ලෝකයේ විවිධ රටවල් අතර පවතින ද්විපාර්ශ්වික සහ බහුපාර්ශ්වික සබඳතා, එනම් අන්තර්ජාතික සබඳතාවන්හි වැදගත්කම සහ වටිනාකම කලින් කලට වෙනස් වේ. ඊට සමාජ, ආර්ථික දේශපාලනික මෙන්ම භූ විද්යාත්මක සාධක පවා ප්රබලව බලපාන බව නොරහසකි.
උදාහරණයක් ලෙස කලකට ඉහතදී ලෝකයේ වැදගත්ම සාගරය වූයේ අත්ලාන්තික් සාගරයයි. පසුව එම තත්ත්වය වෙනස් විය. විසි වැනි සියවස පමණ වන විට ලෝකයේ වැදගත්ම සාගරය බවට පත් වූයේ පැසිෆික් සාගරයයි. මේ වන විට එම තත්ත්වයද බොහෝ සෙයින් වෙනස් වී ඇත. අද වන විට ලෝකයේ වඩාත්ම වැදගත්ම සාගරය බවට පත් වී ඇත්තේ ඉන්දියා සාගරයයි .
ඉන්දියා සාගරය ලෝකයට වැදගත් වීමට ප්රධාන හේතු කිහිපයකි. අද ලොව ප්රබල රටවල් බොහොමයක් තම වෙළෙඳ කලාප තුළ වෙළෙඳ සහ වාණිජ කටයුතු අතින් උපරිම වර්ධනයකට පැමිණ සිටී. එම නිසාම අද එම බලවතුන් තම වෙළෙඳ සහ වාණිජ කටයුතු ව්යාප්ත කරගැනීම සඳහා වෙනත් බාහිර කලාප වෙත යොමු වීමට උත්සාහ දරමින් සිටී.අද එම නිෂ්පාදන බලවතුන්ට වෙළෙඳාම සඳහා හොඳම අවස්ථාව ඇත්තේ අප්රිකානු කලාපයේය. ඒ අනුව යුරෝපානු ඇමෙරිකානු බලවතුන් මෙන්ම චීනය ඇතුළු පෙරදිග බලවතුන්ද අප්රිකාවේ තම වෙළෙඳ සහ වාණිජ කටයුතු ව්යාප්ත කිරීම සඳහා විවිධ සැලසුම් සහ වැඩසටහන් ක්රියාත්මක කරමින් සිටී. මෙහිදී එම බලවතුන්ට අප්රිකානු කලාපය හා සම්බන්ධ වීමට, ඉන්දියා සාගරය අතිශයෙන්ම වැදගත්ය. ඉන්දියා සාගරයේ බලය අල්ලාගන්න සියලු දෙනාම පොරකන්නේ ඒ හේතුව නිසාය.
චීනය එම බලපොරයේ වඩාත්ම සාර්ථකව සහ ඉදිරියෙන්ම සිටින රාජ්ය වේ. ඒ අනුව ඉන්දියා සාගරයේ බලය වඩාත් ශක්තිමත්ව ස්ථාපිත කරගෙන ඇත්තේ චීනයයි. නමුත් ඉන්දියා සාගරයේ භූගෝලීය පිහිටීම අනුව එම කලාපයේ ප්රබලයා වන්නේ ඉන්දියාවයි. එම රටවල් දෙක අතර සීතල ගැටුමක් උද්ගතව ඇත්තේ එම හේතු කාරණා මුල් කරගනිමිනි ඉන්දියා සාගරයේ කේන්ද්රයේ පිහිටා තිබීම හේතුවෙන් එම බලඅරගලයේ ශ්රී ලංකාවටද විශේෂ ස්ථානයක් හිමි වී ඇත්තේ නිතැතිනි. එම භූ දේශපාලනික වැදගත්කම හේතුවෙන්, ඉන්දියානු සාගරයේ බලය ඇල්ලීමට වෙර දරන සියලුම රටවල් ශ්රී ලංකාව වෙත "සුවිශේෂී අවධානයක් " යොමු කරමින් සිටී.
