ගීෂා මුණසිංහ
වසර 2016 දී මෙරට මෝටර් රථ ක්‍රීඩා ක්ෂේත්‍රය තුළ දස්කම් පෑ ක්‍රීඩකයන් සඳහා පසුගිය වසරේ නොවැම්බර් මාසයේ පැවැති සම්මාන උළෙලේදී අවිධිමත් ලෙස කටයුතු කරමින් තම හිතවතුන් අතර සම්මාන බෙදා දී ඇතැයි චෝදනාවට ලක්වී සිටින ශ්‍රී ලංකා මෝටර් රථ ධාවන ක්‍රීඩා සම්මේලනය එම සම්මාන උළෙලේ ප්‍රධාන සම්මානයකින් පිදුම් ලැබූ එක්තරා ප්‍රවීණ ධාවකයකුට මෑතකදී රුපියල් මිලියන 1.5කට අධික මුදලක් වෙන් කිරිමට කටයුතු කිරීමේ සිදුවීමක් ‘දිනමිණ’ට වාර්තා වෙයි.
මාධ්‍යවේදින්ට දොරටු වසා දමමින් පැවැති එම සම්මාන උළෙලේ දී වාර්ෂික ජයග්‍රහණවලට අනුව සම්මාන ලැබිය යුතුව තිබූ ධාවකයන් නොසළකා හරිමින් තම හිතවතුන් අතර සම්මාන බෙදා දුන් බවට චෝදනා නැගුණු අතර ඉහත කී ධාවකයා කිසිදු අයුරකින් සම්මානයට පාත්‍රවීමට සුදුසුකම් නොතිබුණත් ඔහුට සම්මාන පිරිනැමීම සහ මෑතකදී සම්මේලනය විසින් අදාළ ධාවකයාට මිලියන 1.5කට අධික මුදලක් පිරිනමා අතර ඇති සම්බන්ධතාව පිළිබඳ විවිධ මත පළවෙමින් තිබේ.
අදාළ ධාවන ශූරයා මේ සම්මාන උළෙල සඳහා මිලියන දෙකක මුදලක් ලබා දී ඇති බවත්, ඊට කෘතවේදීත්වය පළ කරමින් ඔහුට එම සම්මාන උළෙලේදී ප්‍රධාන සම්මානයක් පිරිනමා ඇති බවත් ඉතාමත් විශ්වාස කටයුතු ආරංචි මාර්ග සඳහන් කරයි.
එම ධාවන ශූරයා විසින් ඒ සඳහා වැය කළ මුදලින් රුපියල් මිලියන 1.5කට අධික මුදලක් නැවත ඔහුට ලබාදීමට වෙන් කිරීම පිළිබඳ පසුගිය වසරේ ශ්‍රී ලංකා මෝටර් රථ ක්‍රීඩා සම්මේලන ගිනුම් වාර්තාවල ඇතුළත්වී ඇතැයි ද වාර්තා වෙයි.
එම ගිනුම් වාර්තාවේ පිටපතක් ‘දිනමිණ’ට ලැබී ඇති අතර අදාළ ධාවන ශූරයාට 2017 දෙසැම්බර් 29 දිනය යටතේ රුපියල් 15,91,500ක මුදලක් ද, අවසන් ගිනුම් වාර්තාවෙන් රුපියල් 37,950ක මුදලක් ද ලබාදීමට කටයුතු යොදා ඇතැයි ඉන් පැහැදිලි වෙයි.
ශ්‍රී ලංකා මෝටර් රථ ධාවන ක්‍රීඩා සම්මේලනයේ වත්මන් පාලනධිකාරීය මුදල් ශ්‍රී ලංකා මෝටර් රථ ධාවන ක්‍රීඩා සම්මේලනයේ ගිණුමෙන් මේ ප්‍රවීණ ධාවකයාගේ නමට මිලියන ගණනින් වෙන් කර ඇත්තේ කුමන හේතුවක් සඳහා දැයි පැහැදිලි නොවේ.
එහෙත් එය ඉහත කී අන්දමට තමාට සම්මානයක් ලබාගැනීමේ අරමුණින් එම සම්මාන උළෙලට මුදල් ලබාදී ඇතැයි පසුව ක්ෂේත්‍රය තුළ පැතිරී ගිය පුවත සාධාරණීයකරණය කිරීමේ ප්‍රතිඵලයක් බවට ඇතැමුන් සැක පහළ කරති.
0 Comments