ගිණුම් වාර්තාවෙන් පෙන්වා දුන් අඩුපාඩු ඉදිරියේදි නිවැරදි කරනවා

ෆවුස් මොහොමඩ්

ජාතික ඔලිම්පික් කමිටුවේ මුදල් අවභාවිතයක් සිදුවී ඇතැයි ද, ගිණුම් වාර්තා මෙතෙක් නොලැබී ඇතැයි ද කියමින් ද්වේෂ සහගත ලෙස තමාට මඩ ගැසූ පුද්ගලයන්ට විගණන වාර්තාවෙන් නිසි පිළිතුරු ලැබී ඇතැයි ඔලිම්පික් කමිටුවේ ලේකම් මැක්ස්වෙල් ද සිල්වා මහතා කියයි. පෙරේදා සිනමන් ලේක් හෝටලයේ පැවැති මාධ්‍ය හමුවකදී ජාතික ඔලිම්පික් කමිටුවේ පසුගිය සිවුවසරක කාලයක වාර්ෂික ගිණුම් විගණන වාර්තාව ඉදිරිපත් කරමින් ඔහු එසේ ප්‍රකාශ කළේය.

ඔලිම්පික් කමිටුවේ විගණන වාර්තා සම්පුර්ණ බවත්, එය අතිශයන්ම පිරිසුදු බවත් වරින් වර කියාපෑවත් ඇතැම් කරුණු කාරණා සම්බන්ධව අඩුපාඩු කිහිපයක් ඇති බව ද මැක්ස්වෙල් මහතා පිළිගත්තේය. වසර 2013, 2014, 2015 සහ 2016 වසරවල ගිනුම් වාර්තා විගණනය කිරීමෙන් පසුව විගණකාධිපතිවරයා විසින් ඔලිම්පික් කමිටුව වෙත මේ වනවිට ලබා දී ඇති බව පවසමින් එහි කරුණු මාධ්‍ය හමුවේදී ඉදිරිපත් කිරීමට ද මැක්ස්වෙල් මහතා අමතක නොකළේය.

එසේ වුවත් ඔලිම්පික් කමිටුවේ 75 වැනි සංවත්සරය වෙනුවෙන් මුද්‍රණය කිරීමට බාරදුන් සමරු කලාප 2000ක් සඳහා වැය කළ මුදල් සම්බන්ධව විගණන වාර්තාවේ සටහන්වී ඇති කරුණු පිළිබඳ ඔහුගේ පිළිතුරු අවුල් සහගත විය.

විගණන වාර්තාවේ සඳහන් වන පරිදි මේ සමරු කලාප මුද්‍රණය ක්‍රමවත් ටෙන්ඩර් ක්‍රමවේදයකින් තොරව සිදුකර ඇති අතර මෙතෙක් මුද්‍රණය කළ එකක් නොවූවත් ඒ සඳහා එක්තරා මුද්‍රණ සමාගමකට සම්පුර්ණ මුදල වන රුපියල් ලක්ෂ 52ක මුදලින් අත්තිකාරම් වශයෙන් 50%ක මුදලක්ද ගෙවා තිබේ. මෙතෙක් මුද්‍රණය නොකළ එම සමරු කලාපයෙන් දැන් කිසිදු ඵලයක් නැතිවුවත් ඒ සඳහා ගෙවූ රුපියල් ලක්ෂ 26ක මුදල නැවත අයකරගැනීමට මෙතෙක් කටයුතු යොදා නැතැයි ද එහි සඳහන් වෙයි.

මේ පිළිබඳ මැක්ස්වෙල් මහතා කියා සිටියේ එම සමරු කලාප මුද්‍රණය සඳහා බාරදීම නිසි ටෙන්ඩර් ක්‍රමවේදයකින් සිදු කළ එකක් බවය. ඔහු පවසන පරිදි එම සමරු කලාප මුද්‍රණය පිළිබඳ කටයුතු කරනු ලැබුවේ මේ වනවිට මැක්ස්වෙල්ට විරුද්ධ පාර්ශ්වයෙන් නිලවරණ සටනට පිවිසි සිටින එකල ඔලිම්පික් කමිටුවේ සිටි පුද්ගලයන් කිහිපදෙනකු විසිනි. ඔවුන්ගේ දුර්වල ක්‍රියා කලාපය නිසා නියමිත පරිදි සමරු කලාපය මුද්‍රණය කරගැනීමට නොහැකිවූ බව ඔහු පැවැසීය.

නැවත අයකර ගත යුතු බවට විගණන වාර්තාවේ දැක්වෙන රුපියල් ලක්ෂ 26 ගෙවා දැනට වසර කිහිපයක් ගතවී තිබුණත් මෙතෙක් ඒ සඳහා කටයුතු නොකිරිම විමතියට කරුණකි. එම මුදල නැවත අය කරගැනීමට කටයුතු යොදන බව මාධ්‍ය හමුවේදී මැක්ස්වෙල් මහතා කියා සිටියේය.

ඔලිම්පික් කමිටුවේ පසුගිය සිවුවසර ඇතුළත ගිණුම් විගණන වාර්තාව පිළිබඳ සවිස්තාරාත්මකව කරුණු සඳහන් කළත් ඊට පෙර වසර 2009, 2010, 2011 සහ2012 වසරවලට අදාළ ගිණුම් වාර්තා විගණනය පිළිබඳ ඔහුගේ අදහස් මතභේදාත්මක විය. එම විගණන වාර්තා මෙතෙක් කමිටුවේ සාමාජික සංගම් වෙත ලබා නොදීම ගැන මාධ්‍ය වේදියකු ප්‍රශ්න කළ අවස්ථාවේ මැක්ස්වෙල් මහතා කියා සිටියේ ගිණුම් වාර්තා ලබාදිය යුතුව ඇත්තේ මහ සභා රැස්වීමකදී පමණක් බවය.

‘ඔඩිට් රිපෝට් දෙන්න ඒ.ජි.එම්. එකක් තියෙන්න එපෑය. ඒ.ජී.එම්. එකක් නැතිව කොහොමද ඒවා දෙන්නේ.’

එළැඹෙන ජාතික ඔලිම්පික් කමිටු නිලවරණයේදී සුරේෂ් සුබ්‍රමනියම් පාර්ශ්වයෙන් ලේකම් තනතුරට තරග වදින මැක්ස්වෙල් ද සිල්වා, ඔලිම්පික් කමිටුවේ භාණ්ඩාගාරික කපිල ගාමිණී ජයසිංහ සමග උපභාණ්ඩාගාරික චන්දන පෙරේරා මහත්වරු සහභාගිත්වයෙන් පැවැති මේ මාධ්‍ය හමුවට සුබ්‍රමනියම් පාර්ශ්වයට සහය පළ කරන ක්‍රීඩා සංගම් රැසක නිලධාරීන් සමග මෙවර නිලවරණයේදී උපසභාපති ධුරයට තරග වැදීමට නියමිත ශ්‍රී ලංකා රගර් සංගමයේ සභාපති අසංග සෙනෙවිරත්න මහතා ද එක්වී සිටියේය.