සමාජ උන්නතිය ගැන සිතාසෞඛ්‍ය උපදෙස් අනුවකොරෝනා මඬින්න සැවොම ක්‍රියා කළ යුතුයි

Author(s): 

ධනුෂ්ක ගොඩකුඹුර

සර්ව පාක්ෂික හමුවේදී අගමැති කියයි

කොරෝනා මර්දනය කිරීමේ සටනේ දී සමස්ත සමාජයේ උන්නතිය පිළිබඳ අවධානය යොමු කරමින් සියලු දෙනා සෞඛ්‍ය විශේෂඥවරුන්ගේ උපදෙස් මත ක්‍රියා කළ යුතු බව අගමැති මහින්ද රාජපක්ෂ මහතා ප්‍රකාශ කළේය.

අගමැති මහින්ද රාජපක්ෂ මහතා මෙසේ ප්‍රකාශ කළේ පාර්ලිමේන්තුව නියෝජනය කළ සියලු පක්ෂ නායකයන්ගේ සහභාගීත්වයෙන් අරලියගහ මන්දිරයේ දී ඊයේ (02) පැවැති සර්ව පාක්ෂික හමුවට සහභාගී වෙමිනි.

සාකච්ඡාව ආරම්භ කරමින් අදහස් දැක් වූ අගමැති මහින්ද රාජපක්ෂ මහතා කොරෝනා මර්දනයට රජය ගෙන ගිය වැඩපිළිවෙළ සම්බන්ධයෙන් කෙටි පැහැදිලි කිරීමක් සිදු කළේය. අනතුරුව රාජ්‍ය නිලධාරීන්ට කරුණු ඉදිරිපත් කිරීමටත් පක්ෂ නායකයන්ගේ ගැටලු නිරාකරණය කර ගැනීමටත් අගමැතිවරයා අවස්ථාව ලබාදුන්නේය.

එහි දී සෞඛ්‍ය සේවා අධ්‍යක්ෂ ජෙනරාල් අනිල් ජාසිංහ මහතා තත්ත්වය සම්බන්ධයෙන් මෙසේ පැහැදිලි කළේය.

මාර්තු 01වැනිදා සිට මේ දක්වා අපට රෝගීන් 143 දෙනකු වාර්තා වෙලා තියෙනවා. ඉන් 66 දෙනෙක් විදේශවල සිට ආ අය වන අතර 74දෙනකු රට තුළින් වාර්තා වෙලා තියෙනවා. මේ පිරිස අතර විදේශිකයන් 3 දෙනකු ඉන්නවා. කොළඹ රෝගීන් 34ක්, කළුතර රෝගීන් 22ක්, ගම්පහ 11ක්, පුත්තලමේ 15ක් සහ අනෙකුත් දිස්ත්‍රික්කවල සුළු වශයෙනුත් රෝගීන් වාර්තා වෙලා තියෙනවා. මේ පිරිස අතරින් බහුතරය පිටරටින් ආ අය හෝ පිටරට සිට ආ අය සමඟ සම්බන්ධතා පැවැත්වූ අයයි. තවමත් මේ රෝගය සංවෘත සමාජ තීරුවකයි පැතිරෙමින් තිබෙන්නේ. එම නිසා රෝගය තවමත් සමාජයට ඇවිත් තිබෙන බව සලකන්න බැහැ.

ඉතාලියේ සිට පැමිණි අයගෙන් තමයි ලොකුම ප්‍රශ්නය මතු වුණේ. ඉන්දියාව, එක්සත් රාජධානිය සහ ජර්මනියෙනුත් ගැටලු තිබුණා. මේ වන විට ඉතාලියේ තර්ජනය සම්පූර්ණයෙන් පහ වෙලා තිබෙනවා. නිරෝධායන මධ්‍යස්ථානවලින් රෝගීන් 33 දෙනකු සහ ඉන් පිටත රෝගීන් 110ක් වශයෙන් තමයි වාර්තා වෙලා තියෙන්නේ. වයස අවුරුදු 42-50 අතර රෝගීන් ප්‍රමාණය සියයට 29ක්. වයස වැඩි වන විට මේ රෝගයේ සංකූලතා වැඩි වෙනවා. වයස අවුරුදු 60ට වැඩි රෝගීන් සියයට 7ක්, 70- 80 අතර රෝගීන් සියයට 3.5ක් වශයෙන් වාර්තා වෙලා තියෙනවා.

