විධායක ජනාධිපති ධුරය අහෝසි කිරීමට සාධනීය අදහස් ඉදිරිපත් කිරීම ගැන ජවිපෙ නායක, පාර්ලිමේන්තු මන්ත්‍රි අනුර කුමාර දිසානායක විපක්ෂ නායක මහින්ද රාජපක්ෂ මහතාට ස්තුතිය පුද කරයි.
ඒ අනුව 20 වැනි ව්‍යවස්ථා සංශෝධනය පිළිබඳව මහින්ද රාජපක්ෂ මහතා සමඟ නිල සාකච්ඡාවක් කිරීමට බලාපොරොත්තු වන බව ජවිපෙ නායකයා කීයා සිටියේ පක්ෂ කාර්යාලයේ පැවති මාධ්‍ය හමුවකට එක්වෙමිනි.
ඔහු පැවැසුවේ විසි වැනි සංශෝධන ගැන අනෙක් දේශපාලන පක්ෂ සමඟද තම පක්ෂය සාකච්ඡා කිරීමට සූදානම් අතර එය පාර්ලිමේන්තුවේ සම්මත කිරීමට සියලු මන්ත්‍රිවරුන් එක් විය යුතුවා සේම අනතුරුව මෙම සංශෝධනය ජනමත විචාරණයකට යෑමට අවශ්‍ය ඉඩකඩ සැලසීමද මහජන නියෝජිතයන්ගේ වගකීම බවය.
කෙසේ වෙතත් මහින්ද රාජපක්ෂ මහතාගේ පාර්ශවය නියෝජනය කරන ජාතික නිදහස් පෙරමුණ මෙන්ම පිවිතුරු හෙල උරුමයද විධායක ජනාධිපති ධුරය මේ මොහොතේ අහෝසි කරනවාට දැඩි විරෝදයක් පල කරමින් සිටියදී සිදුවන මෙම හමුවීම විශේෂිතවූ සිදුවීමක් බවට දේශපාලන විචාරකයෝ මතපළ කරති.
එමෙන්ම පසුගිය කාලය පුරා මහා සංඝරත්නය විසින්ද 20 වැනි සංශෝධනයට එරෙහිව විවිධ අදහස් පළ කළ අතර බෙදුම්වාදය වෙනුවෙන් පෙනී සිටිමින් ඊළාම් රාජ්‍යයක් ගැන සිහින දකින පිරිස්වලට මේ මොහොතේ විධායක ජනාධිපති ධුරය අහෝසි කිරීමට දැඩි වුවමනාවක් ඇති වී තිබෙන බවට චෝදනා එල්ල කෙරිණි.
0 Comments