පන්දුව පළුඳු කිරීමේ චෝදනාව හේතුවෙන් පැය දෙකකට ආසන්න කාලයක් ශ්‍රී ලංකා පිල පිටියට පිවිසීම ප්‍රමාද කිරීම කිසිලෙසකින් අනුමත කළ නොහැකි විනය කඩකිරීමක් බව ක්‍රීඩා අමාත්‍ය ෆයිසර් මුස්තාෆා පවසයි.
අද උදෑසන දිවයිනට පැමිණි ශ්‍රී ලංකා කණ්ඩායමට දැඩි ලෙස අවවාද කළ ක්‍රීඩා අමාත්‍යවරයා මින්පසු එවන් සිදුවීමක් ඇති නොවීමට වගබලාගත යුතු බව ද එහිදී අවධාරණය කර ඇත.
බටහිර ඉන්දීය කොදෙව් ටෙස්ට් තරගාවලිය අවසන් කරමින් ශ්‍රී ලංකා කණ්ඩායම දිවයිනට පැමිණිමෙන් අනතුරුව ශ්‍රී ලංකා ටෙස්ට් ක්‍රිකට් නායක දිනේෂ් චන්දිමාල් සහ අමාත්‍ය ෆයිසර් මුස්තාෆා මාධ්‍ය සාකච්ඡාවකට එක්විය.
ශ්‍රී ලංකා ටෙස්ට් ක්‍රිකට් නායක දිනේෂ් චන්දිමාල්
"පන්දුව පළුඳු කිරීමේ අරමුණින් මම කිසිදෙයක් කළේ නැහැ. ඒක නිසයි මම ඒ තීරණය අභියෝග කළේ. මම දන්නවා, කණ්ඩායම දන්නවා, අපි හිතට එකඟව වරදක් කළේ නැහැ කියලා. නමුත් ජාත්‍යන්තර ක්‍රිකට් කවුන්සිලය තීන්දුවක් අරන් තියෙනවා මට දඬුවම් කරන්න අපි ඒ නීතියට අවනත වෙනවා"
ශ්‍රී ලංකා ක්‍රිකට් කළමනාකරු අසංක ගුරුසිංහ
"නීතිරීති නොදැන නෙවෙයි, ඒක ඒ වෙලාවේ වෙච්ච දෙයක් හැඟීම්බරව, ඒකයි අපි වරද පිළිගත්තේ"
ක්‍රීඩා අමාත්‍ය ෆයිසර් මුස්තාෆා
"චන්දිමාල්ට තිබුණු ආදරය නිසා කණ්ඩායම ආවේගශීලිව හැසිරිලා තිබුණා. හැබැයි කිසිසේත්ම ඒක හරියි කියලා පිළිගන්න බැහැ, නමුත් ක්‍රිකට් ක්‍රීඩකයන් මට පැහැදිලි කළා ඒ අවස්ථාවේ ඒගොල්ලන්ගේ මානසිකත්වය, වැරදියි කියන ගමන්ම ඒගොල්ලන්ගේ මානසිකත්වය ගැනත් හිතන්න ඕනේ"
බටහිර ඉන්දීය කොදෙව් කණ්ඩායම සමග පැවති දෙවන ටෙස්ට් තරගය අතරතුර පන්දුව පළුඳු කිරීමේ චෝදනාව එල්ල විය.
0 Comments