මෙරට වාරි කර්මාන්තයේ අතීත දියුණුව යළි රට තුළ ඇති කරමින් කෘෂි කර්මාන්තයෙන් රට අස්වද්දා ස්වයංපෝෂිත ජාතියක් ලෙස නැඟී සිටීමේ වැඩපිළිවෙළ යටතේ වැව් 2400ක් ප්‍රතිසංස්කරණය කිරීමේ වැඩසටහනේ සමාරම්භය ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ඊයේ (02) පෙරවරුවේ සනිටුහන් කෙරිණි. දීර්ඝ කාලයක් පුරා ප්‍රතිසංස්කරණයට ලක් නොවූ උතුර, නැ‍ඟෙනහිර, වයඹ සහ උතුරු මැද පළාතේ පැරැණි වැව් 2400ක් මේ අනුව ප්‍රතිසංස්කරණය කෙරෙන අතර, ඒ යටතේ පොළොන්නරුව දිස්ත්‍රික්කයේ වැව් 123ක් සංවර්ධනය කෙරේ.
එහි පළමු වැව ලෙස මින්නේරිය, හිඟුරක්ගොඩ ප්‍රදේශයේ චන්දන පොකුණ වැවේ ප්‍රතිසංස්කරණ කටයුතු ඊයේ (02) පෙරවරුවේ ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ආරම්භ විය.
මේ වැව පුරාණ රජ දවසේ සිට පැවතෙන අතර, වගා බිම් අක්කර දහස් ගණනකට ජලය සපයයි. අක්කර අඩි 800ක ජල ධාරිතාවකින් යුක්ත වැවෙන් ප්‍රදේශයේ ගොවි පවුල් 300ක් පමණ ප්‍රතිලාභ ලබති. ‘පිබිදෙමු පොළොන්නරුව’ දිස්ත්‍රික් සංවර්ධන ව්‍යාපෘතිය යටතේ ශ්‍රී ලංකා යුද හමුදාවේ දායකත්වයෙන්
මෙහි ප්‍රතිසංස්කරණ කටයුතු සිදු කෙරේ.
මේ උත්සව සභාව ඇමතූ ජනාධිපතිවරයා වැඩි දුරටත් ප්‍රකාශ කළේ ගොවි ජනතාවගේ ආර්ථිකය ශක්තිමත් කිරීම මෙන්ම කෘෂිකර්මාන්තයට සහ ආහාර නිෂ්පාදන ක්‍රියාවලියට නව ජවයක් ලබා දී ජාතික ආර්ථිකය ශක්තිමත් කිරීම මේ වැඩසටහනේ අරමුණ බවයි.
පසුගිය රජයන් යටතේ ද මෙවන් වැඩසටහන් ක්‍රියාත්මක වුවත් විධිමත් සැලසුම් ඔස්සේ ඒවා ක්‍රියාත්මක නොවීම හේතුවෙන් එම ව්‍යාපෘති අසාර්ථක වූ බව මෙහි දී පෙන්වා දුන් ජනාධිපතිවරයා රටේ ගොවි ජනතාවට හොඳ ජීවන තත්ත්වයක් උදාකර දීම වෙනුවෙන් මේ වැඩසටහන සාර්ථක කර ගැනීමට දායකවීම සියලුදෙනාගේ වගකීමක් බව ද කියා සිටියේය.
0 Comments