ලාංකේය සිනමාවට පුරෝගාමී මෙහෙවරක් කළ ආචාර්ය ලෙස්ටර් ජේම්ස් පීරිස් මහතාට උපහාර පිණිස “සිනෙපති ලෙස්ටර් ජේම්ස් පීරිස් ගම” නමින් උදා ගම්මානයක් සඳහා පෙරේදා (29) දින තිස්සමහාරාම ජූල්පල්ලම ග්‍රාමයේදී මුල්ගල් තැබිණි.
මෙම ගම්මානයට මුල්ගල් තබන ලද්දේ 99 වියැති ආචාර්ය ලෙස්ටර් ජේම්ස් පීරිස් මහතා අභාවප්‍රාප්ත වීමට පෙර දිනදී වීම විශේෂ සිද්ධියකි.
“සිනෙපති ලෙස්ටර් ජේම්ස් පීරිස් ගම” වත්මන් උදාගම්මාන වැඩපිළිවෙළ යටතේ ආරම්භ කළ 700 වැනි ගම්මානය වේ. එය හම්බන්තොට දිස්ත්‍රික්කය තුළ ඉදිකෙරෙන 139 වන උදා ගම්මානය මෙන්ම තිස්සමහාරාම මැතිවරණ කොට්ඨාසය තුළ ඉදි කෙරෙන 65 වන උදාගම්මානයද වෙයි.
උග්‍ර දරිද්‍රතාවයෙන් පෙළෙන පවුල් සඳහා නැවත අයකර ගනු නොලබන පදනමින් නිවාස ආධාර ලබාදීමේ වැඩසටහන යටතේ මෙම ගම්මානයේ ප්‍රතිලාභී පවුල් වෙත සිය නිවෙස් ඉදිකර ගැනීම සඳහා රුපියල් 500,000/- බැගින් ලබා දේ.
නිවාස හා ඉදිකිරීම් අමාත්‍ය සජිත් ප්‍රේමදාස මහතා ඉන්දීය රජයෙන් කළ ඉල්ලීම පරිදි ඉතා දිළිඳු පවුල් වෙනුවෙන් දිවයින පුරා උදා ගම්මාන 50ක් ඉදිකිරීම සඳහා පිරිනැමුණු රුපියල් ලක්ෂ 6,000 ආධාර වැඩසටහන යටතේ මෙම උදා ගම්මානය ඉදිකෙරේ.
0 Comments