පළමු රෝගියා වාර්තා වුණේ මාර්තු මස 11 වැනි දා. 12 වැනි දා දෙවැනි රෝගියා වාර්තා වුණා. එදිනම අපි පාසල්, විශ්වවිද්‍යාල වහලා, ඔන් එරයිවල් වීසා අත්හිටුවන්න කටයුතු කළා. මාර්තු මාසේ 13 වැනි දා ස්වයං නිරෝධායන සම්බන්ධ මාර්ගෝපදේශන නිකුත් කළා. මාර්තු මාසේ 14 වැනි දා ඉතාලිය, දකුණු කොරියාව, ඉරානය වගේ රටවලින් මෙරටට පැමිණීම අත්හිටෙව්වා. මාර්තු මාසේ 15 වැනි දා එම තහනම තවත් රටවල් කිහිපයක් දක්වා දීර්ඝ කලා. 16 වැනි දා ජාතික කොරෝනා මර්දන මධ්‍යස්ථානය නම් කළා. එදිනම නිවාඩු දිනයක් ප්‍රකාශයට පත් කළා.

මේ වගේ දිනෙන් දින අවශ්‍ය සියලු ක්‍රියාමාර්ග රජය විසින් ගත්තා. මේ රෝගය සම්බන්ධයෙන් වන පී. සී. ආර් පරීක්ෂණය මේ වන විට 3007 දෙනකු සඳහා කර තිබෙනවා. මේ ප්‍රමාණයෙන් සියයට 5කට අඩු ප්‍රමාණයක් තමයි පොසිටිව් වෙලා තියෙන්නේ. 100ක් පරීක්ෂා කළාම පහකට අඩු ප්‍රමාණයක් පොසිටිව් වෙනවා නම් පේනවා අපට මේ රෝගය තවම ව්‍යාප්ත වෙලා නැති බව. අප මේ වන විට රෝගීන් 2,000කට ප්‍රතිකාර කරන්නට අවශ්‍ය පහසුකම් සලසා තිබෙනවා.

අත්‍යවශ්‍ය සේවා පිළිබඳ ජනාධිපති කාර්ය සාධක බළකායේ ප්‍රධානී බැසිල් රාජපක්ෂ මහතා,

මේ රෝගය මෙරටින් වාර්තා වීමත් සමඟ ජනාධිපතිවරයා කාර්ය සාධක බළකායක් පත් කර සෞඛ්‍ය ඇමැතිවරියගේ දේශපාලන නායකත්වයෙන් සෞඛ්‍ය නිලධාරීන් සහ ත්‍රිවිධ හමුදා ඇතුළු ආරක්ෂක අංශයේ නිලධාරීන්ගේ දායකත්වයෙන් සෞඛ්‍ය අංශයෙන් මේ අභියෝගයට මුහුණ දීමට අවශ්‍ය පියවර ගත්තා. සෞඛ්‍යමය අංශයෙන් ගන්නා තීන්දු තීරණ නිසා සමාජයට ඇති වූ බලපෑම අවම කිරීම අපේ කාර්ය සාධක බළකායට පැවරී තිබෙනවා. අපට මුලින් සිදුවුණා මෙරටේ අත්‍යවශ්‍ය සේවා මොනවාද කියන එක හඳුනා ගන්න .ඒ අනුව විදුලිය, ජලය, ඉන්ධන, ගෑස්, කසළ කළමනාකරණය, මහාමාර්ග සහ විදුලි සංදේශ කියන අංශ හත අපි අත්‍යවශ්‍ය සේවා ලෙස හඳුනා ගත්තා. මේ සෑම අංශයක්ම අපි එකහා සමානව අවධානය යොමු කොට නිසි ලෙස ක්‍රියාත්මක කළ යුතුයි.

ඊළඟට අපි අත්‍යවශ්‍ය ආහාර සහ ඖෂධ සැපයීම සම්බන්ධයෙන් අවශ්‍ය ක්‍රියාමාර්ග ගත්තා. හාල්, එළවළු, බිත්තර, මස් වැනි අත්‍යවශ්‍ය ආහාර මේ යටතේ හඳුනා ගනු ලැබුවා. රජය කලින් ගත් තීන්දුවක් අනුව සැමන් සහ පරිප්පු මිල පහත හෙළීම නිසා ඒවාට ලොකු ඉල්ලුමක් රට තුළ මතුව තිබුණා. අපි මුලින්ම තේරුම් ගත්තා මේ අංශයේ කොටස් තුනක් තියෙන බව. ඒ අනුව අතේ සල්ලි ඇති නමුත් භාණ්ඩ මිල දී ගත නොහැකි වූ පිරිස් වෙනුවෙන් භාණ්ඩ බෙදාහැරීමට පියවර ගත්තා. ඒ සඳහා දිස්ත්‍රික් ලේකම්වරුන් ප්‍රමුඛ නිලධාරීන්ගේ දායකත්වයෙන් මෙහෙයුමක් ආරම්භ කළා.

