ගංගාරාම විහාරවාසී මහනුවර මංගල හිමියෝ පවසති
බෞද්ධ පින්වතුන් ලෙස උතුම් වූ බුදුරජාණන් වහන්සේට සිදු කරන ගෞරවයක් ලෙස ලේක්හවුස් ආයතනය වාර්ෂිකව පවත්වනු ලබන අමාදහර වෙසක් කලාපය නම් කළ හැකි බව ගංගාරාම විහාරවාසී මහනුවර මංගල හිමියෝ පවසති.
උන්වහන්සේ මේ බව කියා සිටියේ ඊයේ(29) ලේක්හවුස් ආයතනය සංවිධාන කළ ලේක්හවුස් අමාදහර ප්‍රකට ගායක ගායිකාවන්ගේ සහභාගිත්වයෙන් අමාදහර බොදු බැති ගී සරණීය සහ මහා බත් දන්සල ආරම්භ කිරීමට පූර්වයෙන් අනුශාසනාවක් පවත්වමිණි.
අමාදහර වෙසක් කලාපය මෙවර ප්‍රථම වතාවට බත් දන්සැලක් ද සංවිධාන කර තිබිණ. දීර්ඝ කාලයක් පුරා සිදු කරන කොත්තමල්ලි දන්සැල මෙවරද පැවැත්විණි.
අමාදහර වෙසක් කලාපය වෙනුවෙන් ලේකහවුස් ආයතනය පාසල් ශිෂ්‍ය ශිෂ්‍යාවන් මුල් කරගනිමින් පැවැත්වූ චිත්‍ර තරගයේ ජයග්‍රාහී චිත්‍ර ද මෙහිදී ප්‍රදර්ශනය කර තිබිණ.
එම අවස්ථාවේදී උන්වහන්සේ මෙසේද කියා සිටියේය.
අද දිනය බෞද්ධ පින්වතුන්ට උදාර දිනයක්. බුදුරජාණන්වහන්සේගේ තෙමගුල් උත්සවය සමරමින් බෞද්ධ පින්වතුන් විවිධ පින්කම් සංවිධාන කර තිබෙනවා. පත්තර මහගෙදර ආමිස පූජාවක් ලෙස ඉමහත් ශ්‍රද්ධාවෙන් මේ කටයුත්ත සංවිධාන කර තිබෙනවා. ලේක්හවුස් ආයතනයේ වත්මන් සභාපති ක්‍රිෂාන්ත කුරේ මහතා ඇතුළු අධ්‍යක්ෂ මණ්ඩලය මෙන්ම මේ කටයුත්ත සංවිධාන කරමින් ක්‍රියා කරන මේ ආයතනයේ නිලධාරීන් මේ උදාර කටයුත්ත ඉතා උත්කර්ෂවත් අයුරින් වාර්ෂිකව සංවිධාන කරනු ලබනවා. මේ කටයුතු සිදු කරන්නේ බුදුන්වහන්සේගේ උතුම් වූ තෙමගුල සිහිපත් කරමින්. මෙවන් වූ උතුම් වූ පින්කම් පවත්වමින් කටුයුතු සිදු කිරීම අගය කළ යුතුයි.
ලේක්හවුස් ආයතනය 1982 වසරේ වෙසක් කලාපය ආරම්භ කළ අතර 2002 වසරේ අමාදහර වෙසක් කලාපය ආරම්භ කළහ. අමාදහර බොදු බැති ගී සරණියට එක් වූ ප්‍රවීණ ගායක ඊෂාක් බෙග් ඉන්ද්‍රාණී විජේබණ්ඩාර, සමීර සෙනරත්, සධානා රණතුංග, ශාරද රණතුංග, මායා දමයන්ති පෙරේරා, සූරිය කුමාර මුත්තලගේ, සදුන් විජේසිංහ යන ගායක ගායිකාවන් බොදු බැති ගී ගායනා කළ අතර ශ්‍රී ලංකා නාවික හමුදා බටහිර තූර්යවාදක කණ්ඩායම සංගීතය සැපයූහ. රේඩියෝ දිනමිණ ප්‍රධානි වසන්ත ජයසිංහආරච්චි මහතා නිවේදනයෙන් එක්විය.
මේ අවස්ථාවට ලේක්හවුස් ආයතනයේ මුල්‍ය අධ්‍යක්ෂවරුන් වන දුෂ්‍යන්ත බස්නායක, උමා රාජමන්ත්‍රි, සමාගම් ලේකම් කුමුදු ගුණවර්ධන, සාමාන්‍යාධිකාරි අභය අමරදාස, නියෝජ්‍ය සාමාන්‍යාධිකාරිවරුන් වන නාරද සුමනරත්න, සුභාෂ් කරුණාරත්න, ගාමිණී නුකුලසූරිය, රසන්ත චන්ද්‍රතිලක, විරාජිත් බොයිස්, වරුණ මල්ලවාරච්චි, ජ්‍යේෂඨ කළමනාකරු චන්ද්‍රලාල්, පරිපාලන කළමනාකරු නාමල් පීරිස්, දිනමිණ කර්තෘ පුෂ්පා රොවෙල්, බෞද්ධ සංගමයේ සභාපති බුදුසරණ උපදේශක කර්තෘ සීසර් සුදුසිංහ, ලේකම් ප්‍රියන්ත කුමුදුසිරි, භාණ්ඩාගාරික ප්‍රියන්ත විජේසූරිය, බුදුසරණ කර්තෘ රමණී සුබසිංහ, දිනමිණ ප්‍රවෘත්ති කර්තෘ ශිරෝමි අභයසිංහ මහත්ම මහත්මින් ඇතුළු කර්තෘවරුන් මෙන්ම නිලධාරින් විශාල පිරිසක් එක්ව සිටියහ.
ඡායාරූප-සමන් ශ්‍රී වෙදගේ
0 Comments