මාලිගාවත්ත වෙඩි තැබීමේ ප්‍රධාන සැකකරු අත්අඩංගුවට

මාලිගාවත්ත ලක්සෙත සෙවන මහල් නිවාස සංකීර්ණයේදී පුද්ගලයෙකුට වෙඩි තැබීමේ සිද්ධිය සම්බන්ධ සිද්ධියේ ප්‍රධාන සැකකරු ඊයේ(01) රාත්‍රී 7.50 ට පමණ ‍විශේෂ කාර්ය බලකා නිලධාරීන් විසින් අත්අඩංගුවට ගෙන තිබේ.

 

කොටහේන පොලිස් වසමේ සුපිරි වෙලඳ සැලක් අසල දී  සැකකරු අත්අඩංගුවට ගෙන ඇතැයි පොලිස් මූලස්ථානය සදහන් කරයි. 

 

මෙරට නිෂ්පාදිත රිවෝල්වර ගිනි අවියක් ද ඔහු සන්තකයේ තිබී ඇත. 

 

අත්අඩංගුවට ගත් වයස අවුරුදු 31 ක් වු ග්‍රෑන්ඩ්පාස් ප්‍රදේශයේ පදිංචි සැකකරු කොළඹ අපරාධ කොට්ඨාසය වෙත ඉදිරිපත් කර තිබේ.

 

මෙම සිද්ධිය සම්බන්ධයෙන් තවත් සැකකරුවන් දෙදෙනෙක් කොළඹ අපරාධ කොට්ඨාසයේ නිලධාරීන් විසින් ඊයේ සවස වැල්ලම්පිටිය හා මාලිගාවත්ත ප්‍රදේශවල දී අත්අඩංගුවට ගෙන තිබේ.

 

‍අත්අඩංගුවට ගත් සැකකරුවන් දෙදෙනා වයස අවුරුදු 31 ක් වන කොළොන්නාව හා මාලිගාවත්ත ප්‍රදේශවල පදිංචිකරුවන් බව පොලීසිය පවසයි. එක් සැකකරුවෙක් එම අවස්ථාවේ දී තුවාල ලබා සිට ඇති බැවින් පොලිස් ආරක්ෂාව යටතේ කොළඹ ජාතික රෝහලට ඇතුළත් කර තිබේ.

 

අත්අඩංගුවට ගත් සැකකරුවන් අද(02) අළුත් කඩේ අංක 4 මහේස්ත්‍රාත් අධිකරණය වෙත ඉදිරිපත් කිරීමට නියමිතය.

 

පසුගිය මැයි මස 30 වන දා සවස 5 ට පමණ මාලිගාවත්ත පොලිස් වසමේ ලක්සෙත සෙවන මහල් නිවාස සංකීර්ණයේ දී වෙඩි තැබීමක් හේතුවෙන් එහි පදිංදි වයස අවුරුදු 35 ක් වු පුද්ගලයෙක් තුවාල ලබා ජාතික රෝහලට ඇතුළත් කළේය.

 

කොළඹ අපරාධ කොට්ඨාසය වැඩිදුර විමර්ශන සිදු කරනු ලැබේ.