ඊළඟට බැංකුවේ මුදල් ඇති නමුත් එම මුදල් ලබාගත නොහැකි වූ පිරිස්වලට එම මුදල් ලබාදීමට අවශ්‍ය පියවර ගත්තා. ඒ අනුව බැංකු අත්‍යවශ්‍ය සේවාවක් කරලා ඒවා විවෘත කරන්න කටයුතු කළා. අද වන විට විශ්‍රාම වැටුප බැංකුවට යවලා තියෙනවා. 58,000කට තැපැල් දෙපාර්තමේන්තුව මගින් මුදල් ගෙදරටම යවලා තිබෙනවා. ඉතුරු 645,179ට බැංකුවට යෑමට වගේම අවශ්‍ය නම් ඖෂධ මිල දී ගැනීමට යෑමටත් ප්‍රවාහන පහසුකම් සලසා තිබෙනවා.

අනතුරුව බැංකුවේවත් අතේවත් මුදල් නොමැති පිරිස් වෙත ජනාධිපති සහ අගමැතිවරයා සාකච්ඡා කර විශේෂ සහනයක් ලබාදීමට කටයුතු කළා. ඒ අනුව වැඩිහිටි දීමනාව ලබන 416,764කට සහ පොරොත්තු ලේඛනයේ සිටින 142,345කට රුපියල් 5000 බැගින් ජාතික වැඩිහිටි ලේකම් කාර්යාලය හරහා ලබාදෙන්න කටයුතු කළා. අවුරුදු 100 ඉක්ම වූ 400 දෙනා රජයෙන් දීමනාවක් ලබනවා. තවත් 152ක් ඒ සඳහා සුදුසුකම් ලබා සිටිනවා. ඒ සියලුදෙනාටත් රුපියල් 5000 බැගින් ගෙවන්න කටයුතු කරනවා.

ආබාධිත තැනැත්තන් 84,171කට සහ පොරොත්තු ලේඛනයේ සිටින 37,229කටත් රුපියල් 5,000 බැගින් ගෙවන්න කටයුතු කරනවා. වකුගඩු රෝගී දීමනා ලබන 25,320කට සහ පොරොත්තු ලේඛනයේ සිටින 13,850කට මේ සතිය තුළ රුපියල් 5,000 බැගින් ගෙවන්න කටයුතු කරනවා. සමෘද්ධිලාභීන් 1,798,655කට රුපියල් 10,000 බැගින් ගෙවන්න තීන්දු කර එහි පළමු රුපියල් 5,000 ගෙවීමේ කටයුතු අද අවසන් කිරීමට බලාපොරොත්තු වෙනවා. ඒ වගේම සමෘද්ධි හිමිකමට සුදුසුකම් ලැබූ සහ පසුගිය වසරේ දීමනාව නොලැබුණු 600,339කටත් මේ දීමනාව හිමිවෙනවා. ගොවි විශ්‍රාම වැටුප් ලැබූ 160675කටත් මේ දීමනාව ලැබෙනවා. ඒ හැර රාජ්‍ය සේවක සහ විශ්‍රාමිකයන්ටත් ඔවුන්ගේ වැටුප් ගෙවීමට කටයුතු කර තිබෙනවා. මේ අනුව සමස්තයක් වශයෙන් 5,304,010කට රජයේ සහන හිමිවෙනවා.

