මෙතෙක් පැවැති තරග 6කින් 4ක් ජයගෙන ප්‍රසාද ලකුණු 22ක් ලබා තුන්වැනි ස්ථානයේ පසුවන සී.ආර්.ඇන්ඩ් එෆ්.සී. ක්‍රීඩා සමාජය අන්තර් සමාජ පළමුපෙළ ලීග් රග්බි තරගාවලියේ පළමු වටයේ අවසන් තරගයට අද (21) යුද හමුදා ක්‍රීඩා සමාජය සමග රත්මලානේදි තරග බිමට එක්වෙයි. පසුගිය සතියේදී ගුවන් හමුදා ක්‍රීඩා සමාජයට එරෙහිව ලකුණු 36-27ක ජයක් වාර්තා කරමින් ප්‍රසාද ලකුණු සටහනේ තුන්වැනි ස්ථානයට පත්වූ සී.ආර්.පිල පළමු වටයේ අවසන් තරගය ජයග්‍රාහීව නිමා කිරීමට බලාපොරොත්තුවෙන් පසුවන අතර පොලිස් පිල හමුවේ ලකුණු 41-19ක අනපේක්ෂිත පරාජයක් ලබා 7 වැනි ස්ථානයට ඇද වැටුණු යුද හමුදා පිල නැවත හිස එසැවීමේ අරමුණ ඇතිව අද තරගයට එක්වෙයි.
මේ අතර මෙවර තරගාවලියේ මෙතෙක් එකම අපරාජිත කණ්ඩායම බවට පත්වී සිටින වත්මන් ලීග් ශූර මහනුවර ක්‍රීඩා සමාජය සිය අපරාජිතභාවය තව දුරටත් රැක ගැනීමේ අදිටනින් අනිද්දා (23) නාවික හමුදා ක්‍රීඩා සමාජය සමග වැලිසර දී තරග වදී. මහනුවර පිල තරග 6ම ජයගෙන ප්‍රසාද ලකුණු 36ක් ලබා පෙරමුණේ පසුවන අතර පසුගිය සතියේදි සී.එච්.පිල හමුවේ ලකුණු 34-26ක අනපේක්ෂිත පරාජයක් ලබා ප්‍රසාද ලකුණු 20ක් ලබා සිවුවැනි ස්ථානයට පත්වී සිටින නාවික හමුදා පිල නැවත තුන්වැනි ස්ථානය අත්කර ගනිමින් පළමු වටය නිමා කිරීමට බලාපොරොත්තුවෙන් පසුවෙයි.
පසුගිය සතියේදි මහනුවර පිල හමුවේ ලකුණු 31-21ක පරාජයක් ලබා සිය අපරාජිතභාවය බිඳ ගත් හැව්ලොක්ස් පිල කිසිදු ජයග්‍රහණයක් නොලබා අවසන් ස්ථානයේ පසුවන ගුවන් හමුදා ක්‍රීඩා සමාජය සමග 23දා රත්මලානේදි තරග බිමට පිවිසෙයි. තරග 6කින් 5ක් ජයගෙන ප්‍රසාද ලකුණු 28ක් ලබා දෙවැනි තැන පසුවන හැව්ලොක්ස් පිල දෙවැනි වටයේ තරග ආරම්භ කිරීමට පෙර යළි ජයග්‍රාහී මානසිකත්වය ඉහළ දමාගැනීමට සූදානමින් සිටී.
නාවික හමුදා පිල පරදවා මෙවර තරගාවලියේ සිය 2වැනි ජයග්‍රහණය වාර්තා කළ සී.එච්.ඇන්ඩ් එෆ්.සී. ක්‍රීඩා සමාජය සහ පොලිස් පිල අතර තරගය ද 23 වැනිදා කොළඹ තුරඟ තරග පිටියේදි පැවැත්වෙයි. ප්‍රසාද ලකුණු 15ක් ලබා 6 වැනි ස්ථානයේ පසුවන සී.එච්.පිල අවසන් කණ්ඩායම් 4ට සේන්දු වීමේ දැඩි උත්සාහයක නිරතව සිටියත් මේ තරගයේදි දස්කම් අතර සිටින පොලිස් පිල වෙතින් දැඩි අභියෝගයක් එල්ල වනු නිසැකය.
මෙවර තරගාවලියේ ආරම්භයේ සිටම දැඩි පසුබැසීමකට ලක්වී සිටි පොලිස් ක්‍රීඩා සමාජය පසුගිය සතියේදි යුද හමුදා පිල පරාජය කරමින් නැවත සුපුරුදු දස්කම් අතරට එක්වී සිටින අතර ප්‍රසාද ලකුණු 15ක් ලබා පස්වැනි ස්ථානය අත්කරගැනීමට ද සමත් විය.
0 Comments