අංකුඹුරේ පේමවංශ හිමි
රට දෙකඩ වීමට ඔන්න මෙන්න කියා තිබියදී ජනපතිතුමන්ගේ හා අගමැතිතුමන්ගේ සම්ප්‍රාප්තිය රටේත්,ජාතියේත්,සම්බුද්ධ ශාසනයේත් වාසනාවකට සිදුවූ දෙයක් යැයි ශ්‍රී ලංකා රාමඥ්ඥ මහා නිකායේ සංඥා ලේඛකාධිකාරී අංකුඹුරේ පේමවංශ හිමියෝ පැවසූහ.
රටට අහිතකර විවිධ ගිවිසුම් මෙන්ම ව්‍යවස්ථාවෙන් රට බෙදා වෙන් කැර දීමට යමින් සිටියදී ජනතාව එයට එරෙහිව රට වෙනුවෙන් නිවැරැදිම තීන්දුව ගෙන ඇතැයිද උන් වහන්සේ කීහ.
අග්‍රාමාත්‍ය මහින්ද රාජපක්ෂ මහතා ඊයේ (24) පෙරවරුවේ ශ්‍රී ලංකා රාමාඥ්ඥ මහා නිකායේ මහා නායක අති පූජ්‍ය නාපාන පේමසිරි හිමියන් බැහැදුටු අවස්ථාවේ ලේඛකාධිකාරි හිමියන් මේ බැව් පැවසූහ.
මැණික්හින්න හුරීකඩුව විද්‍යාසාගර පිරිවෙණ් විහාරස්ථානයේදී අග්‍රාමාත්‍යතුමන් මහා නාහාමියන් බැහැදැකීය.
මහා නාහිමියන් ප්‍රමුඛ මහා සංඝරත්නය මෙහිදී අගමැතිවරයාට සෙත්පිරිත් සජ්ජායනා කරමින් අශිර්වාද කළහ. ජනපති පත්වීමෙන් පසු රට සබෑම නිවැරැදි මාවතට යොමුවෙමින් පවතින බැව් පෙනෙන බවත් සැබෑ යහපාලනය එය වන්නේ යැයිද කලින් පැවැතියේ යහපාලනයක් නොව යම පාලනයක් යැයිද ලේඛකාධිකාරි හිමියෝ කීහ. ගෝඨාභය රාජපක්ෂ මහතා ජනපතිවීම මෙන්ම මහින්ද රාජපක්ෂ මහතා අගමැති වීම මෙරට ඉතිහාසයේ වැදගත්ම සන්ධිස්ථානයක් වනු ඇති බවද එය රටෙහි මෙන්ම ජාතියේ වාසනාවට සිදුවුවක් යැයිද නාහිමියෝ පැවසූහ.
රටට ජාතියට සම්බුද්ධ ශාසනයට ව්‍යසනයන් සිදුවන විට සුදුසු ජාති හිතෛෂීන් ,දේශ හිතෛෂීන් විවිධ අවස්ථාවල රටෙහි බිහිවූ බවත් එදා ඇතැම් රජවරුන් මෙන්ම ධර්මපාල වැනි පිරිස් බිහිවූයේද මෙවැනි තත්ත්වයන් තුළ බවත් උන් වහන්සේ කීහ.
1915 න් පසු කඩා වැටුණු සිංහල බෞද්ධ පදනමට යළි නව පණක් ලැබුණා සේ දැනෙන බවද මෙය සමස්ත ජාතියම ලැබූ ජයක් යැයිද පේමවංශ හිමියෝ පැවසූහ.
ශ්‍රී ලංකීය ජාතියක් ලෙස සියලු ජනතාව සිතිය යුතු බවත් එය මේ මොහොතේ නිවැරැදිව කළහොත් යළි කිසිදා පඵදු නොවන ලෙස ජාතිය සමගිකර ගොඩනැන්විය හැකි බවත් උන්වහන්සේ පැවසූහ.
පාර්ලිමේන්තු මන්ත්‍රී ලොහාන් රත්වත්තේ මහතා ඇතුඵ පිරිසක් මේ අවස්ථාවට එක්වූහ.
ඉන්දික පොල්කොටුව සහ අසේල කුරුඵවංශ
0 Comments