මේ අතර ග්‍රාමීය ආර්ථිකය කඩා නොවැටී පවත්වාගෙන යෑම සඳහා සෞඛ්‍යමය ප්‍රමිතීන්ට බාධාවක් නොවන පරිදි කෘෂිකාර්මික කටයුතු කරන්න අවසර ලබා දී තිබෙනවා. ඒ අනුව අම්පාර කුඹුරු වපුරන්න අවශ්‍ය පහසුකම් සලසා තිබෙනවා. ඒ වගේම පොළොන්නරුවේ මේ දවස්වල කුඹුරු අස්වනු නෙළනවා. ඒ අයටත් අවශ්‍ය පහසුකම් සලසා තිබෙනවා .අනෙකුත් කෘෂිකාර්මික කටයුතුවලටත් ඇඳිරි නීතිය බලනොපාන ආකාරයට අවශ්‍ය පහසුකම් දීලා තිබෙනවා. වැවිලි ක්ෂේත්‍රයට අයත් කුඩා සහ මහා පරිමාණ තේ වතුවලට දලු නෙළීම සහ දලු ප්‍රවාහනයට අවසර ලබා දී තිබෙනවා. ධීවරයන්ටත් ඇඳිරි නීතිය බල නොපාන අන්දමට කටයුතු කරන්න ඉඩකඩ සලසා තිබෙනවා. පශු සම්පත් ක්ෂේත්‍රය ගැනත් අප අවශ්‍ය කටයුතු කළා.

ඒ වගේම සැපයුම් ජාලයට අවශ්‍ය වන නිෂ්පාදන කරන්නට කුඩා කර්මාන්තකරුවන්ට අවසර දී තිබෙනවා. ජාතික ආර්ථිකය ගත්තොත් බැංකු විවෘතයි. වරාය විවෘතයි. ආයෝජන මණ්ඩලයේ අත්‍යවශ්‍ය සේවා අඛණ්ඩව කරගෙන යෑමට අවසර දී තිබෙනවා. ආයෝජකයන්ට ඔවුන්ගේ අපනයනවලට මුදල් නොලැබුණු ගැටලුවක් තිබෙනවා.

මේ සියලු කටයුතු සඳහා රාජ්‍ය ව්‍යුහය දායක කරගත්තා. පළාත් සභා 9ක් ආණ්ඩුකාරවරුන් යටතේ ක්‍රියාත්මක වෙනවා. දිස්ත්‍රික්ක 25ක දිස්ත්‍රික් ලේකම්වරුන් සිටිනවා. ප්‍රාදේශීය ලේකම් කොට්ඨාස තුන්සිය ගණනක්, පළාත් පාලන කොට්ඨාස 4000 ගණනක්, ග්‍රාමසේවා වසම් 14000ක් තුළ මේ කටයුතු සිදුකෙරෙනවා. ඖෂධ බෙදාහැරිමට තැපැල් දෙපාර්තමේන්තුව ස්වෙච්ඡාවෙන්ම ඉදිරිපත් වෙලා එම ඖෂධ නිවෙස්වලටම ගෙනිහින් දෙන්න වැඩපිළිවෙළක් සකස් කළා. ඒ වගේම අපි ස්ථාපිත කළ දුරකථන මධ්‍යස්ථානය වෙත මේ වන විට ලැබුණු පැමිණිලි සියල්ලම අදාළ ප්‍රාදේශීය ලේකම් කොට්ඨාස වෙත යොමු කොට අවශ්‍ය පිළිතුරු ලබාදී තිබෙනවා.

වැඩ බලන ආරක්ෂක මාණ්ඩලික ප්‍රධානී සහ යුද හමුදාපති ලුතිනන් ජෙනරාල් ශවේන්ද්‍ර සිල්වා මහතා,

නිරෝධායන මධ්‍යස්ථාන 48ක 3600 පිරික් නිරෝධායනයට ලක් කළා. ඉන් 2,000ක පමණ පිරිසක් නිරෝධායනය වෙලා නිවෙස් කරා ගොස් තිබෙනවා. යාපනය අර්ධද්වීපයේ කොරෝනා ආසාදිත පූජකවරයකු කරපු දේව මෙහෙයකට ගිය පිරිස අතරින් තුන්දෙනකුට පමණ රෝගය වැළඳී තිබෙනවා. ඒ සියලුදෙනා අපි නිරෝධායනයට ලක් කරන්න කටයුතු කළා. අටලුගම සහ අකුරණ ප්‍රදේශ වසා දැමීමට පියවර ගෙනා තිබෙනවා. බේරුවල ප්‍රදේශයේ ඊයේ රාත්‍රියේ සිදුවීමක් වාර්තා වුණා. ඒකට සම්බන්ධ සියලුදෙනා නිරෝධායනයට යොමු කළා. මේ රෝගය සමාජය තුළ පැතිරවීම වැළක්වීමට සියලු ක්‍රියාමාර්ග අප ගෙන තිබෙනවා.

