වර්ජනය අවසන් - වෘත්තීය සමිති, ඇමැති අනුකමිටුව සමඟ එකඟ වෙයි

අනුර ප්‍රේමලාල් සහා ශීලා උඩුවර

දුම්රිය රියැදුරු වර්ජනය සම්බන්ධයෙන් ඇමැති අනුකමිටු හා දුම්රිය වෘත්තීය සමිති අතර ඊයේ (13) පැවැති සාකච්ඡාවේදි තීරණ පහකට එළඹවු බවද ඒ අනුව වහාම ක්‍රියාත්මක වන පරිදි දුම්රිය වර්ජනය අත්හිටුවීමට ඹවුන් තීරණය කළ බව එම කමිටුවේ සභාපති විශේෂ ව්‍යාපෘති ඇමැති සරත් අමුණුගම මහතා ප්‍රකාශ කරයි.

මේ සම්බන්ධයෙන් මාධ්‍ය වෙත විශේෂ ප්‍රකාශයක් කළ ඇමැතිවරයා ඒ අනුව දුම්රිය, සෞඛ්‍ය හා අධ්‍යාපන සේවා සංවෘත සේවාවන් ලෙස නැවත සකස් විය යුතුයි යැයි කමිටුව ඒකමතිකව තීරණය කළ බැවැන් එම නිර්දේශ ඊළඟ කැබිනට් මණ්ඩල රැස්වීමට යොමු කිරීමට එකඟවිය.

ලබන සතියේ මේ කමිටුව අදාළ වෘත්තීය සමිති සමග සාකච්ඡා කර විසඳුම් දෙන තෙක් බඳවා ගැනීම්, විභාග පිළිබඳ තීරණ අත්හිටුවිය යුතුයි. ශ්‍රී ලංකා දුම්රිය දෙපාර්තමේන්තුවේ ඇති යම් යම් පරිපාලන හා වැටුප් ප්‍රශ්න සියලුම නිලධාරින් කැඳවා අදාළ වෘත්තීය නියෝජිතයින් සමඟ සාකච්ඡා කොට විසඳුම් සෙවීමට තීරණය කෙරිණි.

මේ වෘත්තීය ක්‍රියාමර්ග ගත් කිසිදු නිලධාරියකුට විරුද්ධව විනය ක්‍රියාමර්ගයක් ගනු නොලබන අතර වැඩවර්ජනයට පෙර පැවැති තත්ත්වය අනුව ඉදිරි වැඩකටයුතු කළ යුතු බව ඒ මහතා පැවැසීය.ඇමැතිවරුන් වන රාජිත සේනාරත්න ., රංජිත් මද්දුම බණ්ඩාර, අකිල විරාජ් කාරියවසම්,කමිටුවේ අනිත් සාමාජිකයෝ වෙති.