ශ්‍රී ලංකාවේ පැවැත්වෙන මේ උත්තරීතර ත්‍රිපිටක සජ්ඣායනයෙන් රටට,ජනතාවට සහ වත්මන් රාජ්‍ය තන්ත්‍රය මෙහෙයවන නායක කරකාදීන්ට සෙතක් ශාන්තියක් උදාවනු නිසැකය. එසේම කොරෝනා වසංගතය ද අපේක්ෂිත පරිදි පහව යනු නියතය.
හිමවතේ වනගතව දිගු කලක් ත්‍රිපිටකය සජ්ඣායනයේ නිරත සංඝ පිතෘන් වහන්සේ 48 නමක් මේවන විට ශ්‍රී ලංකාවට වැඩමවා සිටිති. මේ බුද්ධ පුත්‍රයන් වහන්සේලා අප දිවයිනට සැපත්වුයේ භූතානයේ අග රජු , ජිග්මේ කෙහෙසර් නම්ග්යෙල් වැන්චුක් ගේ සහ මවුරැජින අශීත්ස්හෙරින් යැන්ග්ඩොන් බිසවගේ මැදිහත් වීමෙනි. භුතාන රජ පවුල බුදු දහම කෙරෙහි පවත්නා අසීමිත භක්තිය කෙතරම්ද යත් ,භූතාන මවු බිසවගේ මුණුපුරු ගියාල්සේ බිලිදු කුමරු දෙහැවිරිදි වියේදී පැවිදි බිමට පමුණුවාලීමට තරම් ඔවුහු භක්තිමත් වුහ.මේ කුඩා සාමනේරයන් වහන්සේ සිය මවු බිසව සමඟ ශ්‍රී ලංකාවේ පුජනීය බොදු වෙහෙර විහාර වැඳපුදා ගැනීම පිණිස පසුගිය වසරේ ශ්‍රී ලංකාවට සැපත් වු අයුරු ද අපට මෙහිදී සිහිපත් වේ. එම අවස්ථාවේදී මේ පුංචි සාමනේර නම ,මෙරට සංඝරත්නය හමුවේ තම පෙර ආත්ම භාවය පිළිබඳ තොරතුරු හෙළි කළ බවද වාර්තාවේ.
නාගානන්ද ජාත්‍යන්තර බෞද්ධ විශ්වවිද්‍යාලයේ කුලපති ආචාර්ය බෝදාගම චන්දිම හිමිපාණන් භුතාන රජු සහ රජ පවුලේ සාමාජිකයන් සමඟ පැවති සාකච්ඡාවකදී , භූතානයට බුදු සමය රැගෙන ගිය පද්මසම්භව රහතන් වහන්සේ ශ්‍රී ලංකාවේ ශ්‍රීපාදස්ථානය වන්දනය සඳහා මෙහි පැමිණ,2020 වසරට අවුරුදු 1300 ක් සපිරෙන බව හෙළිවිය. එම අවස්ථාව සැමරීම, නව ජනපතිදුන්,නව අගමැතිදුන් ඇතුළු ලක් රජයට සහ ලංකාවාසීන්ට ආශීර්වාද කිරීම, වර්තමානයේ ව්‍යාප්ත වෙමින් පවත්නා කොරෝනා වසංගතය පිටුදැකීම යන ත්‍රිත්ව අරමුණු පෙරදැරි කරගෙන සම්භාව්‍ය ත්‍රීපිටක සජ්ඣායනයක් ශ්‍රී ලංකාවේ පැවැත්වීම කෙරෙහි භුතාන නිරිදුන්ගේ ක්ෂණික අවධානය යොමු විය. භුතාන රජුගේ එම අපේක්ෂාව යථාර්ථයක් බවට පත් කරමින් භුතානීය සුත්‍රධර ධර්ම ධුතයාණන් පිරිස මේ වන විට ලක් දෙරණට සැපත්ව සිටිති.මේ ත්‍රිපිටක සජ්ජායනාව ඉපැරණි සම්ප්‍රදායන්ට අනුකූලව සිදුකිරීම මෙහෙයවනු ලබන්නේ ආචාර්ය බෝදාගම චන්දිම හිමිපාණන්, භාරතයේ ප්‍රධාන සංඝනායක ආචාර්ය දොඩම්ගොඩ රේවත නාහිමිපාණන්, භූතානයේ හිටපු කතානායක ඉන්දියානු මහාබෝධි සමාගමේ සභාපති ඩසුපසන් ඩොර්පේ සහ ජගත් සුමතිපාල මහත්වරුය.
