හිටපු ජනාධිපති මහින්ද රාජපක්ෂ ගේ බිරිඳ ශිරන්ති රාජපක්ෂ ගේ සහෝදරයා වන ශ්‍රී ලන්කන් එයාර්ලයින්ස් සමාගමේ හිටපු සභාපති නිශාන්ත වික්‍රමසිංහ 2012 වසරේ සිට 2014 දක්වා කාලයේදී ඩුබායි හි සිටි අලෙවි සහකාරිණියකට මහල් නිවසක් ලබාගැනීම වෙනුවෙන් එම සමාගමේ මුදලින් රුපියල් මිලියන 2.4ක් වෙන් කර ඇතැයි අනාවරණය වී ඇති බව පැවසේ. ශ්‍රී ලන්කන් එයාර්ලයින්ස් සහ මිහින් ලංකා යන සමාගම්වල සිදු වී ඇති වංචා, දූෂණ සහ අක්‍රමිකතා සෙවීමට පත් කර ඇති ජනාධිපති කොමිෂන් සභාවේදී මේ කරුණු අනාවරණය වී තිබෙන බව සඳහන් වේ.
ශ්‍රී ලන්කන් එයාර්ලයින්ස් සමාගමේ මූල්‍ය අංශයේ ප්‍රධානී යසන්ත දිසානායක ජනාධිපති කොමිසම ඉදිරියේ කරුණු දක්වමින් ඒ බව සඳහන් කර තිබේ. ඩුබායිහි සිටින විධායක නිලධාරීන් පුහුණු කිරීම සඳහා ලබාගත් නිවාස සංකීර්ණයක් වෙනුවෙන් මාසික මුදලක් වෙන් කරන්නැයි එවකට සමාගමේ සභාපති නිශාන්ත වික්‍රමසිංහ තා උපදෙස් දුන්නේ යැයි යසන්ත දිසානායක, ජනාධිපති කොමිසම ඉදිරියේ සාක්ෂි ලබාදෙමින් පවසා තිබේ.
ඩුබායි හි සිටින අලෙවි සහකාර නිලධාරිණියක වන ෂෙහානි රොද්‍රිගෝ නැමැත්තියකට අදාළ මුදල් වෙන් කරන්නැයිද නිශාන්තමසිංහ උපදෙස් දුන් බවද ඔහු කොමිසම හමුවේ පවසා ඇති බවත් අදාළ ගෙවීම්වලට සම්බන්ධ ඉන්වොයිස්වල සඳහන් කර ඇත්තේ ගෙවීම් කළ යුතු සමාගමේ නමක් නොව ඉහත කී තැනැත්තියගේ නම යැයිද යසන්ත දිසානායක කොමිසම ඉදිරියේ පවසා ඇති බවත් සඳහන් වේ.
මේ අතර 2017 වසරේ ශ්‍රී ලන්කන් එයාර්ලයින්ස් සමාගම ලබා ගත් ණය මුදල් පිළිබඳව තොරතුරුද ඊයේ අනාවරණය වී තිබේ.
2017 පෙබරවාරි මස අමෙරිකානු ඩොලර් මිලියන 34.5ක ණය මුදලක් ස්ටෑන්ඩර්ඩ් චාර්ටඩ් බැංකුව විසින් ශ්‍රී ලංකන් එයාර්ලයින්ස් සමාගමට ලබා දී ඇති බවත් මෙම ණය මුදලෙන් අමෙරිකානු ඩොලර් මිලියන 27ක් භාවිත කර තිබුණේ, ගුවන් යානා මිලදී ගැනීම සඳහා එළැඹ තිබූ කල්බදු ගිවිසුමක් අහෝසි කිරීමේ දඩ මුදල් ගෙවීම සඳහා බවත් සඳහන් වේ.
ගුවන් සමාගම, මෂ්රික් බැංකුවෙන් ලබා ගත් ණය මුදලේ එකඟ වූ කොන්දේසි සපුරාලීමට අපොහොසත්වීම හේතුවෙන් එම සමාගමට අලාභයක් දැරීමට සිදු වූ බවද ඊයේ ජනාධිපති කොමිසම හමුවේ තවදුරටත් අනාවරණය වී ඇති බව පැවසේ. මෙම අලාභ පියවීම සඳහා ඩොලර් මිලියන 150ක ණය මුදලක් ඉස්ලාමීය බැංකු පහසුකම් යටතේ ලබා ගෙන ඇත.
මෙම ණය පහසුකම ලබා ගැනීම සඳහා අල් හිල්අල් බැංකුව, අබුඩාබි ඉස්ලාමික් බැංකුව, නූර් ඉස්ලාමික් බැංකුව, යුනයිටඩ් බැංකුව සහ ශ්‍රී ලංකාවේ කොමර්ෂල් බැංකුව අතර ණය සපයන්නෙකු ලෙස ක්‍රියා කිරීමට ශ්‍රී ලංකන් එයාර්ලයින්ස් සමාගම ස්ටෑන්ඩර්ඩ් චාර්ටඩ් බැංකුවේ ලන්ඩන් කාර්යාලයට ඉල්ලීමක් කර තිබිණි.
කොමිෂන් සභාවේදී තවදුරටත් අනාවරණය වි ඇත්තේ, ශ්‍රීලංකන් එයාර්ලයින්ස් සමාගම අමෙරිකානු ඩොලර් මිලියන 175ක් ලබා ගැනීම සඳහා ජාත්‍යන්තර බැඳුම්කර නිකුතුවක් සඳහා ස්ටෑන්ඩර්ඩ් චාර්ටඩ් බැංකුව ප්‍රධාන කළමනාකරු ලෙස පත් කර තිබූ බව ය.
මෙම බැඳුම්කර 2019 දෙසැම්බර් මාසයේදී කල් පිරීමට නියමිතව තිබේ.
The post මහින්දගේ මස්සිනා “ශ්‍රී ලන්කන්” මුදලින් රුපියල් මිලියන 2.4ක් අලෙවි සහකාරිණියකට දෙයි. appeared first on Lanka News Column.
0 Comments