එම රටවල් දෙක පිටුපස ලෝකයත් පෙළ ගැසී ඇත. ඉන්දියාව පිටුපස ඇමෙරිකාව, ජපානය මෙන්ම අඩුවැඩි වශයෙන් යුරෝපයද පෙළ ගැසී ඇත. චීනය පිටුපස රුසියාව සහ “බ්රික්ස්” සංවිධානයට අයත් බ්රසීලය, දකුණු අප්රිකාව ඇතුළු රටවල් පෙළ ගැසී සිටී. ඒ අනුව ඉදිරියේදී ඉන්දියා සාගරයේ බලය අල්ලාගැනීම සඳහා එම රටවල් සියල්ල පුළුල් සීතල යුද්ධයකට එළැඹීමේ යම් අවදානමක්ද මේ වන විට මතුවෙමින් ඇත.
ඒ තත්ත්වය හේතුවෙන් ශ්රී ලංකාවට උදා වී ඇත්තේ වාසි ප්රතිලාභ මෙන්ම අවාසි සහ පාඩුද සිදු විය හැකි අවදානම් සහගත සංකීර්ණ තත්ත්වයකි. එම සංකීර්ණ තත්ත්වය රටක් වශයෙන් අප නිවැරදිව අවබෝධ කරගත යුතුව ඇත. එම වාතාවරණය මත ඉහත කී බලකඳවුරු දෙකම ශ්රී ලංකාව තම සේවාදායකයෙකු බවට පත් කරගැනීමේ වෑයමක යෙදේ. වඩාත් දැඩි උත්සාහයක නිරතව සිටින්නේ චීනයයි. චීනය බොහෝ දුරට ඒ සඳහා භාවිතා කරන උපක්රමය, මෙරටට විශාල ණය මුදල් ලබාදීම, මේරටේ දැවැන්ත සංවර්ධන ව්යාපෘති ආරම්භ කිරීම සහ සංවර්ධන ව්යාපෘති සඳහා ආධාර ලබාදීමය .එබැවින් මේ මොහොතේ ලංකාවේ විදෙස් ප්රතිපත්ති සැකසිය යුත්තේද , අන්තර්ජාතික සබඳතා ඇති කරගත යුත්තේද ඉහත කරුණු සහ තත්ත්වයන් පිළිබඳ නිවැරදිව සහ පුළුල්ව සැලකිල්ලට ගෙනය. එම බලකඳවුරු දෙකම ප්රතික්ෂේප කර තනිව ගමනක් යාමටද මෙරටට නොහැකිය. එය ප්රයෝගික තලයේදී අපට මුහුණ දීමට වන යථාර්ථයයි.
චීනය එම සැලසුම ක්රියාත්මක කරන විට, ඉන්දියාව, ඇමෙරිකාව ප්රමුඛ අනෙක් කඳවුරද ඊට ප්රතිවිරුද්ධව ක්රියාත්මක වේ. ඇමෙරිකාව ඉන්දියාව වැනි රටවල්, චීනය මෙන් විශාල ආධාර සහ ණය මෙරටට ලබනොදුන්නද, ඔවුන් ඊට වඩා වෙනස් දේශපාලනික උපක්රම සහ කුමන්ත්රණ මඟින් ශ්රී ලංකාව “නම්මවා ” ගැනීමට උත්සාහ දරමින් සිටී.
කෙසේ වෙතත් ලෝක බලවතුන්ගේ එම ආකර්ෂණය හේතුවෙන් අපට ආර්ථික ප්රතිලාභ රැසක් ලැබෙන බවද අමතක නොකළ යුතුය . විශාල ණය ආධාර , ව්යාපෘති මෙන්ම විවිධ දේශපාලනික ආධාර උපකාර පවා එමඟින් මෙරටට ඇදී ඒම අපට පැහැදිලිවම දැකිය හැකිය. නමුත් ඒ සමඟම, අපගේ පුංචි රට, මෙම “තෝරු-මෝරු ” සටනට මැදි වීමේ අවදානමක්ද ඇත .
ඒ අනුව මේ මොහොතේ අවධානය යොමු කළ යුත්තේ උද්ගතව ඇති තත්ත්වයන් නිසි ලෙස කළමනාකරණය කළ හැක්කේ කෙසේදැයි සොයා බැලීම පිළිබඳ ය. වගකිවයුතු සියලු පාර්ශ්ව ඒ පිළිබඳ මැදිහත්ව සිතා බලා කටයුතු කළ යුතුය .
