සරම්ප රෝගය සම්පූර්ණයෙන් තුරන් කළ 5 වැනි අග්නිදිග ආසියාතික රට බවට ශ්‍රී ලංකාව පත් වී ඇති බව ලෝක සෞඛ්‍ය සංවිධානය නිවේදනය කරයි.
ඒ සඳහා පිරිනැමුණු ඇගයීම් සහතික පත්‍රය සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා වෙත පිරිනමනු ලැබීය.
ඒ ඉන්දියාවේ නවදිල්ලි නුවර පැවැත්වෙන ලෝක සෞඛ්‍ය සංවිධානයේ අග්නිදිග ආසියානු කලාපයීය 72වන සමුළුව අතරතුරදීය.
ලෝක සෞඛ්‍ය සංවිධානය මඟින් ක්‍රියාත්මක ප්‍රමුඛතා වැඩසටහනක් ලෙස 2014 වසරේ සිට මෙම සරම්ප රෝග මර්දන වැඩසටහන ශ්‍රී ලංකාව තුළ ක්‍රියාත්මක කෙරිණි. ලෝක සෞඛ්‍ය සංවිධානයේ අග්නිදිග ආසියානු කලාපයීය අධ්‍යක්ෂිකා වෛද්‍ය පූනම් කෙත්‍රපාල් කපූර් මහත්මිය ඇතුළු ලෝක සෞඛ්‍ය සංවිධානයේ නියෝජිතයන් අතින් මෙම පිරිනැමීම සිදු විය.
මීට පෙරද අවස්ථා රැසකදී මෙරට සෞඛ්‍ය සේවාව ලෝක සෞඛ්‍ය සංවිධානය විසින් ඇගයීමට ලක් කෙරුණු අතර එම සෞඛ්‍ය ව්‍යාපෘතිවල සාර්ථකත්වය මත ලෝක සෞඛ්‍ය සංවිධානයේ පළමු උප සභාපති වශයෙන් තේරී පත්වූ අමාත්‍ය රාජිත සේනාරත්න මහතා මෙරට නිදහස් සෞඛ්‍ය උදෙසා සිදු කළ අනුපමේය මෙහෙය වෙනුවෙන් පිට පිටම දෙවන වරටත් එම ධුරයට පත් කිරීම සිදු කෙරිණි. ශ්‍රී ලංකාවේ නිදහස් සෞඛ්‍ය සේවාව මෙතරම් දියුණු මට්ටමක් දක්වා වර්ධනය කර තිබීම පිළිබඳ ලෝක සෞඛ්‍ය සංවිධානය, ලෝක සෞඛ්‍ය සංවිධානයේ අග්නිදිග ආසියානු කලාපයීය කමිටුව මෙන්ම අග්නිදිග ආසියානු රටවල සෞඛ්‍ය අමාත්‍යවරුන්ද සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා වෙත සිය සුබාසිංශන පිරිනමනු ලැබීය.
0 Comments