කැබ්රිය පාරෙන් පැන ප්‍රපාතයකට පෙරළෙයිදෙදෙනකුට බරපතළ තුවාල

කළුගහකදුර - පිටමාරුව ප්‍රධාන මාර්ගයේ 9වැනි කිලෝමීටර් කණුව අසළ දී පෙරේදා (04) රාත්‍රි 8.00ට පමණ මාර්ගයේ ගමන් ගත් කැබ් රථයක් මාර්ගයෙන් ඉවතට ධාවනය වී අඩි 20ක පමණ ප්‍රපාතයකට පෙරළී ගසක හැපී අනතුරට ලක්වීමෙන් එහි ගමන් ගත් දෙදෙනකු බරපතළ තුවාල ලබා මීගහකිවුල දිසා රෝහලටත් අනතුරුව හදිසි ප්‍රතිකාර සඳහා බදුල්ල පළාත් මහ රෝහලටත් ඇතුළත් කර ඇතැයි කන්දකැටිය පොලිසිය පවසයි.

සිද්ධියෙන් රෝහල් ගත කර ඇත්තේ පස්සර පිටමාරුව ප්‍රදේශයේ පිහිටි පුංචි ලෝකාන්තය නැරැඹීමට ගොස් ආපසු එමින් සිටි මහනුවර කටුගස්තොට ප්‍රදේශයේ පිරිසකි. තුවාල ලැබූවන් දෙදෙනා අවුරුදු 29 හා 46 වයස්වල පසුවන බව පොලිසිය පවසයි. පල්ලම් සහිත මාර්ගයේ දී එක් වරම තිරිංග ක්‍රියා විරහිතවීමෙන් අනතුර සිදුව ඇති බව මූලික පරීක්ෂණවල දී අනාවරණය වී ඇත.

කැබ් රථය අනතුරට ලක්වන අවස්ථාවේ එහි කාන්තාවක් ඇතුළු පුද්ගලයන් හය දෙනකු ගමන් ගෙන ඇති අතර, සෙසු පිරිස සුළු තුවාල ලබා ඇතැයි ද පොලිසිය පවසයි.

අනතුර සිදුවීමත් සමඟම කැබ් රථයේ ඉදිරිපස බැලුන ක්‍රියාත්මකවීමෙන් සිදුවීමට තිබූ මහත් හානියක් වැළකී ගොස් ඇතැයි ද පොලිසිය පවසයි. අනතුරුරින් කැබ් රථයට බරපතළ හානි සිදුව ඇත. කන්දකැටිය පොලිසිය සිද්ධිය සම්බන්ධයෙන් පරීක්ෂණ පවත්වයි.

 

මීගහකිවුල සමූහ

ඡායාරූපය මීගහකිවුල සමූහ