අන්තර් සමාජ පළමුපෙළ ඩයලොග් ලීග් රගර් තරගාවලියේ දෙවැනි වටයේ තරගයෙන් යුද හමුදා කණ්ඩායමට එරෙහිව ලකුණු 28-10ක විශිෂ්ට ජයක් ලැබීමට නාවික හමුදා පිල සමත්විය. හැව්ලොක්ස් පිටියේ පෙරේදා පැවැති මේ තරගයේ පළමුභාගය නිමාවනවිට ලකුණු 14-10කින් පෙරමුණ ගත් නාවික හමුදා කණ්ඩායම දෙවැනි භාගයේදී තරගයේ පාලනය සියතට ගනිමින් යුද හමුදා පිල දැඩි පීඩනයට ලක් කළේය.
නාවික හමුදා පිල ලැබූ ලකුණු සංඛ්‍යාවට ගෝල 4ක් ඇතුළත් වූ අතර යුද හමුදා පිලට රැස් කිරීමට හැකිවූයේ ගෝලයක් සහ දඬුවම් පහරක් පමණි.
තරගයේ කැපී පෙනෙන දස්කම් පෑ නාවික හමුදා පිලේ ෆූල් බෑක් ක්‍රීඩක තිළිණ වීරසිංහ උත්සාහක දිනුම් 2ක් තැබීමට සමත්විය. නැවියන් විසින් වාර්තා කරනු ලැබු උත්සාහක දිනුම් 4ම ගෝල බවට පත්කරනු ලැබුවේ ද ඔහු විසිනි.
තරගයේ 12 වැනි මිනිත්තුවේදී තිළිණ වීරසිංහ තැබූ උත්සාහක දිනුම ඔහු විසින්ම ගෝලයක් බවට පත් කරනු ලැබීමෙන් ලකුණු 7-0කින් පෙරමුණ ගත් නාවික හමුදා පිල හමුවේ සටන්කාමී ක්‍රීඩා විලාශයක් පෙන්නුම් කළ යුද හමුදා පිල මිනිත්තු 7ක් ඇතුළත දඬුවම් පහරක් සහ ගෝලයක් රැස් කරමින් ලකුණු 10ක් ලබාගත්තේය.
එහෙත් දෙවැනි භාගයේදී ප්‍රතිවාදී පිල ඇද බැඳ තබාගත් නාවික හමුදා පිල ඒ අතරතුර උත්සාහක දිනුම් 2ක් තැබුවේය. ඉන් පළමුවැන්න වාර්තා කරනු ලැබුවේ ස්ටීවන් ග්‍රෙගරි විසිනි. තරගයේ අවසන් භාගයේදී තිළිණ වීරසිංහ දෙවැනි උත්සාහක දිනුමත් තැබීමට සමත්විය. එය ගෝලයක් බවට පත් කරමින් නැවියන්ගේ ජයග්‍රහණය තහවුරු කරනු ලැබුවේ ද ඔහු විසිනි.
ඡායාරූපය - වාසිත පටබැඳිගේ
0 Comments