හිටපු කතානායක කරු ජයසූරිය මහතා,

අප රජයට ස්තූතිය පුද කරනවා මේ රෝගය වැළක්වීමට ගෙන ඇති ක්‍රියාමාර්ග සම්බන්ධයෙන්. ත්‍රිවිධ හමුදාව සහ සෞඛ්‍ය කාර්යමණ්ඩලයේ කටයුතු සම්බන්ධයෙන් අප ස්තුතිවන්ත වෙනවා. කාරණා කිහිපයක් ගැන මම කතා කරන්න කැමැතියි. විශේෂයෙන් 2003 වසරේ හට ගත් ගංවතුර තත්ත්වයත් සමඟ ස්ථාපිත කළ ආපදා කළමනාකරණ යාන්ත්‍රණය සම්බන්ධයෙන් අවධානය යොමු කරන්න කියලා කියන්න කැමැතියි.

ඒ වගේම දවස් පඩි ගන්න මිලියන 6ක් පමණ වන පිරිස ගැනත් අවධානය යොමු කරන්න ඕනේ. ඉන්දියාවේ මෝදි අගමැතිවරයා එවැනි පිරිස් වෙනුවෙන් බැංකු ගිණුම් විවෘත කරන්න කටයුතු කළා. ඒ ගිණුම්වලට තමයි රජයේ මුදල් යොමු කරන්නේ. ඒ ගැනත් කල්පනා කරන්න ඕනේ.

සෞඛ්‍ය ඇමැතිනි පවිත්‍රා වන්නිආරච්චි මහත්මිය,

ආපදා කළමනාකරණ යාන්ත්‍රණය අපි කාර්ය සාධක බළකාය සමඟ සම්බන්ධ කර ක්‍රියාවට නංවා තිබෙනවා.

හිටපු විපක්ෂ නායක සජිත් ප්‍රේමදාස මහතා,

කොරෝනා මර්දනය වෙනුවෙන් සෞඛ්‍ය නිලධාරීන්, ත්‍රිවිධ හමුදා සහ පොලිසිය, රාජ්‍ය නිලධාරීන් ඇතුළු ක්ෂේත්‍ර ගණනාවක නිලධාරීන් කටයුතු කරන ආකාරය සම්බන්ධයෙන් අපි ස්තූතිය පුද කරන්න කැමැතියි. අනිල් ජාසිංහ මහතා ප්‍රකාශ කළා පී. සී. ආර්. පරීක්ෂණ සම්බන්ධයෙන්. මේ පරීක්ෂාවන් ප්‍රමාණවත් නැති බවයි අපේ අදහස. දැනට පරීක්ෂණ 3,007ක් කර තිබෙනවා. රෝගීන් 143 දෙනකු හඳුනාගෙන තිබෙනවා. පරීක්ෂණ ප්‍රමාණය ඉක්මණින් ව්‍යාප්ත කළ යුතුයි. ඒ වගේම අවශ්‍ය උපකරණත් වැඩි කළ යුතුයි.

මම බැසිල් රාජපක්ෂ මහතාට කියන්න කැමැතියි දඹුල්ල ආර්ථික මධ්‍යස්ථානයේ මැතුව ඇති තත්ත්වය ගැන. නිසි කළමනාකරණයකින් කටයුතු කළොත් අපට පුළුවන් ආහාර හිඟයට වගේම සහන මිලට භාණ්ඩ ලබාදීමත් පහසු කරවන්න. ඒ වගේම සහන ලබාදීමේ යාන්ත්‍රණය මහජන නියෝජිතයන්ගෙන් තොරව රාජ්‍ය නිලධාරීන්ගෙන් පමණක් කරන්න කියලා ඉල්ලා සිටිනවා.

බැසිල් රාජපක්ෂ මහතා,

ආහාර අවශ්‍යතාව සම්බන්ධයෙන් පුරෝකථන කෘෂිකර්ම දෙපාර්තමේන්තුවෙන් අප ලබාගෙන තිබෙනවා. බඩඉරිඟු, ලූණු, කව්පි, මුංඇට, රට කජු, උඳු, සෝයා වගේ සියලු ආහාර අවශ්‍යතාව සහ නිෂ්පාදනය කළ යුතු ප්‍රමාණය අප සතුව තිබෙනවා. ඒවාට අවශ්‍ය බීජ ලබාගැනීම වගේම භූමිය වෙන් කිරීමේ කටයුතුත් සිදුකෙරෙමින් තිබෙනවා. දඹුලු ආර්ථික ම්‍යස්ථානයේ ගැටලුව ගතහොත් සෞඛ්‍ය අංශයේ අදහස වී තිබෙන්නේ ආර්ථික ම්‍යස්ථාන නිසා කොරෝනා පැතිර යෑමේ අවදානමක් ඇති බවයි. රජයේ වෛද්‍ය නිලධාරීන්ගේ සංගමය අපට දැඩිව කියා සිටිනවා ආර්ථික මධ්‍යස්ථාන සම්බන්ධයෙන් සලකා බලන්න කියලා. අද ඒ ගැන සාකච්ඡා කරන්න බලාපොරොත්තු වෙනවා.