පසුගිය රජයේ විදෙස් ප්රතිපත්තිය තුළ වැරදි හා අඩුපාඩු රැසක් වූ අතර ඒ නිසාම අපට අවාසි සහ අලාභ රැසකටද මුහුණදීමට සිදුවූ බවද අපට මතකය. එම වැරදි සහ අඩුපාඩු නැවත සිදු නොවීමට නව රජය වගබලා ගත යුතුමය .
ඒ අනුව චීනය සහ ඉන්දියාව අතර සමතුලිත ප්රතිපත්තියක් අනුගමනය කරන්නේ කෙසේද යන්න, අද දවසේ අප රට ඉදිරියේ ඇති අභියෝගයයි. ජනපති ගෝඨාභය රාජපක්ෂ මහතා ප්රමුඛ නව රජය බලයට පත්ව ගත වූ කෙටි කාලසීමාව තුළ එම අභියෝගයට සාර්ථකව මුහුණදීමේ හැකියාව පෙන්නුම් කරමින් සිටීම සතුටට කරුණකි. විශේෂයෙන්ම නව රජය "නොබැඳි " 7 පිළිවෙතින් යම් ආදර්ශයන් ලබාගනිමින් සිටින බවක් පැහැදිලිවම පෙනෙන්නට ඇත. ඇත්තෙන්ම ඉන්දීය සාගරයේ බල අරගලයට සාර්ථකව මුහුණදීමට නම් නොබැඳි පිළිවෙතින් ආදර්ශ ලබාගත යුතුමය . ඒ අනුව චීනය සහ ඉන්දියාව යන දෙපාර්ශ්වයම “අතේ දුරින්” ආශ්රය කිරීමට අවශ්ය පියවරයන් ගත යුතුය . ඒ සඳහා බුද්ධිමත්ව සැලසුම් සැකසිය යුතුය. චීනය සතුටු කිරීම හෝ ඉන්දියාව සතුටු කිරීම අරමුණු කරගමිනින් ආර්ථික ප්රත්පත්ති සැකසීම නොකළ යුතුය. මහා බලවතුන්ගේ ආකර්ෂණය හා අවධානය ඔස්සේ ලැබෙන වාසි නිවැරදි ලෙස ආයෝජනය කිරීමට අප කටයුතු කළ යුතුය. එසේ කටයුතු කිරීමෙන් දියුණුවූ රටවල් රැසක් පිළිබඳ ලෝක ඉතිහාසයෙන් අපට උදාහරණ ලබා ගත හැකිය.
චීනය අපට බොහෝ උදවු උපකාර කරමින් සිටී. මේ අවස්ථාවේ ඔවුන් මඟහැර යෑමටද අපට නොහැකිය. එසේම අපගේ අසල්වැසි ඉන්දියාව අතහැරීමටද අපට කිසිසේත්ම නොහැකිය. දෙපාර්ශ්වය සමඟම පවතින සබඳතා රැකගැනීම අතිශයෙන් වැදගත්ය.
මේ අනුව අප චීනය සහ ඉන්දියාව සමඟ මෙහිදී “සාපේක්ෂ වාසිය” යන කරුණ මුල් කරගනිමින් කටයුතු කළ යුතුය. ඉන්දියාව හා චීනය මෙරට ආර්ථික ආයෝජනයක් සඳහා තරග කරන විට අප බැලිය යුත්තේ ඉන් අපට සාපේක්ෂ වාසියක් ලැබෙන්නේ කුමන රටෙන්ද යන්න පිළිබඳය. එසේ නැතිව, එම බල කඳවුරු දෙකේ බල අරගල පිළිබඳ සිතා බලා කටයුතු නොකළ යුතුය. අප එම බල අරගලයේ කොටස්කරුවෙකු නොවිය යුතුය .
උපරිම සාපේක්ෂ වෙළෙඳ වාසිය ලබාගැනීම අරමුණු කරගත් , තාර්කික ප්රවිෂ්ටයක් මත පිහිටා සිට අප ඉදිරියේදී චීනය හා ඉන්දියාව යන රටවල් සමඟ ගනුදෙනු කළ යුතුය. දෙරට සමඟ ආර්ථික ආයෝජන සම්බන්ධව කටයුතු කිරීමේදී මෙහිදී අප ගත යුත්තේ ආර්ථික තීන්දු තීරණ මිස දේශපාලන තීන්දු තීරණ නොවේ.
from silumina
0 Comments