තරුෂගෙන් සුපිරි පන්දු යැවීමක්

තරුෂ ඩිල්ෂාන්ගේ විශිෂ්ට පන්දු යැවීමත් දිනුර කළුපහනගේ ශතකයත් හේතුවෙන් අන්තර් පාසල් අවුරුදු 13න් පහළ තරගාවලියේ පළමු කොටසේ තරගයකින් ගාල්ල සාන්ත ඇලෝසියස් විදුහලට එරෙහිව පළමු ඉනිමේ ජයක් අත්කර ගැනීමට ගාල්ල මහින්ද විදුහල සමත් විය.

තරගයේ පළමුව පන්දුවට පහරදුන් මහින්ද විදුහල් ක්‍රීඩකයෝ පළමු ඉනිමට කඩුලු 5ක් දැවී ලකුණු 176ක් රැස්කළ අතර ඇලෝසියස් විදුහලට පළමු ඉනිමේදී සියල්ලන් දැවී ලබාගත හැකිවූයේ ලකුණු 27ක් පමණි.

මහින්ද විදුහල වෙනුවෙන් දිනුර කළුපහන පන්දු 130කදී හතරේ පහර 15ක් සමගින් ලකුණු 100ක් රැස්කළ අතර ඔහු, නිකිල් ජයවීර (50) සමග එක්ව පළමු කඩුල්ලට ලකුණු 124ක සබඳතාවක් ගොඩනැගීමට සමත් විය.

ඇලෝසියස් පිළිතුරු ඉනිම බිඳ දැමූ තරුෂ ඩිල්ෂාන් විශිෂ්ට පන්දු යැවීමක නිරත වෙමින් කඩුලු 5ක් දවා ගත්තේ ලකුණු ලබා නොදෙමිනි.

මහින්ද වි. පළමු ඉනිම - 176/5 (ඕවර 45.2) දිනුර කළුපහන 100, නිකිල් ජයවීර 51 (හසිඳු දිල්මින් 30/3) සහ දෙවැනි ඉනිම - 36/2 (ඕවර 9)

සා.ඇලෝසියස් පළමු ඉනිම - 27 (ඕවර 21.2) (තරුෂ ඩිල්ෂාන් 00/5, තුසිත දහම් 7/2, දිනුර කළුපහන 7/2)