ශ්‍රී ලංකා යුද හමුදා ගජබා රෙජිමේන්තුවේ සේවයේ නියුතු යුද හමුදා, ජාතික මට්ටමේ සහ ජාත්‍යන්තර මට්ටමේ ක්‍රීඩකයන් මෙන්ම රණක්ෂිතයට පත් ආබාධිත ක්‍රීඩකයන් ඇතුළු රෙජිමේන්තුවට මෙන්ම යුද හමුදාවටම කීර්තියක් අත්කරදුන් ගජබා රෙජිමේන්තුවේ ක්‍රීඩකයන් අගයමින් දෙවැනි වරටත් ගජබා රෙජිමේන්තුව විසින් වර්ණ සම්මාන උළෙලක් පසගියදා කොළඹ බිෂොප් විද්‍යාලයීය ශ්‍රවණාගාරයේ පැවැත්විණි.
එහිදී වර්ණලාභීන් 101 දෙනෙකු සඳහා වර්ණ ප්‍රදානය කිරීම සිදු කෙරිණි.
මේ වර්ණ රාත්‍රිය අවසන් අධියරේදී ජාතික හා ජාත්‍යන්තර මට්ටමේ ක්‍රීඩා ක්‍ෂේත්‍රයන්හි දක්ෂතාවයන් දැක්වු ක්‍රීඩකයන් සඳහා යුද හමුදාපති ලුතිතන් ජෙනරල් මහේෂ් සේනානායක මහතා විසින් රිදී කෙටේරි සම්මානයන් ප්‍රදානය කරන ලදි.
ගජබා රෙජිමේන්තු අධිපති මේජර් ජෙනරල් ශවේන්ද්‍ර සිල්වා මහතාගේ ආරාධනයට අනුව ශ්‍රී ලංකා යුද හමුදාපති ලුතිතන් ජෙනරල් මහේෂ් සේනානායක මහතා ප්‍රධාන ආරාධිතයා ලෙස එක්වූ මේ අවස්ථාවට ශ්‍රී ලංකා යුද හමුදා සේවා වනිතා ශාඛාවේ සභාපතිණී චන්ද්‍රිකා සේනානායක මහත්මියද එක්විය. හිටපු ටෙස්ට් සහ එක්දින ක්‍රිකට් නායක මහේල ජයවර්ධන මහතා ගෞරවණීය ආරාධිතයා මේ අවස්ථාවට සහභාගී විය.
ගජබා රෙජිමේන්තුවේ රෙජිමේන්තු අධිපති ධුරය හෙබවු විශ්‍රාමික ජ්‍යෙෂ්ඨ නිලධාරීන්, ශ්‍රී ලංකා යුධ හමුදාව නියෝජනය කරමින් ජ්‍යෙෂ්ඨ නිලධාරීන්, ගජබා රෙජිමේන්තු මන්ත්‍රණ සභාව නියෝජනය කරන ජ්‍යෙෂ්ඨ නිලධාරීන්, ඒකක අණදෙන නිලධාරී මෙන්ම රෙජිමේන්තු සැරයන් මේජර් සහ වර්ණලාභී පවුල්වල සාමාජිකයන් ද විශාල ප්‍රමාණයක් මෙම අවස්ථාව සඳහා සහභාගී වුහ.
0 Comments