සහන ලබාදීම රාජ්‍ය යාන්ත්‍රණය තුළින් තමයි සිදුකරන්නේ. නමුත් පක්ෂ භේදයකින් තොරව මහජන නියෝජිතයන්ටත් ඒකට අවස්ථාව දෙන්න ඕනේ. හැමෝටම මේක අධීක්ෂණය කරන්න ඉඩ දීලා තිබෙනවා. ජනතා නියෝජිතයන් නැතිනම් පැමිණිලි ඒම වැඩිවෙයි. නිර්පාක්ෂිකව, දේශපාලනයෙන් තොරව කරන්න බලාපොරොත්තු වෙනවා. යම් යම් අඩුපාඩු තිබෙන්න පුළුවන්. අපි ඒවා ඒ මොහෙතම නිවැරැදි කරනවා. සමෘද්ධිලාභීන්ට රුපියල් 10,000ක දීමනාවක් දෙන්න කියලා ජනාධිපතිවරයා උපදෙස් දී තිබෙනවා. එයින් පළමු වාරිකය වශයෙන් රුපියල් 5,000ක් අද දෙනවා. හැම කෙනකුටම ඒ දීමනාව ලැබෙනවා. සමෘද්ධි දීමනාවට අමතරවයි මේ 5000 දෙන්නේ.

ජනතා විමුක්ති පෙරමුණේ හිටපු පාර්ලිමේන්තු මන්ත්‍රී විජිත හේරත් මහතා,

ඖෂධ බෙදාහැරීම සම්බන්ධයෙන් ගැටලු තිබෙනවා. ඒ සඳහා ජංගම සේවාවක් ආරම්භ කරන්න පුළුවන් නම් හොඳයි.

බැසිල් රාජපක්ෂ මහතා,

ඖෂධ අධිකාරිය ඒකට අවසර දෙන්නේ නැහැ. ප්‍රමිතිය ගැන ඒ අය අකුරටම සොයා බලනවා. රෝගියකු නැතිව තැපැල් දෙපාර්තමේන්තුව හරහා ඖෂධ නිකුත් කිරීමේ කාර්යයටත් විශේෂ අවසරයක් ලබාගන්න සිද්ධ වුණා.

අගමැති මහින්ද රාජපක්ෂ මහතා,

ඒ ගැන සොයා බලා අවශ්‍ය ක්‍රියාමාර්ග ගන්න.

දයාසිරි ජයසේකර මහතා,

ඖෂධ සමාගම්වලට සිටින අලෙවි නියෝජිතයන් හරහා අවශ්‍ය නම් ඖෂධ බෙදාහැරීම කරන්න පුළුවන්. සෞඛ්‍ය වෛද්‍ය නිලධාරීන් සමඟ එක්ව ඒ කාර්යය කරන්න ඔවුන් කැමැතියි.

මුස්ලිම් කොංග්‍රසයේ නායක රාවුෆ් හකීම් මහතා,

ආරක්ෂක අංශ සහ පොලිසිය ආසාදිතයන් හඳුනා ගැනීම සහ ඔවුන් නිරෝධායනය කිරීම ඉතාමත් හොඳින් ක්‍රියාවට නංවා තිබෙනවා. ගැටලු මතුව ඇති අටලුගම සහ අකුරණ වගේ ප්‍රදේශවල ආහාර සහ ඖෂධ බෙදාහැරීමේ ගැටලු තිබෙනවා. ආසාදනය නොවූ මුහුදුබඩ ප්‍රදේශවල ධීවර කර්මාන්තයට අවහිරතා තිබෙනවා. ඒ සඳහා ක්‍රමවේදයක් සකස් කළ යුතුයි.

