රුහුණු සරසවි ක්‍රීඩාංගණයේ දී ඇරැඹීමට සියල්ල සූදානම්
පිරිපුන් මිනිසකු සමාජයට දායාද කරන්නට අධ්‍යාපනය වැදගත් වන්නාසේම කායික හා මානසික ඒගාග්‍රතාව වර්ධනය වන ශාරීරික අධ්‍යාපනය ද ඉතා වැදගත් කාර්ය භාරයක් ඉටු කරනු ලබයි. උත්තරීතර පරමාර්ථ රැසක් සාක්ෂාත් කර ගැනීමේ අදිටනින් විශ්වවිද්‍යාල ක්‍රීඩා උළෙල 1942 දී ආරම්භ විය.
පේරාදෙණිය විශ්වවිශ්වවිද්‍යාලයේ ශාරීරික අධ්‍යාපන ඒකකයේ එවකට අධ්‍යක්ෂවරයා ලෙස කටයුතු කළ ජාතික මට්ටමේ ප්‍රවීණ ක්‍රීඩක ලෙස්ලි හඳුන්ගේ මහතා ඒ සඳහා මූලිකත්වය ගෙන තිබුණි. ඒ අනුව පළමු විශ්වවිද්‍යාලයීය ක්‍රීඩා තරගාවලිය ඔලිම්පික් ක්‍රීඩා තරගාවලියේ සම්ප්‍රදායන් සහ එහි ප්‍රමිතීන්ට අනුගත වෙමින් පේරාදෙණිය විශ්වවිද්‍යාලයේ සත්කාරකත්වයෙන් ආරම්භ විය. එතැන් සිට නොකඩවා වසර තුනකට වරක් මේ ක්‍රීඩා උළෙල ශ්‍රී ලංකා විශ්වවිද්‍යාල ක්‍රීඩා සංගමයේ සාමාජිකත්වය දරන රාජ්‍ය විශ්වවිද්‍යාලයක සත්කාරකත්වයෙන් පවත්වනු ලැබේ.
13වැනි වරට පැවැත්වෙන විශ්වවිද්‍යාල ක්‍රීඩා උළෙල අද පස්වරුවේ ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් රුහුණු විශ්වවිද්‍යාල ක්‍රීඩාංගණයේ දී ඇරැඹෙයි. රුහුණ විශ්වවිද්‍යාලය මෙවර සත්කාරකත්වය උසුළනු ලබන්නේ දෙවැනිවරටයි. විශ්වවිද්‍යාල 14ක නියෝජනයෙන් ක්‍රීඩක ක්‍රීඩිකාවන් 7000ක් මාතර පුරවරයේ රොදබැද ගන්නේ තරග ඉසව් 36කට තරගවැදීමේ අපේක්ෂාවෙනි.
ක්‍රීඩා උළෙලේ සමාප්ති උත්සවය සැප්තැම්බර් මස 07 වැනි දින ලෝක පූජිත ක්‍රිකට් ක්‍රීඩක කුමාර් සංගක්කාර මහතාගේ ප්‍රධානත්වයෙන් පැවැත්වීමට සියලු කටයුතු සංවිධාන කර ඇත. ක්‍රීඩා උළෙලේ තරග රැසක් පසුගිය කාලසීමාවේ දී පැවැති අතර, එහි ලකුණු සටහනේ මේ වන විට පෙරමුණ ගන්නට සමත්ව ඇත්තේ ලකුණු 78ක් ලබා සිටින කොළඹ විශ්වවිද්‍යාලයයි. ලකුණු 61ක් ලබා ශ්‍රී ජයවර්ධනපුර විශ්වවිද්‍යාලය දෙවැනි ස්ථානයේත් සබරගමුව විශ්වවිද්‍යාලය ලකුණු 55 ක් ලබා ගනිමින් තෙවැනි ස්ථානයේත් පසුවේ.
සම්බන්ධීකරණය
මහාචාර්ය මහින්ද අතපත්තු සහ දීපාල් රණවීර
සටහන හා ඡායාරූප වැලිගම සමූහ ටී. කේ. මහින්ද
0 Comments