සාධාරණ සහ නිදහස් මැතිවරණයක් පැවැත්වීම සඳහා සියලුම ජනමාධ්‍යවල සහයෝගය අවශ්‍ය බව මැතිවරණ කොමිසමේ සභාපති මහින්ද දේශප්‍රිය මහතා අවධාරණය කරයි.
සාධාරණ සහ නිදහස් මැතිවරණයක් පැවැත්වීම මැතිවරණ කොමිසන් සභාවට සහ පොලිස් දෙපාර්තමේන්තුවට පමණක් සිදුකළ නොහැකි බවත් ඒ සඳහා සියලුම දේශපාලන පක්ෂ සහ ස්වාධීන කණ්ඩායම් ඇතුළු අපේක්ෂකයින්, රටේ පුරවැසියන් සහ සියලුම ජනමාධ්‍යවල සහයෝගය අවශ්‍ය බවත් මහින්ද දේශප්‍රිය මහතා පැවසීය.
සාධාරණ, අපක්ෂපාතී හා නිදහස් මැතිවරණයක් උදෙසා සියලු ජනමාධ්‍ය ආයතන විසින් පිළිපැදිය යුතු මාර්ගෝපදේශ 32කින් සමන්විත මාධ්‍ය උපමාන මාලාවක් හඳුන්වාදෙමින් මැතිවරණ කොමිසන් සභාවේ සභාපති මහින්ද දේශප්‍රිය මහතා ඊයේ (26) මේ බව ප්‍රකාශ කෙළේය.
සෑම රූපවාහිනී, ගුවන් විදුලි සහ මුද්‍රිත මාධ්‍යක්ම මැතිවරණය සම්බන්ධයෙන් වාර්තා කිරීමේදී මධ්‍යස්ථ සහ අපක්ෂපාතී විය යුතුය යන්න එහි පළමුවැන්න බව ද සභාපතිවරයා කීය.
සෑම මාධ්‍ය ආයතනයක්ම සිය ප්‍රවෘත්ති, දේශපාලන කටයුතු හා සම්බන්ධ වෙනත් වැඩසටහන් ප්‍රචාරය හෝ විකාශය කිරීමේදී නිවැරදි, සමතුලිත සහ අපක්ෂපාතී තොරතුරු ලබාදිය යුතුය.
එමෙන්ම, යම් දේශපාලන පක්ෂයකට, ස්වාධීන කණ්ඩායමකට හෝ අපේක්ෂකයකුට අසාධාරණයක් සිදු නොවන පරිදි හා විශේෂ වාසියක් ඇති නොවන පරිදි ගුවන් කාලය ලබාදීම හෝ ප්‍රවෘත්ති පත්‍රයක ඉඩ වෙන්කරදිය යුතු යැයි ද මහින්ද දේශප්‍රිය මහතා සඳහන් කෙළේය.
රාජ්‍ය හා පෞද්ගලික මාධ්‍ය ආයතන ප්‍රධානීන්, ජනමාධ්‍යවේදීන් ඇතුළු පිරිසක් සමඟ කොළඹ, නාරාහේන්පිට පිහිටි රජයේ ප්‍රවෘත්ති දෙපාර්තමේන්තුවේ ඊයේ (26) පෙරවරුවේ පැවැති විශේෂ සාකච්ඡාවකට එක්වෙමින් මහින්ද දේශප්‍රිය මහතා මේ බව කියා සිටියේය. ඉදිරි මැතිවරණය සමයේ රටේ ජනමාධ්‍ය ක්‍රියා කළ යුතු අංකාරය වැඩිදුරටත් පැහැදිලි කළ මැතිවරණ කොමිසමේ සභාපතිවරයා, ප්‍රවෘත්ති පත්‍රවල කර්තෘ වාක්‍ය පිළිබඳ විද්‍යුත් මාධ්‍ය මඟින් අදහස් දැක්වීමේදී ව්‍යාකූල සහ පක්ෂපාතිවීමට ඉඩ ඇති බැවින් ප්‍රවෘත්ති පත්‍රවල කර්තෘ වාක්‍ය පිළිබඳ අදහස් නොදැක්විය යුතු බව ද කීය.