මනෝ ගනේෂන් මහතා,

මේ සාකච්ඡාවට සම්බන්ධ වෙන්න ලැබීම ගැන සතුටු වෙනවා. ආරක්ෂක අංශ, සෞඛ්‍ය නිලධාරීන්ට ස්තුති කරනවා. අපි විශ්වාස කරනවා මේ කොරෝනා වසංගතය තුරන් කර යවන්න අපට පුළුවන් කියලා. ඒ නිසා බැසිල් රාජපක්ෂ මහතාගෙන් ඉල්ලා සිටිනවා වතු කම්කරුවන්ගේ ගැටලු සම්බන්ධයෙන් අවධානය යොමු කරන්න කියලා.

ජාතික නිදහස් පෙරමුණේ නායක ඇමැති විමල් වීරවංශ මහතා‍,

රාජ්‍ය නිලධාරීන් සහ රාජ්‍ය යාන්ත්‍රණයත් අගමැති, ජනාධිපති ප්‍රමුඛ පිරිසත් එක්ව ගනු ලැබූ තීන්දු තීරණ හේතුවෙන් අපට අද සතුටු වෙන්න පුළුවන් තැනක ඉන්න ලැබිලා තිබෙනවා. විශේෂයෙන් විද්වතුන්ගේ මඟ පෙන්වීම මත අප රටක් වශයෙන් හොඳ තැනක ඉන්නවා. එසේ නොවුණා නම් ඇති විය හැකි තත්ත්වය අපට හිතාගන්නවත් බැහැ. රාජ්‍ය නිලධාරීන් පමණක් නොවෙයි මහජන නියෝජිතයනුත් මේ සඳහා දායක කර ගත යුතුයි.

ප්‍රජාතන්ත්‍රවාදී වාමාංශික පෙරමුණේ නායක වාසුදේව නානායක්කාර මහතා,

කාර්ය සාධක බළකාය ඉතා දුෂ්කර අභියෝග ජයග්‍රහණය කිරීමේ අරගලයක නිරත වෙමින් සිටිනවා. ඉදිරියේ දී වර්ෂාව එනවා. ඒ සමඟ මතු විය හැකි ආපදා තත්ත්වයන් ගැනත් අපි අවධානය යොමු කරන්න ඕනේ. විශේෂයෙන් නායයෑම් ගැනත් දැනුවත් කළ යුතුයි. විදෙස්වල සිටින සිසුන් ගෙන්වා ගැනීම ගැනත් අවධානය යොමු කරන්න ඕනේ.

දෙමළ ජාතික සන්ධානයේ හිටපු පාර්ලිමේන්තු මන්ත්‍රී එම්. ඒ. සුමන්තිරන් මහතා,

අද නොයෙකුත් වැඩපිළිවෙළ ක්‍රියාත්මක වෙනවා. නමුත් රාජ්‍ය නිලධාරීන්ට පමණක් මෙය කරන්න බැහැ. පාර්ලිමේන්තුව නැවත රැස්කිරීම සම්බන්ධයෙන් සොයා බැලිය යුතුයි.

හිටපු පාර්ලිමේන්තු මන්ත්‍රී ආචාර්ය විජයදාස රාජපක්ෂ මහතා,

පාර්ලිමේන්තුව නැවත කැඳවිය හැක්කේ මහජන ආරක්ෂක පනත යටතේ රෙගුලාසි හදලා ඒවා සම්මත කරගැනීමට පමණයි. එසේ වුවත් එහිදී එම කාරණයෙන් පිටත කාරණා සාකච්ඡා කරන්න පුළුවන්කමක් නැහැ. මේක සෞඛ්‍ය ගැටලුවක්. නිරෝධායන පනත ඇතුළු පනත් මගින් අවශ්‍ය ක්‍රියාමාර්ග ගන්න පුළුවන්. රටට මේ අවස්ථාවේ ප්‍රයෝජනයක් නැති දෙයකට යා යුතු නැහැ. පාර්ලිමේන්තුව කැඳෙව්වා කියලා මේක විසඳන්න තියෙන ක්‍රමවේදය කුමක්ද? දැනට තිබෙන ක්‍රමවේදය තමයි ක්‍රියාවට නැංවෙමින් තිබෙන්නේ. සෞඛ්‍ය සහ ආරක්ෂක අංශ අදාළ ක්‍රියාමාර්ග ගෙන තිබෙනවා. ඒවාට සහාය දීම පමණයි අපට කළ හැක්කේ.

