රෝගී පොකුරු මතුවන ග්රාම නිලධාරි කොට්ඨාස හෝ හුදෙකලා කිරීමට සෞඛ්ය බලධාරීන් වහාම පියවර ගත යුතුයි
කොවිඩ් _ 19 වයිරසය පිළිබඳ අනාවැකි කිය කියා නොසිට හරි වේලාවට හරි දේ ක්රියාත්මක නොකළොත් රටම අනතුරට පත්වීම කිසිසේත්ම වැළැක්විය නොහැකි යැයි රජයේ වෛද්ය නිලධාරීන්ගේ සංගමය පෙන්වා දෙයි.
මාතලේ ප්රදේශයෙන් කොරෝනා ආසාදිතයන් හය දෙනකු ඊයේ (28දා) වාර්තා වී ඇති අතර රටේ විවිධ ප්රදේශවල රෝගීන් පොකුරු මතුවෙමින් පවතින තත්ත්වයක් නිර්මාණය වෙමින් පවතින බැවින් එසේ රෝගීන් වාර්තා වන ප්රදේශවල අඩු තරමින් රෝගී පොකුරු මතුවන ග්රාම නිලධාරි කොට්ඨාස හෝ හුදෙකලා කිරීමට සෞඛ්ය බලධාරීන් වහාම පියවර ගතයුතුව ඇතැයි රජයේ වෛද්ය නිලධාරීන්ගේ සංගමයේ ලේකම් වෛද්ය හරිත අලුත්ගේ මහතා අවධාරණය කරයි.
පවතින තත්ත්වය යටතේ මසකට පී.සී.ආර්. පරීක්ෂණ 68,000ක් කළ යුතු බවට වසංගත රෝග විද්යායතනය සෞඛ්ය බලධාරීන් වෙත දී ඇති වාර්තාවක සඳහන් වන අතර ඒ අනුව දැනට වඩා වැඩි ප්රමාණයක් පරීක්ෂණ පැවැත්විය යුතු බව සඳහන් කරන වෛද්ය අලුත්ගේ, මේ වන විට පී.සී.ආර්. පරීක්ෂණ ඉහළ මට්ටමකට පත්කර ඇති බවද පෙන්වා දෙයි.
කොරෝනා අවදානම පවතින ප්රදේශවල එම අවදානම තක්සේරු කර ඒ අනුව එම ප්රදේශ හුදෙකලා කර, එම ප්රදේශවලට පමණක් ඇඳිරි නීතිය පනවා එම ඇඳිරි නීතිය දැඩිව ක්රියාත්මක කිරීමට බලධාරීන් වගබලාගත යුතුව ඇතැයිද වෛද හරිත අලුත්ගේ සඳහන් කරයි.
දිනපතාම තත්ත්වය සමාලෝචනය කර දැනට කොරෝනා වයිරසයට ගොදුරුවී සිටින හමුදා භටයන් සමඟ ළඟින් ඇසුරු කර ඇති පිරිස් හඳුනාගෙන එම පිරිස් ආගිය තැන් හා ඇසුරු කළ පිරිස් පිළිබඳව ඒ ඒ ප්රදේශවල සෞඛ්ය වෛද්ය නිලධාරීන් වෙත සියලු තොරතුරු දීමට කටයුතු කරන ලෙසද වෛද්ය අලුත්ගේ ඉල්ලීමක් කරයි.
රෝගීන් වාර්තා වන ප්රදේශවල ජනතාවට ඒ පිළිබඳ සියලු තොරතුරු අනාවරණය කර නිවැරැදි චිත්රය පෙන්වීමෙන් ජනතාව රෝගයෙන් බේරීම සඳහා සියලු ආරක්ෂක ක්රම අනුගමනය කිරීමට පටන්ගන්නා බව සඳහන් කරන වෛද්ය හරිත අලුත්ගේ, මේ වන විට කොවිඩ් _ 19 වයිරසය ශීඝ්රයෙන් රට තුළ පැතිර යන තත්ත්වය යටතේ සති තුනක් ආපස්සට ගොස් ඇති බවද පෙන්වා දෙයි.
– mawbima
0 Comments