කර්තෘ මතයක් ප්‍රචාරය කිරීම, විකාශය කිරීම හෝ පළ කිරීම කරනු ලබන කවර හෝ අවස්ථාවකදී ඉන් අගතියට පත් පාර්ශවයට හා එම මතයට විරුද්ධව ඉදිරිපත් කරනු ලබන ප්‍රචාරය කිරීමට, විකාශය කිරීමට හෝ පළ කිරීමට අවස්ථාව ලබාදිය යුතු වේ. රූපවාහිනී, ගුවන් විදුලි නාලිකාවක වැඩසටහන් ඉදිරිපත් කරනු ලබන හෝ නිවේදනය කරනු ලබන සෑම තැනැත්තෙකුම පුවත්පත් වැඩසටහන්වලදී පුවත්පත් සිරස්තල සහ කාටුන් විස්තර ඉදිරිපත් කිරීමේදී එක් පාර්ශවයක් ප්‍රවර්ධනය කරන හෝ තවත් පාර්ශවයකට අගතියක් ගෙන දෙන අයුරින් සිය පුද්ගලික අදහස් ප්‍රකාශ කිරීමෙන් වැළැකිය යුතු වේ.
ඡන්ද විමසීමේ කාලසීමාව තුළ ජනාධිපතිවරයා හෝ අගමැතිවරයා හෝ යම් ඇමැතිවරයකු මත හෝ අදහස් ප්‍රකාශ කරන අවස්ථාවක් ගුවන් විදුලියෙන් හෝ රූපවාහිනියෙන් ආවරණය කරන අවස්ථාවක එය එම තැනැත්තා අයත්වන දේශපාලන පක්ෂයට දෙන ආවරණයක් ලෙස සැලැකිය යුතුය. එහෙයින් එම මැතිවරණය තරග කරන යම් ප්‍රතිවාදී දේශපාලන පක්ෂයක නායකයකුට ද වැඩසටහන්වලදී ඒ හා සමාන අවස්ථාවක් ලබාදිය යුතු වේ. මුද්‍රිත මාධ්‍ය ද ඒ අයුරින්ම විශේෂ සාකච්ඡා පළ කිරීමේදී සහ ප්‍රචාරක රැස්වීම් වාර්තා පළ කිරීමේදී සියලු දේශපාලන පක්ෂවලට, ස්වාධීන කණ්ඩායම්වලට, අපේක්ෂකයින්ට සමාන ඉඩක් හා ප්‍රමුඛතාවයක් ලබාදිය යුතු වේ. නිල වශයෙන් පිළිගත හැකි නොවන සංවිධාන, පුද්ගලයින් ලබාදෙන දැන්වීම් ප්‍රචාරය නොකළ යුතුය.
කලින් සිටි පක්ෂයක් ගැන වෙනත් පක්ෂයකට පැමිණ කරන ප්‍රකාශ කලින් සිටි පක්ෂයේ අයගේ අවසරයකින් තොරව පළ නොකළ යුතුය.
මේ අන්දමට මැතිවරණ කොමිසන් සභාව මාධ්‍ය වෙත ලබාදෙන මාධ්‍ය උපමාන ක්‍රියාත්මක කිරීම නීතියෙන්ම පමණක් කළ හැක්කක් නොවන බව කී මහින්ද දේශප්‍රිය මහතා එය ක්‍රියාත්මක කිරීමේ වගකීමක් වගකිවයුතු සැමදෙනාටම ඇතැයි කීය. මේ මාධ්‍ය උපමාන බිඳදමා කටයුතු කරන මාධ්‍ය ආයතන පිළිබඳව මැතිවරණ පැමිණිලි පිළිබඳ නිත්‍ය නියෝජිත කමිටුව සහ මාධ්‍ය උපමාන පිළිබඳ නිත්‍ය නියෝජිත කමිටුව නිරන්තරයෙන් නිරීක්ෂණය කරන බව ද සභාපතිවරයා කීය.
මේ විශේෂ හමුවට ජාතික මැතිවරණ කොමිසමේ සාමාජික ජනාධිපති නීතිඥ එන්. ජේ. අබේසේකර, සහකාර මැතිවරණ කොමසාරිස් එම්. එම්. මොහොමඩ්, රජයේ ප්‍රවෘත්ති අධ්‍යක්ෂ ජනරාල් සුදර්ශන ගුණවර්ධන මහත්වරු එක්ව සිටියහ.
0 Comments