ඒ වගේම මම මේ සභාවේ අවධානය ඩෙංගු රෝගය ගැනත් යොමු කරන්න ඕනේ. ඉදිරියේ දී වැසි කාලය ආරම්භ වෙනවා. ඒ සමඟ ඩෙංගු රෝගය ව්‍යාප්තවීමේ ඉඩකඩක් තිබෙනවා. කොළඹ ඉතාම අවදානම් කලාපයක් ලෙසයි හඳුනාගෙන තිබෙන්නේ. කොරෝනා මර්දනය අතරම ඩෙංගු රෝගය මර්දනය ගැනත් අවධානය යොමු කළ යුතුයි. එසේ නොවුණහොත් සෞඛ්‍ය අංශවලට මේ දෙක ගැනම අවධානය එකවර යොදවන්න වෙයි. ඒ නිසා මම ඉල්ලා සිටිනවා දැන් සිටම ඩෙංගු සම්බන්ධයෙන් ජනතාව දැනුවත් කිරීම් ආරම්භ කරන ලෙස. මේ දවස්වල කවුරුත් ගෙවල්වල සිටින නිසා පිරිසිදු කරගැනීම් වුණත් කරන්න පහසු වෙයි.

පිවිතුරු හෙළ උරුමයේ නායක උදය ගම්මන්පිල මහතා,

පාර්ලිමේන්තුව නැවත කැඳවීමේ අවශ්‍යතාවක් නැහැ. ඒ සඳහා තමයි පාර්ලිමේන්තුව නියෝජනය කළ සියලු පක්ෂ නායකයන් ඇතුළත් මේ පක්ෂ නායක හමුව කැඳවා තිබෙන්නේ. පාර්ලිමේන්තුව කැඳවීමේ අරමුණ කුමක්ද? අපේ රට අනෙකුත් රටවල් හා සැසඳීමේ දී විශිෂ්ට තැනක සිටිනවා. වයසත් සමඟ රෝග අවදාමක් තිබෙනවා. මේ කරුණු ගැන ජනතාව දැනුවත් කළ යුතුයි.

අතුරලියේ රතන හිමි,

මේ රෝගයට මුහුණ දීම සඳහා ජාතික වැඩපිළිවෙළක් අවශ්‍ය කර තිබෙනවා. මාස තුනකින් මේ අර්බුදය විසඳෙයි කියලා විශ්වාස කරන්න බැහැ. ඒ සඳහා පාර්ලිමේන්තුව කැඳවීම විසඳුමක් නෙමෙයි. අමෙරිකාව, ජපානය වගේ රටවලට බැරි වුණත් අපට පුළුවන් අපේ රට වහලා අවුරුද්දක් හරි ඉන්න. නව ලිබරල්වාදය පසුපස එල්ලීගෙන ගිය අයට අද ඇත්ත තේරෙනවා ඇති. ජාතික සම්පත් විකුණාගෙන කන්න හිටපු අයට මේක පේනවා ඇති. ජාතික දැක්මක් අපට අවශ්‍යයි. මැතිවරණ මානසිකත්වයේ ඉඳගෙන මේක කරන්න බැහැ.

හිටපු අගමැති රනිල් වික්‍රමසිංහ මහතා,

මේ රැස්වීම කැඳවීම සම්බන්ධයෙන් ස්තුතිවන්ත වෙනවා. අපට පිළිතුරු හොයන්න අංශ ගණනාවක් තිබෙනවා. අපේ වාසනාවට තවම වාර්තා නොවුණත් ලෝකයේ සෙසු රටවල සෞඛ්‍ය අංශයේ අයටත් මේ රෝගය වැළඳී තිබෙනවා. ඒ නිසා ඒ අයටත් යුද කාලයේ මෙන්ම වන්දියක් ගෙවන්න කියලා ඉල්ලා සිටිනවා. මේ රෝගය මාසයකින් පාලනය කරන්න බැරි වෙයි. ඉදිරියේ දී ලෝකයටම ආර්ථික අර්බුදයක් එනවා. අපට ඒ දෙකටම එකවර මූණ දෙන්න බැරි වෙයි. මගේ මතය නම් මේ වගේ වෙලාවට විශේෂ නීති අවශ්‍යයි. අපි මෙතනට ආවේ කොරෝනා මඬින හැටි කතා කරන්නයි. දේශපාලනය ගැන කතා කරන්න ඕනේ නැහැ.

හිටපු ජනාධිපති මෛත්‍රීපාල සිරිසේන, ඇමැතිවරුන් වන දිනේෂ් ගුණවර්ධන, ඩලස් අලහප්පෙරුම, දුමින්ද දිසානායක, නිමල් සිරිපාල ද සිල්වා මහත්වරු ඇතුළු පිරිසක් ද මේ අවස්ථාවට එක්ව සිටියහ.