දේශීය සිනමාව අන්තර්ජාතික කීර්තියට පත් කරමින් ශ්‍රී ලාංකේය සිනමාවේ හෙළ සලකුණ බිහි කළ අසහාය සිනමාකරු ආචාර්ය ලෙස්ටර් ජේම්ස් පීරිස් මහතා (99) දිවි රඟමඩලෙන් සමු ගනියි.
චිත්‍රපට අධ්‍යක්ෂකවරයකු, තිර රචකයකු සහ නිෂ්පාදකවරයෙකු ලෙස චිත්‍රපට ක්ෂේත්‍රයට මා හැඟි මෙහෙවරක් ඉටු කළ හෙතෙම සිංහල සිනමාවේ සංධිස්ථානයක් ඇති කළ “රේඛාව“ චිත්‍රපටය 1956 දී බිහි කළේය.
1919 අප්‍රෙල් 5 වැනිදා උපත ලද ලෙස්ටර් ජේම්ස් පීරිස් මහතා, සිය 99 වැනි ජන්ම දිනය ජනාධිපති මෛත්‍රීපාල සිරිසේන, අගමැති රනිල් වික්‍රමසිංහ මහත්වරුන්ගේ සහභාගීත්වයෙන් යුතුව සමරන්නට ද අවස්ථාව උදා කර ගත්තේය.
කුඩා කළ කොළඹ ශාන්ත පීතර විද්‍යාලයට ඇතුළත්ව අධ්‍යාපනය ලැබූ ඒ මහතා, වයස අවුරුදු 17 දී තම ජීවන වෘත්තිය ලෙස ජනමාධ්‍යවේදය තෝරා ගෙන තිබුණි. ඩේලි නිවුස් පුවත්පතේ අතිරේකයක් සංස්කරණය කළ ලෙස්ටර්,1939 දී ටයිම්ස් ඔෆ් සිලෝන් පුවත්පතේ මෙන්ම ශ්‍රී ලංකා ගුවන්විදුලි සංස්ථාවේ ද කාලයක් සේවය කළේය. පසුව නාට්‍ය මණ්ඩලයට එක් වීමෙන් කලාව පිළිබඳ දැනුම පුළුල් කර ගන්නට කටයුතු කළේය.
සිය මවගේ ආරාධනයෙන් එංගලන්තයට ගොස් කලා ශිෂ්‍යත්වය හැදෑරු ලෙස්ටර්, වසර තුනකට පසු ලංකාවට පැමිණ රජයේ චිත්‍රපට අංශයේ කැමරාකරුවකු වු විලී බ්ලේක් හා ටයිටස් තොටවත්ත සමඟ එක්ව වෘත්තාන්ත චිත්‍රපටියක් නිර්මාණය කිරීමට අදහස් කළේය. ඒ අනුව බිහි වු “රේඛාව“ චිත්‍රටිය අධ්‍යක්ෂණය කරමින් සිනමා දිවිය ආරම්භ කළ ලෙස්ටර්, මෙරට සිනමා දිවියේ විප්ලවීය වෙනසක් ඇති කළ සිනමාවේදියෙකි. මෙම විප්ලවීය වෙනස සිංහල සිනමාවේ අනන්‍යතාවයක් ගොඩ නැඟීමට තරම් ප්‍රබල විය.
1964 දී චිත්‍රපට අධ්‍යක්ෂිකාවක් වු සුමිත්‍රා ගුණවර්ධන සමඟ විවාහ දිවියට ඇතුළත් වු ලෙස්ටර් ජේම්ස් පීරිස් මහතා,ගම්පෙරළිය, නිධානය, ගොළු හදවත, කලියුගය, අවරගිර, දෙළොවක් අතර,ගොළු හදවත, අක්කර පහ, මඩොල් දූව, අහසින් පොළොවට, වීර පුරන් අප්පු, අවරගිර, වෑකන්ද වලව්ව, අම්මාවරුනේ වැනි චිත්‍රපට රැසක් නිර්මාණය කරමින් දේශීය, විදේශීය සම්මානයට පාත්‍ර විය. එවකට ඉතා ජනප්‍රියව පැවැති ඉන්දියානු කොපි හා ඉන්දියන් චිත්‍රාගාර ආශ්‍රිත ව නිර්මාණය වු චිත්‍රපටවලින් තොරව දේශීය, ගැමි පවුල් පරිසර සම්බන්ධයෙන් වු ලෙස්ටර්ගේ චිත්‍රපට අතරින් බැද්දේගම චිත්‍රපටය ප්‍රංශ කාන්ස් ජාත්‍යන්තර සිනමා සම්මානය හිමි කර ගැනීමට සමත් විය.
එමෙන්ම ඔහුගේ නිර්මාණ ලන්ඩන් සිනමා උළෙල, මොස්කව් ජාත්‍යන්තර සිනමා උළෙල, මොස්කව් ළමා චිත්‍රපට උළෙල නියෝජනය කරමින් අන්තර්ජාතික සම්මාන හිමි කර ගැනීමට සමත් විය. වරක් ලෙස්ටර් ජේම්ස් පීරිස් මහතාගේ උපන්දිනය නිමිත්තෙන් 2002 දී මුද්දරයක් නිකුත් කිරීමට රජය කටයුතු කළ අතර 2003 දී පේරාදෙණිය විශ්වවිද්‍යාලයෙන් ගෞරව ආචාර්ය පදවියක් ද පිරිනමනු ලැබීය. ශ්‍රී ලංකාව ජාත්‍යන්තර තලයට ගෙන යාමට අනුපමේය සේවාවක් ඉටු කරනු ලැබු මෙරට ජ්‍යෙෂ්ඨතම සිනමාකරුවා වු ආචාර්ය ලෙස්ටර් ජේම්ස් පීරිස් මහතාට නිවන් සුව අත්වේවා යි ප්‍රාර්ථනා කරමු.
0 Comments