පුජාරාගෙන් ශතකයක්

චේටස්වර් පුජාරා සහ නායක විරාත් කෝලි තුන්වැනි කඩුල්ලට එකතු කළ ලකුණු 170ක සම්බන්ධතාවෙන් ඉනිම ගොඩනැගූ ඉන්දිය පිල මෙල්බර්න් නුවර පැවැත්වෙන තුන්වැනි ටෙස්ට් තරගයේ දෙවැනි දිනය වූ ඊයේ පස්වරු තේ පානයෙන් පසුව කඩුලු 7කට ලකුණු 443ක් රැස් කරමින් සිය පළමු ඉනිම අත්හිටුවීමට තීරණය කළේය.

දිනය නිමාවනවිට සිය පළමු ඉනිම ක්‍රීඩා කරන ඔස්ට්‍රේලියානු පිල කිසිවකු නොදැවී ලකුණු 8ක් ලබා සිටියේය.

තරගයේ පළමු දිනය වූ පෙරේදා නොදැවී සිටි පුජාරා සහ කෝලි ඊයේ තරගයේ මුල් භාගය පුරා ඔස්ට්‍රේලියානු පිලේ පන්දු යවන්නන් දැඩි පීඩනයකට හසු කරමින් ඉන්දීය ඉනිම ඉහළට ඔසවා තැබීමට සමත්වුහ.

අනගි පිතිහරඹයක නිරතවූ පුජාරා ඊයේ සිය ටෙස්ට් තරග දිවියේ 17 වැනි ටෙස්ට් ශතකය වාර්තා කිරීමට සමත්විය. කෝලි රැස් කළ ලකුණු සංඛ්‍යාව 82කි. දෙදෙනාම දිවා ආහාරයෙන් මොහොතකට පසුව දැවී ගිය අතර මැදපෙළ පිතිකරු රෝහිත් ෂර්මා නොදැවී ලකුණු 63ක් රැස් කරමින් ඉන්දීය ඉනිම ඉහළ නැංවූවේය.

ඉන්දියාව පළමු ඉනිම -443/7 (ඉනිම අත්හිටුවන ලදි) චේටස්වර් පුජාරා 106, විරාත් කෝලි 82, මයාන්ක් අග්‍රවාල් 76, රෝහිත් ෂර්මා නොදැවී 63 ( පැට් කමින්ස් 72/3, මිචෙල් ස්ටාක් 87/2)

ඔස්ට්‍රේලියාව පළමු ඉනිම - කිසිවකු නොදැවී 8යි.