අද (12) පෙරවරු 9ට , ආශිර්වාදාත්මක ත්‍රිපිටක සජ්ඣායනය කැලණිය මානෙල්වත්ත විහාරස්ථ වැව් තෙර පිහිටි සදහම් මාලිගයේදී ආරම්භ කෙරේ. අගමැති මහින්ද රාජපක්ෂ මහතා මේ ආගමික වැඩසටහනේ ප්‍රධාන රාජ්‍ය අමුත්තා වශයෙන් සහභාගි වීමට නියමිතය. දීනපතා සිවු දිනක් මුළුල්ලේ මේ ත්‍රිපිටක සජ්ඣායනය මනෙල්වත්ත විහාරස්ථානයේදී පැවැත්වේ. භුතාන සාම්ප්‍රදායික වත් පිළිවෙත්වලට අනුකුලව සදහම් මාලිගයේ සුසැදි පිරිත් මණ්ඩපය වෙත භුතාන ස්වාමීන්වහන්සේලා පිවිසෙන්නේ , වැව් තෙර වටා විහිදී සොඳුරු මංපෙත ඔස්සේ, උන්වහන්සේලාගේම සහභාගිත්වයෙන් සැදුම් ලත් දර්ශනීය පෙරහරකිනි. සම්ප්‍රදායික සිවුරු දරමින්, භූතානයේ බෙර,දවුල්,තම්මැට්ටම් ,හොරණෑ කන්කළු නාදයෙන් සවන් පත් සනහමින් ගමන් ගන්නා පෙරහරේ තවත් අපුර්ව දසුනක් ද දැකගත හැකිය. පෙරහරේ වැඩමවන භික්ෂුන් වහන්සේ දෑත රැදී ,අලංකාර කහ පාට,රතු පැහැ පට පිළියෙන් ආවරණය වූ කිසියම් පුජා භාණ්ඩයක් ද දැකිය හැකිවේ. එය හිමාලයේ භෝඨ භාෂාවෙන් හැඳින්වෙන්නේ කන්ජුර් ලෙසිනි. ඒ අන්කිසිවක් නොව ලී පතුරුවල ලියන ලද භුතාන ත්‍රිපිටක ග්‍රන්ථ මාලාවය.
වසංගත රෝග බිය දුරලා , රාජ්‍ය තන්ත්‍රයට සහ ජනතාවට සෙත්සිරි පතා මේ ත්‍රිපිටක සජ්ඣායනය පෙබරවාරි මාසයේ අනුරාධපුරය,මහනුවර, ශ්‍රීපාදස්ථානය,සිතුල්පව්ව ස්ථානවලද පැවැත්වීමට කටයුතු යොදා ඇත.
මෙහිදී භුතාන ත්‍රිපිටකය පිළිබඳවද සුවිශේෂී කරුණක් සඳහන් කිරීම මැනවයි හැඟේ. භුතාන බුදු සමයේ කන්ජුර් නොහොත් ත්‍රිපිටකයේ සුත්‍ර,අභිධර්ම,විනය යන තෙවැදෑරුම් ධර්ම කාණ්ඩයන් ඇතුළත්ය. මහායාන ත්‍රිපිටකයේ ථෙරවාදී ත්‍රිපිටකයට අමතරව හතරවන ත්‍රිපිටකයක් ද දක්නට ඇත.එය වජ්‍රයානය නොහොත් තන්ත්‍රයානය නමින් ව්‍යවහාරිතය. පද්මසම්භව ප්‍රධාන මහායාන ආචාර්යවරුන් විසින් වජ්‍රයානය 8 වන සියවසේදී භූතානයට හඳුන්වාදීමට පුරෝගාමීව කටයුතු කර ඇත.
භූතානයට වජ්‍රයාන බුදු සමය හඳුන්වා දුන් පද්මසම්භව මහා රහතුන් වහන්සේ පිළිබඳව එරට වැසියන් තුළ පවත්නේ අසීමිත භක්තියකි. ඔවුහු උන්වහන්සේ පැදකුණු කරන්නේ දෙවන භාග්‍යවතුන් වහන්සේ ලෙසිනි. උන්වහන්සේ ඔඩියානා ප්‍රාන්තයේ ( වර්තමාන පාකිස්තානයේ ) ස්වාත් දිස්ත්‍රික්කයේ ධහනකෝෂ වැව දිය මතුපිට සුපිපි නෙළුම් පුෂ්පයක් මත සම්භවය ලද බව පැවසේ. උන්වහන්සේට පද්මසම්භව නාමය ව්‍යවහාර වන්නට එම සිදුවීම හේතු පාදක වී ඇත. උන්වහන්සේ ගුරු රිපොන්චේ යන නමින් ද හැඳින්වේ. පද්මසම්භව උතුමන් පැවිදි දිවියට පත්වීමට පෙර තරුණ වියේදී මන්දරා නම් රජකුමරියක් සරණපාවාගෙන සිටියේය. අදින් වසර 1300 ට පෙර පද්මසම්භව රහතන්වහන්සේ ශ්‍රී ලංකාවේ ශ්‍රී පාදස්ථානය වෙත වැඩි බව භූතානයේ ඉපැරණි ලේඛනවලින් තහවුරු වේ.
භුතාන ත්‍රී පිටක සජ්ඣායනය සිදුකිරීමෙන් රටට,රාජ්‍ය පාලකයන්ට ,ජනතාවට ඉමහත් සෙතක්,ශාන්තියක් සිදුවන බවට තදබල විශ්වාසයක් පවතී. මීට ඉහත වසර නමය තුළ වෙනත් රටවල් නමයක මෙම පුණ්‍යකර්මය සිදුකොට ඇත.
ආචාර්ය ගාමිණී කාරියවසම්.
0 Comments