන රජයක් තිබෙනවාද, රජයේ පාලකයො කවුද කියා අමතක කර තිබෙන බව පෙනෙනවා. මේක අපට ප්‍රශ්නයක් නොවේ. නමුත් පටන් ගත් දෙයක් කඩාකප්පල් කිරීම ඇනහිටවීමට උත්සාහ කිරිම ඉතාම කනගාටුදායක දෙයක්.
නමුත් මේ වෙසක් කලාපය සාර්ථකව ක්‍රියාත්මක වෙනවා. ත්‍රිවිද හමුදාව, පොලීසිය, සිවිල් ආරක්ෂක බළකාය, මේ සඳහා දක්වපු සහාය පිළිබඳව අප ස්තුතිය පුද කරනවා. දිවා රාත්‍රීයේ ආහාර වේල පිළිබඳව නොසිතමින් මෙය සාර්ථක කර ගැනීමට ක්‍රියා කළා. ජනාධිපතිතුමා මේ අවස්ථාවට සහභාගි වීමට සිටියත් පසුව දැනුම් දුන්නා අරලියගහ මන්දිරයේ සර්වඥ ධාතු ප්‍රදර්ශනය ආරම්භ කිරීමට සහභාගි වන බව. පකිස්ථානයේ , ඉන්දියාවේ වැඩ සිටි සර්වඥ ධාතූන් වහන්සේලා ජනතාවට එහිදී දැක බලා ගත හැකියි. ඉන්දියාවේ සාරානාත් විහාරස්ථානයේ නායක හාමුදුරුවන් වහන්සේ ඇතුළු මේ අවස්ථාවට සහභාගිවන මහා සංඝරත්නය, ඩී.එම්. ස්වාමිනාදන්, ෆයිසර් මුස්තාපා, දායා ගමගේ ඇමැතිවරුන්, අග්‍රාමාත්‍ය ලේකම්තුමා, රජයේ නිලධාරීන්, තානාපති අංශ, ආරක්ෂක අංශ ප්‍රධානීන්, විදෙස් නියෝජිතයන්, ගංගාරාම විහාරස්ථානයේ දායක සභාවේ මහත්ම මහත්මීන් මේ අවස්ථාවට සහභාගි වනවා.
බුද්ධ ශාසන ඇමැති ගාමිණී ජයවික්‍රම පෙරේරා මහතා -
ගංගාරාමයේ නායක හිමියන් සිදුකරන සමාජ සේවය ඉතා විශාලයි. මෙම බුද්ධරශ්මි වැඩසටහන අප ඉතා අඟය කළ යුතුයි. විදෙස්වලින් සොයා ගත් සර්වඥ ධාතුන් වහන්සේලා අප රටට වැඩම කර ජනතාවට වැඳපුදා ගැනීමට සැළැස්වීම ඉතා වටිනවා. බුදු දහම තුළින් සංහිදියාව ඇතිකළ හැකියි. ථේරවාදී ධර්මය ආරක්ෂා කර ලොව පුරා ප්‍රචාරය කිරීමට අප කටයුතු කළ යුතුයි. අපට එය ඉෂ්ඨ කළ හැකියි. ඉන්දියාව සහ පාකිස්ථානයේ සිට සර්වඥ ධාතූන් වහන්සේලා වැඩම කිරීමට අග්‍රාමාත්‍යතුමා කළ සේවය විශිෂ්ටයි.
ඡායාරූප- හිරන්ත ගුණතිලක
0 Comments